(vovworld) – ກອງປະຊຸມສອງຝ່າຍຄັ້ງທີ 4 ກ່ຽວກັບການຮ່ວມມືປ້ອງກັນ,ຕ້ານຢາເສບຕິດລະຫວ່າງ ຫວຽດນາມ - ຈີນ ໄດ້ຈັດຕັ້ງຢູ່ ຮ່າໂນ້ຍ, ໂດຍກົມໃຫຍ່ຕຳຫຼວດປ້ອງກັນ, ຕ້ານອາດຊະຍາກຳ, ກະຊວງຕຳຫຼວດ ຫວຽດນາມ ຈັດຕັ້ງ. ຝ່າຍ ຫວຽດນາມ ໂດຍພົນຕີ ໂດ໋ກິມຕວຽນ, ຮອງຫົວໜ້າກົມໃຫຍ່ຕຳຫຼວດປ້ອງກັນ, ຕ້ານອາດຊະຍາກຳ ເປັນຫົວໜ້າຄະນະ, ຝ່າຍ ຈີນໂດຍທ່ານ ຫຼຽວເຢວຈຽນ, ຮອງເລຂາທິການໃຫຍ່ຜູ້ປະຈຳການຄະນະກຳມະການປ້ອງກັນ, ຕ້ານອາດຊະຍາກຳແຫ່ງຊາດ ຈີນ ເປັນຫົວໜ້າຄະນະ. ໂດຍຖັດຈາກກອງປະຊຸມສອງຝ່າຍຄັ້ງທີ 3 ຈັດຂຶ້ນໃນເດືອນ 11/2013 ຢູ່ ຈີນ, ເປັນຄັ້ງທຳອິດ 2 ປະເທດສົມທົບກັນຜັນຂະຫຍາຍແຜນຮ່າງສົມທົບກັນເຄື່ອນໄຫວລວມບຸກໂຈມຕີອາດຊະຍາກຳຢູ່ຕາມເຂດຊາຍແດນ ຫວຽດນາມ - ຈີນ. ແຕ່ປີ 2013 ມາຮອດປະຈຸບັນ, ຕຳຫຼວດ 7 ແຂວງເຂດຊາຍແດນຂອງ ຫວຽດນາມ ແລະ ຕຳຫຼວດ 2 ແຂວງຂອງ ຈີນ ໄດ້ຈັດຕັ້ງການໂອ້ລົມສົນທະນາແລກປ່ຽນຂໍ້ມູນຂ່າວສານບັນດາເປົ້າໝາຍ, ສາຍໂທລະສັບດ່ວນກ່ຽວກັບການຄ້າຂາຍຢາເສບຕິດທີ່ກ່ຽວຂ້ອງເຖິງ 2 ຝ່າຍ. ພັນເອກ ຮ່ວາງແອງຕວຽນ, ຮອງຫົວໜ້າຫ້ອງການປະຈຳການປ້ອງກັນ, ຕ້ານຢາເສບຕິດ, ກະຊວງຕຳຫຼວດ, ໃຫ້ຮູ້ວ່າ:
“ປະຈຸບັນ, ພວກເຮົາຍັງບໍ່ສາມາດສະກັດກັ້ນສະພາບຂົນສົ່ງຢາເສບຕິດລະຫວ່າງ 2 ປະເທດ, ໃນນັ້ນມີທັງການຂົນສົ່ງ ເຮໂຣອິນ ຈາກຕ່າງປະເທດເຂົ້າ ຫວຽດນາມ, ຈາກນັ້ນສົ່ງໄປຈີນອີກດ້ວຍ ແລະ ກົງກັນຂ້າມ, ຢາເສບຕິດຫຼາຍປະເພດຈາກ ຈີນ ກໍ່ໄດ້ນຳເຂົ້າ ຫວຽດນາມ. ເລື່ອງແລກປ່ຽນຂໍ້ມູນຂ່າວສານລະຫວ່າງບັນດາຫົວໜ່ວຍ, ທ້ອງຖີ່ນນຳກັນກໍ່ຄືລະຫວ່າງບັນດາອົງການກ່ຽວຂ້ອງຂອງ 2 ປະເທດ ບາງເທື່ອຍັງຊັກຊ້າ, ເນື້ອໃນແລກປ່ຽນບໍ່ທັນຄົບຖ້ວນ, ພາໄປເຖິງການສົມທົບກັນສືບສວນປະສົບກັບຄວາມຫຍຸ້ງຍາກ.”