( ກອງປະຊຸມສະໄໝສາມັນເທື່ອທີ 3,
ສະພາແຫ່ງຊາດຫວຽດນາມ ຊຸດທີ 13 ສືບຕໍ່ເຮັດວຽກ )
( vovworld ) - ຕອນເຊົ້າວັນທີ 22/5, ແມ່ນມື້ເຮັດວຽກທີສອງຂອງກອງປະຊຸມສະໄໝສາມັນເທື່ອທີ 3, ສະພາແຫ່ງຊາດຫວຽດນາມ ຊຸດທີ 13, ບັນດາສະມາຊິກສາພາແຫ່ງຊາດໄດ້ປຶກສາຢູ່ຫໍປະຊຸມກ່ຽວກັບບັນດາເນື້ອໃນທີ່ຍັງມີຄວາມເຫັນແຕກຕ່າງກັນຂອງບັນດາຮ່າງກົດໝາຍວ່າດ້ວຍການປ້ອງກັນ ແລະ ຕ້ານຜົນຮ້າຍຈາກຢາສູບ. ສສຊ ສ່ວນຫຼາຍຖືວ່າຄວນສ້າງຕັ້ງກອງທຶນປ້ອງກັນ ແລະ ຕ້ານຢາສູບເພື່ອແນໃສ່ຜຸກມັດຄວາມຮັບຜິດຊອບຂອງວິສາຫະກິດຜະລິດຢາສູບ ແລະ ຜູ້ນຳໃຊ້ຢາສູບ, ສ້າງເງື່ອນໄຂໃຫ້ສັງຄົມໃນວຽກງານປ້ອງກັນ ແລະ ຕ້ານຜົນຮ້າຍຈາກຢາສູບ.
ກ່ອນໜ້ານັ້ນ, ຕອນບ່າຍວັນທີ 21/5, ສະພາແຫ່ງຊາດໄດ້ຮັບຟັງການສະເໜີ ແລະ ລາຍງານກ່ຽວກັບແຜນຮ່າງສັງລວມສ້າງໂຄງປະກອບພື້ນຖານເສດຖະກິດຄືນໃໝ່. ນີ້ແມ່ນເນື້ອໃນທີ່ໄດ້ຮັບຄວາມສົນໃຈສູງຈາກບັນດາສະມາຊິກສະພາແຫ່ງຊາດ ເພາະວ່າການສ້າງໂຄງປະກອບພື້ນຖານເສດຖະກິດຄືນໃໝ່ ແມ່ນໜ້າທີ່ທັງຮີບດ່ວນ ທັງເປັນພື້ນຖານທີ່ຍາວນານ, ຕ້ອງປະຕິບັດໃນຫຼາຍປີຢ່າງລຽນຕິດ ດ້ວຍຄວາມຫຍຸ້ງຍາກ ແລະ ສິ່ງທ້າທ້າຍຫຼາຍຢ່າງ. ໃນການແລກປ່ຽນກັບນັກຂ່າວວິທະຍຸກະຈາຍສຽງຫວຽດນາມ ຢູ່ນອກກອງປະຊຸມໃນຕອນເຊົ້າວັນທີ 22/5, ທ່ານ Nguyen Duc Kien, ຮອງຫົວໜ້າກຳມະທິການເສດຖະກິດສະພາແຫ່ງຊາດໄດ້ຖືວ່າ ສຳລັບໝວດມາດຕະການທີ່ກ່ຽວຂ້ອງເຖິງການຮັກສາເສດຖະກິດມະຫາພາກເປັນປົກກະຕິ, ຄວນມີແຜນສັງລວມກ່ຽວກັບການສ້າງໂຄງປະກອບຕະຫຼາດການເງິນ ແລະ ມີທິດທາງທີ່ເໝາະສົມ. ກ່ຽວກັບບ້ວງເງິນໜູນຊ່ວຍທີ່ມີມູນຄ່າ 29.000 ຕື້ດົງ ເພື່ອຊ່ວຍເຫຼືອບັນດາວິສາຫະກິດ, ທ່ານ Nguyen Duc Kien ຮອງຫົວໜ້າກຳມະທິການເສດຖະກິດສະພາແຫ່ງຊາດໄດ້ຖືວ່າ.
“ ເບິ່ງລວມແລ້ວ ບ້ວງເງິນໜູນຊ່ວຍ 29.000 ຕື້ດົງ ແມ່ນລັດຖະບານຕ້ອງຮັບຜິດຊອບຄວາມຫຍຸ້ງຍາກ, ແບ່ງເບົາຄວາມລຳບາກຊ່ວຍວິສາຫະກິດ. ພວກເຮົາຈະໜູນຊ່ວຍວິສາຫະກິດ ແຕ່ບໍ່ແມ່ນວ່າຕ້ອງເຮັດທຸກສິ່ງທຸກຢ່າງ. ບັນຫາຢູ່ນີ້ແມ່ນເກີດມາຈາກຢູ່ທັງສອງຝ່າຍ. ສ່ວນລັດຖະບານຈະມີລະບົບນະໂຍບາຍ ແລະ ແຫຼ່ງງົບປະມານເພື່ອປະຕິບັດມາດຕະການຊ່ວຍເຫຼືອຂອງຕົນ. ແຕ່ບັນດາວິສາຫະກິດເອງກໍຕ້ອງປ່ຽນໃໝ່ເພື່ອຮັບເອົາບ້ວງເງິນໜູນຊ່ວຍນີ້ ແລະ ປັບປຸງສ້າງພື້ນຖານການຜະລິດຂອງຕົນຄືນໃໝ່ ”.
ແລະຕອນບ່າຍວັນທີ 22/5, ສະພາແຫ່ງຊາດປຶກສາຫາລືກ່ຽວກັບຮ່າງກົດໝາຍວ່າດ້ວຍການປ້ອງກັນ ແລະ ຕ້ານການຟອກເງິນ, ຮ່າງກົດໝາຍນີ້ກຳນົດກ່ຽວກັບບັນດາມາດຕະການປ້ອງກັນ, ຄົ້ນພົບ, ສະກັດກັ້ນ, ລົງໂທດອົງການ, ສ່ວນບຸກຄົນ ໃນການປ້ອງກັນ, ຕ້ານການຟອກເງິນ, ການຮ່ວມມືກັບສາກົນໃນຂົງເຂດປ້ອງກັນ ແລະ ຕ້ານການຟອກເງິນ.
ຕາມບັນດາ ສສຊ ແລ້ວ, ຕໍ່ໜ້າຄວາມຮຽກຮ້ອງຕ້ອງການຂອງພຶດຕິກຳຕົວຈິງ ແລະ ການເຊື່ອມໂຍງກັບສາກົນ, ການປະກາດໃຊ້ກົດໝາຍວ່າດ້ວຍການປ້ອງກັນ ແລະ ຕ້ານການຟອກເງິນ ແມ່ນມີຄວາມຈຳເປັນ. ທ່ານ Cao Si Kiem ສສຊ ແຂວງ ໄທບິ່ງ ປະກອບຄຳເຫັນວ່າ.
“ຂ້າພະເຈົ້າເຫັນດີຕ້ອງເພີ່ມເຕີມຄຳນິຍາມກ່ຽວກັບຊັບສົມບັດ ແລະ ການຟອກເງິນ, ຕ້ອງນຳບັນດາຂໍ້ຫ້າມເຂົ້າໃນເນື້ອໃນຂອງກົດໝາຍ ແລະ ກຳນົດວ່າ ເມຍ, ລູກ, ເອື້ອຍ, ນ້ອງຄີງ ແມ່ນບັນດາບຸກຄົນທີ່ມີຜົນສະທ້ອນດ້ານການເມືອງ. ສິ່ງດັ່ງກ່າວແມ່ນມີຄວາມຈຳເປັນທີ່ສຸດທັງເໝາະສົມກັບທຳນຽມ ແລະ ສົນທິສັນຍາສາກົນ ທັງສ່ອງແສງຄວາມຈິງຂອງປະເທດຊາດ. ”