(vovworld) - ຕອນເຊົ້າວັນທີ 1/6, ບັນດາ ສະມາຊິກສະພາແຫ່ງຊາດ (ສສຊ) ໄດ້ປຶກສາຫາລືຢູ່ໜ່ວຍກ່ຽວກັບ: ຮ່າງກົດໝາຍວ່າດ້ວຍການສະສົມແຫ່ງຊາດ; ຮ່າງກົດໝາຍສະບັບປັບປຸງເພີ່ມເຕີມບາງຂໍ້ມາດຕາຂອງກົດໝາຍວ່າດ້ວຍການຄຸ້ມຄອງອາກອນ.
ລັດຖະບັນຍັດສະສົມແຫ່ງຊາດທີ່ໄດ້ຮັບການປະກາດໃຊ້ກ່ອນນີ້ 8 ປີ, ປະຈຸບັນຖືກຍົກຂຶ້ນເປັນກົດໝາຍວ່າດ້ວຍການສະສົມແຫ່ງຊາດ, ແຕ່ຍັງຄົງສະແດງອອກຄວາມຈຳກັດຫຼາຍຢ່າງ, ຄວນໄດ້ຮັບການປ່ຽນແປງ.. ສສຊ ຫຼາຍທ່ານຖືວ່າ, ຂອບເຂດສະສົມແຫ່ງຊາດຍັງຄັບແຄບຢູ່, ແຫຼ່ງສະສົມແຫ່ງຊາດຕົ້ນຕໍແມ່ນມາຈາກງົບປະມານແຫ່ງລັດ. ຄວນເປີດກວ້າງເປົ້າໝາຍ ແລະ ຂອບເຂດປັບປຸງກົດໝາຍວ່າດ້ວຍການສະສົມແຫ່ງຊາດເຖິງບັນດາກຸ່ມບໍລິສັດ, ບໍລິສັດໃຫຍ່ຂອງລັດ. ທ່ານ Le Nhu Tien, ສສຊ ແຂວງ ກວາງຈີ້, ສະເໜີ:
”ແຫຼ່ງສະສົມແຫ່ງຊາດໄດ້ຮັບການສ້າງຂຶ້ນຈາກແຫຼ່ງງົບປະມານຂອງລັດ ໂດຍສະພາແຫ່ງຊາດຕົກລົງ. ສິ່ງດັ່ງກ່າວແມ່ນເໝາະສົມກັບກົດໝາຍວ່າດ້ວຍງົບປະມານ, ແຕ່ຖ້າຫາກກຳນົດຄືແນວນີ້, ພວກເຮົາບໍ່ສາມາດລະດົມບັນດາແຫຼ່ງກຳລັງອື່ນໆໃນສັງຄົມໄດ້. ການສະສົມແຫ່ງຊາດແມ່ນມີຄວາມສຳຄັນທີ່ສຸດ ເມື່ອພວກເຮົາເພີ່ມເຕີມເຂົ້າກົດໝາຍວ່າ ສົ່ງເສີມ, ປຸກລະດົມບັນດາວິສາຫະກິດ, ບັນດາພາກສ່ວນເສດຖະກິດອື່ນໆເຂົ້າຮ່ວມການເຄື່ອນໄຫວສະສົມແຫ່ງຊາດ ຈະມີແຫຼ່ງກຳລັງອັນໃຫຍ່ຫຼວງທີ່ສຸດ. ຊ້ຳບໍ່ໜຳບັນດາແຫຼ່ງອຸປະຖຳຊ່ວຍເຫຼືອລ້າຂອງຕ່າງປະເທດ ຖ້າຫາກບໍ່ທັນນຳໃຊ້ໃນຊີວິດກໍ່ຄວນນຳເຂົ້າຄັງສະສົມແຫ່ງຊາດ”.
ປຶກສາຫາລືກ່ຽວກັບຮ່າງກົດໝາຍສະບັບປັບປຸງເພີ່ມເຕີມບາງຂໍ້ມາດຕາຂອງກົດໝາຍວ່າດ້ວຍການຄຸ້ມຄອງອາກອນ, ມີຫຼາຍຄວາມເຫັນຖືວ່າ, ບາງເນື້ອໃນໃນຮ່າງກົດໝາຍນີ້ຄວນໄດ້ຮັບການປັບປຸງ ເພື່ອໃຫ້ເໝາະສົມກັບທຳນຽມສາກົນ, ພິເສດແມ່ນເລື່ອງເພີ່ມເຕີມກົນໄກຕົກລົງກ່ອນກ່ຽວກັບວິທີການກຳນົດຄ່າຄິດໄລ່ອາກອນ, ປະຕິບັດວິໄນບັນດາກໍລະນີລະເມີດກົດໝາຍກ່ຽວກັບອາກອນ; ສືບຕໍ່ຫັນລະບຽບການບໍລິຫານກ່ຽວກັບອາກອນເປັນງ່າຍດາຍ.
ບັນດາສະມາຊິກສະພາແຫ່ງຊາດໄດ້ປຶກສາຫາລືທີ່ຫໍປະຊຸມ ກ່ຽວກັບຮ່າງໂຄງການສ້າງກົດໝາຍ, ລັດຖະບັນຍັດຂອງສະພາແຫ່ງຊາດ ປີ 2013
ແລະກໍຕອນບ່າຍວັນທີ 1/6, ພາຍໃຕ້ການເປັນປະທານຂອງທ່ານຮອງປະທານສະພາແຫ່ງຊາດ Uong Chu Luu, ບັນດາສະມາຊິກສະພາແຫ່ງຊາດໄດ້ປຶກສາຫາລືທີ່ຫໍປະຊຸມ ກ່ຽວກັບຮ່າງໂຄງການສ້າງກົດໝາຍ, ລັດຖະບັນຍັດຂອງສະພາແຫ່ງຊາດ ປີ 2013. ຕາມໂຄງການສ້າງກົດໝາຍ, ລັດຖະບັນຍັດຂອງສະພາແຫ່ງຊາດ ປີ 2013 ແລ້ວ, ຄະນະປະຈຳສະພາແຫ່ງຊາດຄາດຄະເນວ່າ: ຈະນຳຮ່າງກົດໝາຍ 30 ສະບັບ ແລະ ຮ່າງລັດຖະບັນຍັດ 3 ສະບັບ ເຂົ້າໃນໂຄງການຢ່າງເປັນທາງການ. ກ່ຽວກັບໂຄງການກົດໝາຍ, ລັດຖະບັນຍັດ ປີ 2012, ຄາດວ່າຄະນະປະຈຳສະພາແຫ່ງຊາດຈະປັບປຸງຮ່າງກົດໝາຍ 10 ສະບັບ, ເພີ່ມເຕີມຮ່າງກົດໝາຍ 6 ສະບັບເຂົ້າໃນໂຄງການສ້າງກົດໝາຍ, ລັດຖະບັນຍັດຂອງສະພາແຫ່ງຊາດຊຸດທີ 13, ໃນນັ້ນມີກົດໝາຍວ່າດ້ວຍວິສາຫະກິດ, ກົດໝາຍວ່າດ້ວຍການລົງທຶນ (ສະບັບປັບປຸງ), ກົດໝາຍວ່າດ້ວຍການປະກາດໃຊ້ຂໍ້ຕົກລົງດ້ານບໍລິຫານ, ກົດໝາຍວ່າດ້ວຍການປະຕິບັດການປະຢັດ, ຕ້ານການຟຸມເຟືອຍ (ສະບັບປັບປຸງ). ຄຳຄິດຄຳເຫັນສ່ວນຫຼາຍ ໄດ້ເຫັນດີເຫັນພ້ອມ ກັບຮ່າງໂຄງການສ້າງກົດໝາຍ, ລັດຖະບັນຍັດຂອງສະພາແຫ່ງຊາດ ປີ 2013. ມີຫຼາຍຄຳຄິດຄຳເຫັນໄດ້ສະເໜີ ເພີ່ມເຕີມຮ່າງກົດໝາຍວ່າດ້ວຍການປ້ອງກັນ ແລະ ຕ້ານການສໍ້ລາດບັງຫຼວງ ໃນປີ 2012 ແລະ ຈະພິຈາລະນາຮັບຮອງເອົາທີ່ກອງປະຊຸມສະໄໝສາມັນເທື່ອ ທີ 4. ມີບາງຄຳຄິດຄຳເຫັນຍັງສະເໜີວ່າ: ຕ້ອງນຳຮ່າງກົດໝາຍວ່າດ້ວຍການປະຕິບັດປະຢັດ, ຕ້ານການຟຸມເຟືອຍເຂົ້າ ໃນປີ 2013. ທ່ານນາງ Vo Thi Dung, ສະມາຊິກສະພາແຫ່ງຊາດນະຄອນ ໂຮ່ຈີມິນ ມີຄຳເຫັນວ່າ:
“ຂ້າພະເຈົ້າສະເໜີວ່າ: ເລື່ອງສ້າງກົດໝາຍຂອງສະພາແຫ່ງຊາດໃນໄລຍະຈະມາເຖິງ ຄວນໄປຄຽງຄູ່ກັບວິວັດການກະກຽມດຳລັດ ກໍຄືບັນດາເອກະສານແນະນຳຂອງກະຊວງ, ຂະແໜງການ. ເພື່ອຮອດເວລາກົດໝາຍໄດ້ຮັບການປະກາດໃຊ້ ກໍ່ຈະສາມາດເຂົ້າສູ່ຊີວິດຕົວຈິງໂດຍໄວ. ກ່ຽວກັບກົດໝາຍວ່າດ້ວຍທີ່ດິນ, ນີ້ແມ່ນກົດໝາຍທີ່ຍັງມີຄວາມເຫັນທີ່ແຕກຕ່າງກັນ, ມີຫຼາຍບັນຫາທີ່ສັບສົນ ດັ່ງນັ້ນ ຍັງບໍ່ທັນໄດ້ນຳເຂົ້າໂຄງການເທື່ອ, ຄວນໃຫ້ຄຳເຫັນທີ່ກອງປະຊຸມສາໄໝສາມັນເທື່ອທີ 4 ແລະ ຮັບຮອງເອົາທີ່ກອງປະຊຸມສະໄໝສາມັນເທື່ອທີ 5 ສະພາແຫ່ງຊາດຊຸດທີ 13.”