ກອງປະຊຸມສຳມະນາ “ຊຸກຍູ້ການຮ່ວມມື
ດ້ານເສດຖະກິດ ຫວຽດນາມ - ຈີນ“
(vovworld) - ກອງປະຊຸມສຳມະນາ “ຊຸກຍູ້ການຮ່ວມມືດ້ານເສດຖະກິດ ຫວຽດນາມ - ຈີນ“ ດຳເນີນໃນວັນທີ 27/12, ຢູ່ ຮ່າໂນ້ຍ, ເຊິ່ງໄດ້ດຶງດູດຜູ້ແທນ 100 ກວ່າຄົນເຂົ້າຮ່ວມ. ກ່າວຄວາມເຫັນທີ່ກອງປະຊຸມສຳມະນາ, ທ່ານຮອງນາຍົກລັດຖະມົນຕີ ຟ້າມບິ່ງມິງ, ປະທານຄະນະກຳມະການຊີ້ນຳການຮ່ວມມືສອງຝ່າຍ ຫວຽດນາມ - ຈີນ, ຖືວ່າ, ນີ້ແມ່ນໂອກາດທີ່ດີເພື່ອໃຫ້ບັນດາກະຊວງ, ຂະແໜງການ, ທ້ອງຖີ່ນ, ບັນດາອົງການຄົ້ນຄ້ວາ…ຕີລາຄາຮອບດ້ານກ່ຽວກັບການຮ່ວມມືທາງດ້ານເສດຖະກິດລະຫວ່າງ ຫວຽດນາມ - ຈີນ. ທ່ານຮອງນາຍົກລັດຖະມົນຕີເນັ້ນໜັກແຜນນະໂຍບາຍສະເໝີຕົ້ນສະເໝີປາຍຂອງພັກ, ລັດ ແມ່ນຍາມໃດກໍ່ຖືເປັນສຳຄັນເລື່ອງ
ຊຸກຍູ້ການພົວພັນຮ່ວມມືຍຸດທະສາດຮອບດ້ານ ຫວຽດນາມ - ຈີນໃຫ້ພັດທະນາຢ່າງເປັນປົກກະຕິ, ປອດໄສ ແລະ ໝັ້ນຄົງ. ທ່ານຮອງນາຍົກລັດຖະມົນຕີ ຟ້າມບິ່ງມິງ, ເນັ້ນໜັກວ່າ:
“ຈີນແມ່ນຄູ່ຮ່ວມມືໃຫຍ່ດ້ວຍທ່າແຮງ ແລະ ຄວາມສາມາດບົ່ມຊ້ອນຫຼາຍຢ່າງໃຫ້ແກ່ການຮ່ວມມືທີ່ກ່ຽວຂ້ອງເຖິງແຫຼ່ງທຶນ, ເຕັກໂນໂລຢີ,ຕະຫຼາດ ແລະ ການທ່ອງທ່ຽວ. ຄວາມຈິງແລ້ວ, ການພົວພັນທາງດ້ານເສດຖະກິດລະຫວ່າງສອງຝ່າຍໃນໄລຍະຜ່ານມາໄດ້ຮັບການພັດທະນາຢ່າງແຮງ, ທັງເລິກເຊິ່ງ ແລະ ກວ້າງຂວາງ. ຈີນແມ່ນຄູ່ຮ່ວມມືດ້ານການຄ້າ ແລະ ການທ່ອງທ່ຽວໃຫຍ່ສຸດຂອງ ຫວຽດນາມ, ຢືນອັນດັບ 8 ໃນຈຳນວນປະເທດ ແລະ ພາກພື້ນລົງທຶນເຂົ້າ ຫວຽດນາມ. ສ່ວນ ຫວຽດນາມ ໄດ້ກາຍເປັນຄູ່ຮ່ວມມືດ້ານການຄ້າໃຫຍ່ສຸດຂອງຈີນໃນອາຊຽນ“.
ທ່ານຮອງນາຍົກລັດຖະມົນຕີສະເໜີບັນດາຜູ້ແທນລົງເລິກເຂົ້າໃນການແລກປ່ຽນຄວາມສາມາດບົ່ມຊ້ອນ, ບັນດາຜົນງານທີ່ບັນລຸໄດ້; ສະເໜີມາດຕະການທີ່ມີປະສິດທິຜົນເພື່ອແນໃສ່ແກ້ໄຂຄວາມຫຍຸ້ງຍາກ, ສິ່ງທີ່ຍັງຄົງຄ້າງ ພ້ອມກັບບັນດາທິດທາງ, ມາດຕະການຊຸກຍູ້ການຮ່ວມມືກັບ ຈີນ ໃຫ້ພັດທະນາຢ່າງສົມດຸນ, ປອດໄສ ແລະ ໝັ້ນຄົງ.