(vovworld) - ຕອນເຊົ້າວັນທີ 04/04, ຢູ່ສຳນັກງານຂອງສະຫະພັນວົງການຜູ້ວ່າການເຂດ Lombardy (Assolombarda), ປະເທດອີຕາລີ ໄດ້ຈັດກອງປະຊຸມໂຕະມົນກ່ຽວກັບການສົ່ງເສີມການລົງທຶນລະຫວ່າງຫວຽດນາມ - ອີຕາລິ ແລະ ເປີດຫ້ອງການຕາງໜ້າເສດຖະກິດ -ການຄ້າຫວຽດນາມ ຢູ່ Lombardy, ເຂດເສດຖະກິດພັດທະນາທີ່ສຸດຂອງອີຕາລີ ແລະ ແມ່ນໜຶ່ງໃນບັນດາເຂດເສດຖະກິດອັນດັບໜຶ່ງຂອງເອີລົບ.
ກ່າວຄຳເຫັນທີ່ກອງປະຊຸມສຳມະນາ, ທ່ານຮອງປະທານ Assolombarda, Alssandro Spada ໃຫ້ຮູ້ວ່າ, ບັນດາວິສາຫະກິດເຂດ Lombardy ມີຄວາມເອົາໃຈໃສ່ເປັນພິເສດເຖິງການສົ່ງອອກ ກໍ່ຄືເປີດກວ້າງຕະຫຼາດລົງທຶນກັບບັນດາປະເທດໃນພາກພື້ນອາຊີ, ພິເສດແມ່ນຫວຽດນາມ. ສະນັ້ນ, ການຈັດຕັ້ງກອງປະຊຸມສຳມະນາຄັ້ງນີ້ ແມ່ນກາລະໂອກາດທີ່ດີ ເພື່ອຊອກຮູ້ສະພາບລົງທຶນຢູ່ຫວຽດນາມ. ທ່ານລັດຖະມົນຕີກະຊວງແຜນການ ແລະ ການລົງທຶນຫວຽດນາມ ບຸຍກວາງວິງ ໃຫ້ຄຳໝັ້ນສັນຍາວ່າ, ຫວຽດນາມ ຈະຮ່ວມເດີນທາງ, ສະໜັບສະໜູນ ແລະ ພ້ອມແລ້ວທີ່ຈະໜູນຊ່ວຍບັນດາວິສາຫະກິດອີຕາລີ ເວົ້າລວມ ແລະ ເຂດ Lombardy ເວົ້າສະເພາະ ເມື່ອເຂົ້າມາຫວຽດນາມ ຊອກຮູ້ ແລະ ຜັນຂະຫຍາຍການຮ່ວມມືດ້ານເສດຖະກິດ, ການຄ້າ ແລະ ການລົງທຶນ ເພື່ອຜົນປະໂຫຍດຂອງທັງ 2 ຝ່າຍ.
ໃນຂອບເຂດການຢ້ຽມຢາມ, ທ່ານລັດຖະມົນຕີ ບຸຍກວາງວິງ ແລະ ວົງການເຈົ້າໜ້າທີ່ການຄ້າເຂດ Lombardy ໄດ້ດຳເນີນພິທີຕັດແຖບຜ້າເປີດຫ້ອງການຕາງໜ້າເສດຖະກິດ - ການຄ້າຫວຽດນາມ ປະຈຳ ມີລານ ປະເທດ ອີຕາລີ.