(VOVWORLD) -ຕອນເຊົ້າວັນທີ 8 ກັນຍາ, ຢູ່ເຂດຕົວເມືອງເກົ່າໂຮ້ຍອານ, ຫ້ອງການ UNESCO ປະຈຳຫວຽດນາມ ໄດ້ສົມທົບກັບຄະນະກຳມະການປະຊາຊົນແຂວງກວາງນາມ ຈັດກອງປະຊຸມສຳມະນາສາກົນ “ເສີມຂະຫຍາຍບົດບາດຂອງວົງຄະນາຍາດໃນການປົກປັກຮັກສາມໍລະດົກໂລກ ຜ່ານພຶດຕິກຳຕົສຈິງຢູ່ເຂດຕົວເມືອງເກົ່າໂຮ້ຍອານ ແລະ ເຂດທາດເຈດີມີ້ເຊີນ”
ເຂດຕົວເມືອງເກົ່າໂຮ້ຍອານ (ພາບ: vietnamtoday.net)
|
ນີ້ແມ່ນໜຶ່ງໃນບັນດາການເຄື່ອນໄຫວ ສະເຫລີມສະຫຼອງ 20 ປີແຫ່ງ “ຕົວເມືອງເກົ່າໂຮ້ຍອານ ແລະ ເຂດທາດເຈດີ ມີ້ເຊີນ ເຊິ່ງ UNESCO ຮັບຮອງວ່າ ແມ່ນມໍລະດົກໂລກ”. ກ່າວຄຳເຫັນທີ່ພິທີໄຂກອງປະຊຸມສຳມະນາ, ທ່ານເລວັນແທັງ ຮອງປະທານຄະນະກຳມະການປະຊາຊົນແຂວງກວາງນາມ ຢືນຢັນວ່າ:
“ບັນດາປະສິດທິຜົນໃນເບື້ອງຕົ້ນຂອງບັນດາໂຄງການຮ່ວມມືໄດ້ປະກອບສ່ວນສຳຄັນ, ຍົກສູງສະຕິຄວາມຮັບຮູ້ຂອງວົງຄະນາຍາດໃນການປົກປັກຮັກສາມໍລະດົກ. ແຂວງກວາງນາມ ຮັບຮູ້ວ່າ, ການໜູນຊ່ວຍ, ຊ່ວຍເຫຼືອດ້ານປະສົບການໃນການຄຸ້ມຄອງ, ບຳລຸງສ້າງພະນັກງານ, ເຄື່ອງອຸປະກອນ, ວັດຖຸດິບ, ການເງິນຂອງປະຊາຄົມໂລກໃນໄລຍະຜ່ານມາ ແມ່ນມີຜົນປະໂຫຍດອັນແທດຈິງໃນພາລະກິດອະນຸລັກຮັກສາ ແລະ ເສີມຂະຫຍາຍຄຸນຄ່າຂອງມໍລະດົກ”.
ທ່ານ Michael Goft ຫົວໜ້າຜູ້ຕາງໜ້າຫ້ອງການ UNESCO ປະຈຳຫວຽດນາມ ສະແດງຄວາມເຫັນດີເຫັນພ້ອມຕໍ່ແຜນນະໂຍບາຍ ແລະ ທັດສະນະກ່ຽວກັບການ ອະນຸລັກຮັກສາ ແລະ ເສີມຂະຫຍາຍຄຸນຄ່າມໍລະດົກຂອງການນຳແຂວງກວາງນາມ ຊື່ງໄດ້ປະກອບສ່ວນເປີດກ້ວາງ ແລະ ແຜ່ຂະຫຍາຍຊື່ສຽງຂອງໂຮ້ຍອານ, ມີ້ເຊີນ, ດອນຈ່າມ ອອກສູ່ທົ່ວໂລກ.