ກອງປະຊຸມສຳມະນາການປ້ອງກັນຊາດ ອີນເດຍ-ຫວຽດນາມ ກ່ຽວກັບຄວາມສະຫງົບພາກພື້ນ
ກອງປະຊຸມສຳມະນາການປ້ອງກັນຊາດ ອີນເດຍ-ຫວຽດນາມ ກ່ຽວກັບຄວາມສະຫງົບພາກພື້ນ (ພາບ: tintuc.wada.vn)
|
Vovworld- ໃນວັນທີ 15 ແລະ 16/5, ຢູ່ນະຄອນຫຼວງນິວເດລີແຫ່ງປະເທດອີນເດຍ, ໄດ້ດຳເນີນກອງປະຊຸມສຳມະນາປະຈຳປີ ລະຫວ່າງສະຖາບັນຍຸດທະສາດປ້ອງກັນຊາດຫວຽດນາມກັບສະຖາບັນທະຫານປະສົມອີນເດຍ (USI) ແລະ ສະຖາບັນຄົ້ນຄ້ວາ, ໄຈ້ແຍກດ້ານປ້ອງກັນຊາດອີນເດຍ (IDSA). ທ່ານພົນຕີ ຫງວຽນດິງຈ້ຽນ ຫົວໜ້າສະຖາບັນຍຸດທະສາດປ້ອງກັນຊາດໄດ້ນຳໜ້າຄະນະຜູ້ແທນຫວຽດນາມເຂົ້າຮ່ວມກອງປະຊຸມສຳມະນາ. ກອງປະຊຸມສຳມະນາ ແມ່ນເພື່ອ 2 ຝ່າຍແບ່ງປັນທັດສະນະກ່ຽວກັບບັນດາບັນຫາປ້ອງກັນຄວາມສະຫງົບໃນພາກພື້ນຊຶ່ງ 2 ຝ່າຍມີຄວາມສົນໃຈ, ພິເສດແມ່ນບັນດາຂໍ້ມູນຂ່າວສານໄຈ້ແຍກ, ຄາດຄະເນກ່ຽວກັບໄພອັນຕະລາຍທີ່ມີຕໍ່ການປ້ອງກັນຊາດ, ປ້ອງກັນຄວາມສະຫງົບຂອງແຕ່ລະປະເທດ. ກ່າວຄຳເຫັນທີ່ກອງປະຊຸມສຳມະນາ, ທ່ານພົນຕີ ຫງວຽນດິງຈ້ຽນ ຫົວໜ້າສະຖາບັນຍຸດທະສາດປ້ອງກັນຊາດຫວຽດນາມ ໄດ້ຖືວ່າ ການພົວພັນລະຫວ່າງຫວຽດນາມ-ອີນເດຍໃນຂົງເຂດປ້ອງກັນຊາດພວມກ້າວເຂົ້າສູ່ໄລຍະພັດທະນາໃໝ່, ຕັ້ງໜ້າ ແລະ ມີປະສິດທິຜົນ, ສອດຄ່ອງກັບການພົວພັນຄູ່ຮ່ວມມືຍຸດທະສາດຊຶ່ງການນຳຂັ້ນສູງຂອງ 2 ປະເທດໄດ້ຕົກລົງກັນ. ໂດຍຜ່ານການແລກປ່ຽນບັນດາຄະນະຜູ້ແທນຂັ້ນສູງ ແລະ ສົນທະນາຍຸດທະສາດດ້ານປ້ອງກັນຊາດ, ກອງທັບ 2 ປະເທດ ໄດ້ສ້າງຄວາມໄວ້ເນື້ອເຊື່ອໃຈ ແລະ ຄວາມເຂົ້າອົກເຂົ້າໃຈຊຶ່ງກັນ ແລະ ກັນ, ສ້າງກຳລັງຊຸກຍູ້ໃໝ່ເພື່ອກໍ່ສ້າງ, ພັດທະນາສາຍພົວພັນຄູ່ຮ່ວມມື, ມິດຕະພາບໃນທຸກໆຂົງເຂດ.