ຍົນ Mig 21 ໂດຍນັກວິລະຊົນ ຟ້າມຕວນບັນຊາ ໄດ້ຍິງຕົກເຮືອບິນ B52 ຂອງອາເມລິກາໃນປີ 1972.
(ພາບເອກະສານ)
(vovworld) - ໄຊຊະນະ ”ຮ່າໂນ້ຍ - ດ້ຽນບຽນຝູທາງອາກາດ: ປັນຍາ ແລະ ຄຸນນະທາດຫວຽດນາມ” ແມ່ນກອງປະຊຸມສຳມະນາວິທະຍາສາດລະດັບລັດ, ໂດຍກະຊວງປ້ອງກັນປະເທດ ສົມທົບກັບຄະນະໂຄສະນາສຶກສາສູນກາງ ແລະ ຄະນະພັກນະຄອນຈັດຈັ້ງຂຶ້ນໃນຕອນເຊົ້າວັນທີ 28/11, ຢູ່ຮ່າໂນ້ຍ. ກ່າວຄວາມເຫັນນະທີ່ນີ້, ທ່ານຮອງລັດຖະມົນຕີກະຊວງປ້ອງກັນປະເທດ, ພົນໂທ ຫງວຽນແທ໋ງກຸງ (Nguyen Thanh Cung) ເນັ້ນໜັກວ່າ:
”ພ້ອມກັບການເວລາ, ໄຊຊະນະ ”ຮ່າໂນ້ຍ - ດ້ຽນບຽນຝູ ທາງອາກາດ ໄດ້ກາຍເປັນເຫດການປະຫວັດສາດສຳຄັນຍິ່ງ, ສະແດງໃຫ້ເຫັນຄຸນນະທາດ, ປັນຍາ, ວິໄສທັດຍຸດທະສາດຂອງພັກ ແລະ ປະທານ ໂຮ່ຈີມິນ. ຜົນຂອງກອງປະຊຸມສຳມະນາຄັ້ງນີ້ ມີຄວາມໝາຍປະຫວັດສາດຢ່າງເລິກເຊິ່ງ, ປະກອບສ່ວນສຶກສາໃຫ້ພະນັກງານ, ນັກຮົບກຳລັງປະກອບອາວຸດ ແລະ ປະຊາຊົນ, ພິເສດແມ່ນລຸ້ນໜຸ່ມເສີມຂະຫຍາຍມູນເຊື້ອປະຕິວັດ, ນ້ຳໃຈຮັກຊາດ, ຄວາມເອກອ້າງທະນົງໃຈຕໍ່ປະເທດຊາດ, ເຈດຈຳນົງເອກະລາດ, ມູນເຊື້ອສາມັກຄີທົ່ວປວງຊົນໃນກິດຈະການປ່ຽນໃໝ່, ຍູ້ແຮງການຫັນປະເທດຊາດ ເປັນປະເທດອຸດສາຫະກຳ ແລະ ທັນສະໄໝ. ສ້າງສາ ແລະ ປົກປັກຮັກສາປະເທດສັງຄົມນິຍົມຫວຽດນາມ ໃນສະພາບການໃໝ່”.
ທີ່ກອງປະຊຸມສຳມະນາ, ບັນດາບົດປະກອບຄວາມເຫັນກໍ່ໄດ້ຢືນຢັນເຖິງວິໄສທັດຍຸດທະສາດຂອງພັກ ແລະ ປະທານ ໂຮ່ຈີມິນ, ກໍ່ຄືການຊີ້ນຳຢ່າງຖືກຕ້ອງ, ມີຫົວຄິດປະດິດສ້າງຂອງສູນກາງພັກ, ອົງຄະນະພັກການທະຫານສູນກາງ ແລະ ກະຊວງປ້ອງກັນປະເທດໃນບັ້ນຮົບດ້ຽນບຽນຝູ ທາງອາກາດ. ພັນເອກ ເຈິ່ນງອກລອງ, ຮອງຫົວໜ້າສະຖາບັນປະຫວັດສາດການທະຫານ, ໄຈ້ແຍກວ່າ:
”ກ່ຽວກັບພາຫະນະ ອຸປະກອນ, ກອງທັບອາກາດອາເມລິກາໄດ້ປະກອບອາວຸດທີ່ທັນສະໄໝກວ່າພວກເຮົາຫຼາຍ, ແຕ່ພວກເຮົາຍັງຄົງໄດ້ຮັບໄຊຊະນະ ດ້ວຍເຈດຈຳນົງ, ຄຸນນະທາດ ແລະ ປັນຍາ. ຕໍ່ໜ້າກຳລັງແຮງອັນໃຫຍ່ຫຼວງຂອງກອງທັບອາກາດອາເມລິກາ, ພວກເຮົາໄດ້ສ້າງວີທີການປ້ອງກັນ ແລະ ຕີໂຕ້ຕອບຢ່າງມີປະສິດທິຜົນ, ນັ້ນແມ່ນຫົວຄິດປະດິດສ້າງອັນໃຫຍ່ຫຼວງຂອງກອງທັບປະຊາຊົນຫວຽດນາມ”