ກອງປະຊຸມສຳມະນາສົ່ງເສີມການຄ້າ ການລົງທຶນເຂົ້າວຽງຈັນ ແລະ ຈຳປາສັກ
(ພາບ:dangcongsan.vn)
( vovworld ) – ຕອນບ່າຍວັນທີ 16/7, ຢູ່ນະຄອນໂຮ່ຈິມິນ, ໄດ້ຈັດກອງປະຊຸມສຳມະນາສົ່ງເສີມການຄ້າການລົງທຶນເຂົ້ານະຄອນຫຼວງວຽງຈັນ ແລະ ແຂວງຈຳປາສັກ ໂດຍສູນສົ່ງເສີມການຄ້າ ແລະ ການລົງທຶນນະຄອນໂຮ່ຈິມິນ ຈັດຕັ້ງຂຶ້ນ. ກອງປະຊຸມສຳມະນາຄັ້ງນີ້ ແມ່ນໜຶ່ງໃນບັນດາການເຄື່ອນໄຫວໂດຍນະຄອນໂຮ່ຈິມິນ ແລະ ທ້ອງຖິ່ນຕ່າງໆຂອງລາວ ສົມທົບກັນຈັດຕັ້ງຂຶ້ນ ເພື່ອແນໃສ່ຂ່ຳນັບຊົມເຊີຍ “ປີແຫ່ງຄວາມສາມັກຄີມິດຕະພາບຫວຽດນາມ-ລາວ 2012“. ທີ່ກອງປະຊຸມສຳມະນາ, ບັນດານັກທຸລະກິດໄດ້ຮັບບັນດາຂໍ້ມູນຂ່າວໃໝ່ກ່ຽວກັບບັນດານະໂຍບາຍ ແລະ ແງ່ຫວັງແຫ່ງການພັດທະນາເສດຖະກິດຂອງຫວຽດນາມ, ລາວ ເວົ້າລວມ, ນະຄອນໂຮ່ຈິມິນ, ນະຄອນຫຼວງວຽງຈັນ ແລະ ແຂວງຈຳປາສັກ ເວົ້າສະເພາະ. ຜ່ານນັ້ນ ຊ່ວຍໃຫ້ນັກທຸລະກິດຊອກຮູ້ບັນດາຂົງເຂດທີ່ຕົນມີຄວາມສົນໃຈ ເພື່ອແນໃສ່ສ້າງການພົວພັນຮ່ວມມືຍາວນານ, ມີປະສິດທິຜົນ ບົນພື້ນຖານຕ່າງຝ່າຍຕ່າງມີຜົນປະໂຫຍດ. ກ່າວຄຳເຫັນທີ່ກອງປະຊຸມສຳມະນາ, ທ່ານ Le Thanh Hai ເລຂາຄະນະພັກນະຄອນໂຮ່ຈິມິນ ເນັ້ນໜັກວ່າ:
“ພື້ນຖານການເມືອງທີ່ໝັ້ນຄົງ ແມ່ນພື້ນຖານເພື່ອໃຫ້ສອງປະເທດເພີ່ມທະວີການຮ່ວມມື, ໃນນັ້ນເສດຖະກິດມີຄວາມໝາຍສຳຄັນ ແລະ ມີຄວາມສາມາດບົ່ມຊ້ອນ, ທ່າແຮງຫຼາຍຢ່າງ. ການຮ່ວມມືກັບບັນດາຄູ່ຮ່ວມມື, ທ້ອງຖິ່ນຕ່າງໆຂອງລາວ ບໍ່ພຽງແຕ່ເພື່ອຈຸດປະສົງດ້ານເສດຖະກິດເທົ່ານັ້ນ, ຫາກຍັງແມ່ນພຶດຕິກຳຕົວຈິງທີ່ມີຊີວິດຊີວາ ເພື່ອເພິ່ມພູນຄູນສ້າງໃຫ້ແກ່ນ້ຳໃຈມິດຕະພາບແບບພິເສດໂດຍລຸ້ນກ່ອນປະໄວ້ໃຫ້. ພວກເຮົາຕ້ອງມີຄວາມຮັບຜິດຊອບ ຕ້ອງປົກປັກຮັກສາ ແລະ ເສີມຂະຫຍາຍເພື່ອອະນາຄົດ“.