ກອງປະຊຸມສຳມະນາສະພາແຫ່ງຊາດຫວຽດນາມ-70ປີແຫ່ງການສ້າງຕັ້ງແລະພັດທະນາ
(ທ່ານຮອງປະທານສະພາແຫ່ງຊາດຫວຽດນາມ ອວງຈູລືວ
ກ່່າວຄຳເຫັນທີ່ ກອງປະຊຸມ)
(vovworld) - ກອງປະຊຸມສຳມະນາດ້ວຍຫົວຄໍ້ວ່າ “ສະພາແຫ່ງຊາດຫວຽດນາມ - 70 ປີແຫ່ງການສ້າງຕັ້ງ ແລະ ພັດທະນາ“ ໂດຍຄະນະປະຈຳສະພາແຫ່ງຊາດຈັດຕັ້ງໃນຕອນເຊົ້າວັນທີ 8/12 ຢູ່ຮ່າໂນ້ຍ. ກ່າວຄວາມເຫັນໄຂກອງປະຊຸມສຳມະນາ, ທ່ານຮອງປະທານສະພາແຫ່ງຊາດຫວຽດນາມ ອວງຈູລືວ ເນັ້ນໜັກວ່າ, 70 ປີຜ່ານມາ, ສະພາແຫ່ງຊາດຫວຽດນາມນັບມື້ນັບຢືນຢັນທີ່ຕັ້ງ, ບົດບາດ ເປັນອົງການຕາງໜ້າສູງສຸດຂອງປະຊາຊົນ. ໃນແຕ່ລະໄລຍະແຫ່ງການປະຕິວັດ, ສະພາແຫ່ງຊາດໄດ້ຊ່ວຍປຸກລຸກເຈດຈຳນົງ ແລະ ນ້ຳໃຈສາມັກຄີທົ່ວປວງຊົນທັງຊາດ, ປະກອບສ່ວນປົກປັກຮັກສາພາລະກິດປົດປ່ອຍຊາດ, ທ້ອນໂຮມປະເທດຊາດເປັນເອກະພາບ, ສ້າງສາ ແລະ ພັດທະນາປະເທດຊາດ ແລະ ຕິດຕາມກວດກາສູງສຸດ. ທ່ານຮອງປະທານສະພາແຫ່ງຊາດຫວຽດນາມ ອວງຈູລືວ, ຊີ້ແຈ້ງວ່າ
“ຄຽງຂ້າງການປ່ຽນໃໝ່ການປັບປຸງ ເພື່ອແນໃສ່ເພີ່ມຈຳນວນເອກະສານດ້ານກົດໝາຍທີ່ໄດ້ຮັບການຮັບຮອງເອົາຢູ່ກອງປະຊຸມແຕ່ລະສະໄໝນັ້ນ, ສະພາແຫ່ງຊາດຍັັງມີຄວາມມານະພະຍາຍາມຢ່າງບໍ່ຢຸດຢັ້ງ ເພື່ອແນໃສ່ຍົກສູງຄຸນນະພາບວຽກງານນິຕິບັນຍັດຂອງຕົນ. ທັດສະນະ ແລະ ຄວາມມຸ້ງມາດປາຖະໜາຂອງຜູ້ມີສິດເລືອກຕັ້ງນັບມື້ນັບໄດ້ຮັບການສ່ອງແສງຢ່າງຈະແຈ້ງໃນບັນດາເອກະສານດ້ານກົດໝາຍທີ່ໄດ້ຮັບການຮັບຮອງເອົາຢູ່ສະພາແຫ່ງຊາດ. ການເຄື່ອນໄຫວຕິດຕາມກວດກາໄດ້ຮັບການເພີ່ມທະວີ ແລະ ປ່ຽນໃໝ່ຢ່າງບໍ່ຢຸດຢັ້ງ, ເນື້ອໃນສຸມໃສ່ບັນດາບັນຫາໃຫຍ່, ຮີບເຮັ່ງຂອງຊີວິດການເປັນຢູ່. ຂັ້ນຕອນລະບຽບການ, ວິທີການຕິດຕາມກວດກາມີການປັບປຸງຫຼາຍຢ່າງ, ພິເສດແມ່ນການເຄື່ອນໄຫວຊັກຖາມ, ການຕິດຕາມກວດກາຕາມຫົວຂໍ້, ການລົງຄະແນນສຽງ ແລະ ການປ່ອນບັດໄວ້ວາງໃຈ.“
ບັນດາຜູ້ແທນຖືວ່າ, ໃນໄລຍະຈະມາເຖິງ, ສະພາແຫ່ງຊາດຕ້ອງສືບຕໍ່ປ່ຽນໃໝ່ ເພື່ອຮັບປະກັນໃຫ້ການປະຕິບັດລັດຖະທຳມະນູນປີ 2013 ແລະ ບັນດາກົດໝາຍທີ່ກ່ຽວຂ້ອງຢ່າງມີປະສິດທິຜົນ, ສືບຕໍ່ປັບປຸງລະບົບກົດໝາຍ ເພື່ອຕອບສະໜອງບັນດາຄວາມຮຽກຮ້ອງຕ້ອງການຂອງການສ້າງລັດແຫ່ງອຳນາດນິຕິບັນຢັດສັງຄົມນິຍົມ, ນຳປະເທດເຮົາໃຫ້ກາຍເປັນປະເທດອຸດສາຫະກຳ ແລະ ທັນສະໄໝ.