ກອງປະຊຸມເຈລະຈາຂັ້ນສູງຫວຽດນາມ-ກຳປູເຈຍ
(vovworld) – ວັນທີ 20/12 ພາຍຫລັງພິທີຕ້ອນຮັບຢ່າງເປັນທາງການໄດ້ຈັດຂຶ້ນຢ່າງສົມກຽດຢູ່ສຳນັກງານປະທານປະເທດ, ທ່ານນາຍົກລັດຖະມົນຕີ ຫວຽດນາມ ຫງວຽນຊວນຟຸກ ໄດ້ມີການພົບປະເຈລະຈາກັບທ່ານນາຍົກລັດຖະມົນຕີ ແຫ່ງລາຊະອານາຈັກ ກຳປູເຈຍ Sandech Hunsen.
ທ່ານນາຍົກລັດຖະມົນຕີ ຫງວຽນຊວນຟຸກ ໄດ້ຊົມເຊີຍທ່ານນາຍົກລັດຖະມົນຕີ Sandech Hunsen ມາຢ້ຽມຢາມ ຫວຽດນາມ ຢ່າງເປັນທາງການ, ສະແດງຄວາມເຊື່ອໝັ້ນວ່າ ການຢ້ຽມຢາມເປັນຂີດໝາຍສຳຄັນນຳການພົວພັນມິດຕະພາບ ແລະ ການຮ່ວມມືລະຫວ່າງ 2 ປະເທດ ໃຫ້ສືບຕໍ່ພັດທະນາຢ່າງໝັ້ນຄົງ ເພື່ອຜົນປະໂຫຍດຂອງປະຊາຊົນ 2 ປະເທດ. 2 ຝ່າຍເຫັນດີເປັນເອກະພາບ ຮັກສາການແລກປ່ຽນບັນດາການຢ້ຽມຢາມ, ພົບປະລະຫວ່າງການນຳຂັ້ນສູງ 2 ປະເທດ ກໍ່ຄືລະຫວ່າງບັນດາກະຊວງ, ຂະແໜງການ, ທ້ອງຖິ່ນ, ອົງການຈັດຕັ້ງມະຫາຊົນ 2 ປະເທດ; ພ້ອມທັງສົມທົບກັນຢ່າງແໜ້ນແຟ້ນໃນການຜັນຂະຫຍາຍບັນດາສັນຍາ, ຂໍ້ຕົກລົງທີ່ໄດ້ລົງນາມລະຫວ່າງ 2 ປະເທດ, 2 ລັດຖະບານຢ່າງມີປະສິດທິຜົນ. 2 ຝ່າຍໃຫ້ຄຳໝັ້ນສັນຍາວ່າ ຈະຕັ້ງໜ້າສົມທົບກັນຈັດຕັ້ງບັນດາການເຄື່ອນໄຫວສະເຫຼີມສະຫຼອງ 50 ປີແຫ່ງວັນສ້າງຕັ້ງການພົວພັນທາງການທູດ 2 ປະເທດ (24/06/1967 – 24/06/2017) ເປັນຢ່າງດີ, ເຫັນດີເປັນເອກະພາບຕໍ່ເວລາຈັດຕັ້ງກອງປະຊຸມສະໄໝສາມັນຄັ້ງທີ 15 ຄະນະກຳມະການປະສົມ ຫວຽດນາມ - ກຳປູເຈຍ ໃນປີ 2017 ໂດຍໄວ. ກ່ຽວກັບການຮ່ວມມືດ້ານເສດຖະກິດ, ການຄ້າ ແລະ ການລົງທຶນ, 2 ຝ່າຍເຫັນດີເປັນເອກະພາບມອບໝາຍໃຫ້ກະຊວງການຄ້າ ກຳປູເຈຍ ແລະ ກະຊວງອຸດສາຫະກຳ - ການຄ້າ ຫວຽດນາມ ເຈລະຈາເຫັນດີເປັນເອກະພາບຕໍ່ບັນດາເນື້ອໃນທີ່ຍັງຄົງຄ້າງ ເພື່ອລົງນາມໃນສັນຍາການຄ້າຊາຍແດນ ຫວຽດນາມ - ກຳປູເຈຍ ໂດຍໄວ.
ສອງຝ່າຍເຫັນດີເປັນເອກະສັນສືບຕໍ່ຮັກສາຫຼັກການບໍ່ອະນຸຍາດໃຫ້ອິດທິກຳລັງທີ່ເປັນປໍລະປັກໄດ້ນຳໃຊ້ຜືນແຜ່ນດິນຂອງປະເທດນີ້ເພື່ອກໍ່ຄວາມເສຍຫາຍເຖິງຄວາມປອດໄພຂອງປະເທດອື່ນ ແລະ ເພີ່ມທະວີການຮ່ວມມືຕ້ານການຄ້າເຖື່ອນ, ການຂ້າມຊາຍແດນຢ່າງຜິດກົດໝາຍ ແລະ ປ້ອງກັນ, ຕ້ານອາດຊະຍາກຳຕ່າງໆ.
ກ່ຽວກັບບັນຫາຊາວ ຫວຽດນາມອາໄສຢູ່ ກຳປູເຈຍ, ທ່ານນາຍົກລັດຖະມົນຕີ ຫງວຽນຊວນຟຸກ ຂອບອົກຂອບໃຈຝ່າຍ ກຳປູເຈຍໄດ້ມີຄວາມເອົາໃຈໃສ່, ສ້າງເງື່ອນໄຂສະດວກໃຫ້ປະຊາຄົມຊາວ ຫວຽດນາມ ອາໄສຢູ່ ກຳປູເຈຍດຳລົງຊີວິດເປັນປົກກະຕິ.ທ່ານນາຍົກລັດຖະມົນຕີ ຫງວຽນຊວນຟຸກ ຫວັງວ່າ, ທ່ານນາຍົກລັດຖະມົນຕີ Hun Sen ສືບຕໍ່ເອົາໃຈໃສ່ຊີ້ນຳບັນດາຂັ້ນ, ຂະແໜງການຂອງ ກຳປູເຈຍ ຍູ້ໄວຄວາມຄືບໜ້າໃນການແກ້ໄຂເອກະສານນິຕິກຳໃຫ້ຊາວເຊື້ອຊາດ ຫວຽດນາມ ຢູ່ກຳປູເຈຍ ເພື່ອໃຫ້ເຂົາເຈົ້າດຳລົງຊີວິດດ້ວຍຄວາມອຸ່ນອ່ຽນໃຈ ແລະ ປະກອບສ່ວນຢ່າງຕັ້ງໜ້າໃຫ້ແກ່ການພັດທະນາຂອງ ກຳປູເຈຍ ກໍ່ຄືການພົວພັນມິດຕະພາບທີ່ເປັນມູນເຊື້ອລະຫວ່າງສອງປະເທດ.
ພາຍຫຼັງການເຈລະຈາ, ນາຍົກລັດຖະມົນຕີທັງສອງທ່ານໄດ້ເປັນສັກຂີພິຍານພິທີລົງນາມໃນເອກະສານຮ່ວມມື 3 ສະບັບລະຫວ່າງສອງປະເທດ.