(vovworld) – ວັນທີ 17/02, ຄະນະກຳມະການແນວໂຮມປະເທດຊາດຫວຽດນາມ ນະຄອນໂຮ່ຈິມິນ ແລະ ບັນດາ ແຂວງ ຮ່າຢາງ, ທ໋າຍບິ່ງ, ກວາງງ້າຍ, ບິ່ງດິ້ງ, ຟຸ໋ອຽນ, ນິງທ້ວນ, ບິ່ງທ້ວນ, ແຄ໋ງຮວ່າ, ບິ່ງເຢືອງ, ບິ່ງເຟື໋ອກ ໄດ້ຈັດກອງປະຊຸມເຈລະຈາຄັ້ງທຳອິດ ກ່ຽວກັບໂຄງປະກອບ, ພາກສ່ວນ ແລະ ຈຳນວນສະມາຊິກທີ່ໄດ້ຮັບສະເໜີອອກສະໝັກເລືອກຕັ້ງເປັນສະມາຊິກສະພາແຫ່ງຊາດຊຸດທີ 14.
ສຳລັບຫົວໜ່ວຍນະຄອນໂຮ່ຈິມິນ, ຄາດຄະເນວ່າ ຄະນະປະຈຳສະພາແຫ່ງຊາດ ຈະຈັດແບ່ງຈຳນວນສະມາຊິກສະພາແຫ່ງຊາດຂອງທ້ອງຖິ່ນຊຸດທີ 14 (ອາຍຸການ 2016 - 2021) ແມ່ນ 30 ຄົນ. ບົນພື້ນຖານນັ້ນ, ຄະນະປະຈຳຄະນະກຳມະການການແນວໂຮມປະເທດຊາດນະຄອນໂຮ່ຈິມິນຄາດວ່າຈະສະເໜີ 46 ຄົນສະໝັກເລືອກຕັ້ງ. ທ່ານນາງ ຫວໍທິກິມຮົ່ງ, ປະທານສະມາຄົມທະນາຍຄວມນະຄອນໂຮ່ຈິມິນ, ຍົກຄຳເຫັນວ່າ.
“ນະຄອນໂຮ່ຈິມິນ ແມ່ນເຂດຕົວເມືອງໃຫຍ່, ຈຳນວນວຽກງານກໍຫຼາຍ ແລະ ມີຄວາມຂະຫຍັນຂັນເຄື່ອນໃນການປະຕິບັດວຽກງານ, ສະນັ້ນ, ບົດບາດຂອງສະມາຊິກສະພາແຫ່ງຊາດກໍໜັກໜ່ວງທີ່ສຸດ. ເພື່ອຮັບຜິດຊອບວຽກງານດັ່ງກ່າວ, ຂ້າພະເຈົ້າຄິດວ່າ ຕ້ອງການມີຈຳນວນສະມາຊິກສະພາແຫ່ງຊາດສະເພາະກິດຢ່າງເໝາະສົມ ເພື່ອສາມາດຮັບຜິດຊອບບັນດາວຽກງານເປັນເສນາທິການ, ກຳແໜ້ນຊີວິດການເປັນຢູ່, ຄວາມມຸ່ງມາດປາດຖະໜາຂອງປະຊາຊົນ, ກໍຄືສະພາບພັດທະນາຂອງນະຄອນ… ຈາກນັ້ນສາມາດເປັນເສນາທິການໃຫ້ສະພາແຫ່ງຊາດ ບັນດາບັນຫາຂຶ້ນກັບລັດຖະນະໂຍບາຍ, ປະກອບສ່ວນສ້າງສາ ແລະ ພັດທະນາປະເທດຊາດ”.
ທີ່ກອງປະຊຸມເຈລະຈາຂອງທ້ອງຖິ່ນຕ່າງໆ, ບັນດາສະມາຊິກໄດ້ສຸມໃສ່ປຶກສາຫາລືກ່ຽວກັບໂຄງປະກອບ, ພາກສ່ວນ, ຈຳນວນສະມາຊິກທີ່ໄດ້ຮັບການສະເໜີອອກສະໜັກເລືອກຕັ້ງເປັນສະມາຊິກສະພາແຫ່ງຊາດຂອງບັນດາອົງການ, ອົງການຈັດຕັ້ງ, ຫົວໜ່ວຍ. ບັນດາຄຳເຫັນໄດ້ເຫັນດີຕໍ່ຈຳນວນສະມາຊິກ, ອັດຕາສ່ວນລະຫວ່າງຍິງ - ຊາຍຄົນຊົນເຜົ່າສ່ວນໜ້ອຍຕາມຂໍ້ກຳນົດຂອງກົດໝາຍວ່າດ້ວຍການເລືອກຕັ້ງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນ.