(vovworld) - ໃນຂອບເຂດກອງປະຊຸມລັດຖະມົນຕີການຕ່າງປະເທດ ອາຊຽນ - AMM 46 ແລະ ບັນດາກອງປະຊຸມທີ່ກ່ຽວຂ້ອງຖືກຈັດຂຶ້ນຢູ່ນະຄອນຫຼວງ Banda Seri Begaoan, ປະເທດ ບຣູໄນ, ຕອນເຊົ້າວັນທີ 29/6, ບັນດາເຈົ້າໜ້າທີ່ຂັ້ນສູງຂອງ ອາຊຽນ ແລະ 3 ປະເທດຄູ່ຮ່ວມມືແມ່ນ ຈີນ, ສ ເກົາຫຼີ ແລະ ຍີ່ປຸ່ນ (ອາຊຽນ +3) ປຶກສາຫາລືບັນດາໂຄງການດຳເນີນງານທີ່ຢື່ນສະເໜີຕໍ່ກອງປະຊຸມລັດຖະມົນຕີ ອາຊຽນ + 3 ຖືກຈັດຂຶ້ນໃນວັນທີ 30/6. ທີ່ກອງປະຊຸມເຈົ້າໜ້າທີ່ຂັ້ນສູງ ອາຊຽນ + 3, ບັນດາຜູ້ແທນໄດ້ກວດຄືນໝາກຜົນ 5 ປີຕົ້ນຂອງ 10 ປີແຫ່ງການປະຕິບັດແຜນການເຄື່ອນໄຫວ ອາຊຽນ + 3 (2007 - 2017) ເຊິ່ງການນຳ ອາຊຽນ + 3 ໄດ້ຮັບຮອງເອົາຢູ່ ສິງກາໂປ ໃນປີ 2007, ແລະ ພິຈາລະນາຄືນບົດລາຍງານຂອງກຸ່ມວິໄສທັດ ອາຊີຕາເວັນອອກ (EAVG – 2), ເພື່ອຍົກອອກບັນດາທິດທາງເຄື່ອນໄຫວຮ່ວມມືຂອງ ອາຊຽນ +3 ໃນໄລຍະຈະມາເຖິງ. ບັນດາເຈົ້າໜ້າທີ່ຂັ້ນສູງຂອງ ອາຊຽນ ກໍ່ປຶກສາຫາລື ຂໍ້ສະເໜີຂອງບັນດາລັດຖະມົນຕີກ່ຽວກັບໝາກຜົນການປະຕິບັດບັນດາໂຄງການຮ່ວມມືໃນຂົງເຂດ ອາຊຽນ + 3, ໃນນັ້ນສຸມໃສ່ເຖິງການຮ່ວມມືເສດຖະກິດ, ການເງິນ ແລະ ເງິນຕາ.
ທີ່ກອງປະຊຸມເຈົ້າໜ້າທີ່ຂັ້ນສູງ ອາຊີ ຕາເວັນອອກ (EAS), ບັນດາປະເທດຕີລາຄາ EAS ສືບຕໍ່ແມ່ນເວທີປາໄສເພື່ອແນໃສ່ປຶກສາຫາລືບັນດາບັນຫາຍຸດທະສາດສຳຄັນ, ທັງດ້ານການເມືອງ, ປ້ອງກັນຄວາມສະຫງົບ, ກໍ່ຄືການຮ່ວມມືພັດທະນາ. ຕາມນັ້ນແລ້ວ, EAS ຈະແມ່ນປັດໄຈສຳຄັນໃນໂຄງປະກອບພາກພື້ນພວມຮັບການສ້າງຕັ້ງຂຶ້ນ, ເພື່ອສັນຕິພາບ, ຄວາມໝັ້ນຄົງ ແລະ ການພັດທະນາໃນພາກພື້ນ.