ກອງປະຊຸມ ASOEN 31 (ພາບ: baotainguyenmoitruong.vn)

ກອງປະຊຸມ ແມ່ນໂອກາດເພື່ອໃຫ້ບັນດາປະເທດສະມາຊິກ ອາຊຽນ ພ້ອມກັນສໍາຫຼວດກວດຄືນບັນດາລາຍການເຄື່ອນໄຫວຂອງ ASOEN, ກໍຄືປຶກສາຫາລື ເພື່ອແນໃສ່ຍົກອອກບັນດາຂໍ້ສະເໜີແນະ ເພື່ອໃຫ້ບັນດາການເຄື່ອນໄຫວຂອງ ASOEN ນັບມື້ນັບມີປະສິດທິຜົນ, ປະກອບສ່ວນບັນລຸໄດ້ບັນດາເປົ້າໝາຍຂອງ ຮ່າງແຜນການຍຸດທະສາດຮ່ວມມືປົກປັກຮັກສາສິ່ງແວດລ້ອມໃນ ອາຊຽນ, ພ້ອມທັງປະກອບສ່ວນບັນລຸໄດ້ສິ່ງແວດລ້ອມແບບຍືນຍົງໃນຂອບເຂດແຜນການສັງລວມ ປະຊາຄົມ ວັດທະນະທຳ - ສັງຄົມ ອາຊຽນ ແລະ ວິໄສທັດ ປະຊາຄົມ ອາຊຽນ 2025.

        ກ່າວປາໄສຢູ່ວາລະໄຂ, ທ່ານຮອງລັດຖະມົນຕີກະຊວງຊັບພະຍາກອນ ແລະ ສິ່ງແວດລ້ອມຫວຽດນາມ ຫວໍຕ໊ວນເຍິນ ໃຫ້ຮູ້ວ່າ ລັດຖະບານ ຫວຽດນາມ ຍາມໃດກຖືວຽກງານປົກປັກຮັກສາສິ່ງແວດລ້ອມເປັນສຳຄັນ, ພິເສດແມ່ນບັນດາບັນຫາທີ່ກ່ຽວຂ້ອງເຖິງການອະນຸລັກຮັກສາລະບົບຊີວະນາໆພັນ, ຄຸ້ມຄອງຊັບພະຍາກອນນ້ຳ, ສິ່ງແວດລ້ອມທາງທະເລ, ການປ່ຽນແປງຂອງດິນຟ້າອາກາດ, ທາດເຄມີ ແລະ ສິ່ງເສດເຫຼືອ, ກໍຄືແກ້ໄຂບັນຫາສິ່ງເສດເຫຼືອພະລາດສະຕິກຢູ່ມະຫາສະໝຸດ ແລະ ມານະພະຍາຍາມຊຸກຍູ້ການພັດທະນາເສດຖະກິດຕາມທິດຍືນຍົງ. ຫວຽດນາມ ສະໜັບສະໜູນຢ່າງແຮງ ຕໍ່ການກໍ່ສ້າງແຜນການເຄື່ອນໄຫວຂອງພາກພື້ນ ອາຊຽນ ກ່ຽວກັບການຕ້ານການຖີ້ມສິ່ງເສດເຫຼືອພະລາດສະຕິກໃສ່ທະເລ ແລະ ບັນດາຖະແຫຼງການຮ່ວມ ອາຂຽນ ໃນ ກອງປະຊຸມ COP 15 ແລະ ກອງປະຊຸມ COP 26, ໃຫ້ຄຳໝັ້ນສັນຍາສືບຕໍ່ຮ່ວມມືກັບບັນດາປະເທດສະມາຊິກຢ່າງແໜ້ນແຟ້ນ ເພື່ອຫັນບັນດາຄຳໝັ້ນສັນຍາ ແນໃສ່ປະຕິບັດແຜນການສັງລວມ ແລະ ວິໄສທັດປະຊາຄົມ ອາຊຽນ 2025 ໃຫ້ປະກົດຜົນເປັນຈິງ ແລະ ໃຫ້ດີທີ່ສຸດ.