ກອງປະຊຸມເພີ່ມທະວີການຮັບປະກັນຄວາມປອດໄພໃນການຫາປາໄກຝັ່ງ
ພາບປະກອບ
(vovworld) - ຕອນບ່າຍວັນທີ 8/8, ຢູ່ນະຄອນ ຍາຈາງ ແຂວງ ແຄ໋ງຮ່ວາ, ກະຊວງກະສິກຳ ແລະ ພັດທະນາຊົນນະບົດຫວຽດນາມ ໄດ້ຈັດຕັ້ງກອງປະຊຸມສະຫຼຸບ 5 ປີແຫ່ງການປະຕິບັດຄຳສັ່ງເລກທີ 22 ຂອງນາຍົກລັດຖະມົນຕີ ກ່ຽວກັບການເພີ່ມທະວີວຽກງານຮັບປະກັນຄວາມປອດໄພໃຫ້ແກ່ການຫາສິນທະເລ, ພິເສດແມ່ນຫາປາໄກຝັ່ງ ແລະ ວຽກງານຈັດຕັ້ງໜ່ວຍຜະລິດບົນທະເລ. ມາຮອດປະຈຸບັນ, ກຳປັ່ນຫາປາຫວຽດນາມ ເກືອບ 100% ໄດ້ຈົດທະບຽນ, ກວດກາ, ສ່ວນຫຼາຍກຳປັ່ນຫາປາໄກຝັ່ງລ້ວນແຕ່ມີອຸປະກອນຕິດຕໍ່ພົວພັນ, ອົງການທີ່ມີໜ້າທີ່ຮັບຜິດຊອບໄດ້ຄຸ້ມຄອງ ແລະ ກຳໄດ້ການເຄື່ອນໄຫວຂອງກຳ່ປັ່ນຫາປາບົນທະເລເທື່ອລະກ້າວ. ທ່ານ Vu Van Tam, ຫົວໜ້າກົມໃຫຍ່ສິນໃນນ້ຳ, ລັດຖະມົນຕີຊ່ວຍວ່າການກະຊວງກະສິກຳ ແລະ ພັດທະນາຊົນນະບົດ ໃຫ້ຮູ້ວ່າ:
“ໃນສະພາບການປະຈຸບັນ, ເລື່ອງຈັດຕັ້ງໃຫ້ຊາວປະມົງຫາປາໄກຝັ່ງ ຜ່ານບັນດາໜ່ວຍສາມັກຄີຜະລິດບົນທະເລແມ່ນວຽກງານມີຄວາມໝາຍທີ່ສຸດ. ມີຫຼາຍວິທີເຮັດທີ່ມີຫົວຄິດປະດິດສ້າງ, ຮູບແບບໃໝ່... ມື້ນີ້, ກະຊວງກະສິກຳ ແລະ ພັດທະນາຊົນນະບົດ ໄດ້ຈັດຕັ້ງກອງປະຊຸມນີ້, ບັນດາຜູ້ແທນເຂົ້າຮ່ວມ ໄດ້ຍົກໃຫ້ເຫັນບັນດາຄວາມຫຍຸ້ງຍາກ, ຂໍ້ຕິດຂັດ ພິເສດແມ່ນກົນໄກນະໂຍບາຍຄວນໄດ້ຮັບການປັບປຸງ ຫຼື ປະກາດໃຊ້ໃໝ່ຄື ນະໂຍບາຍໃຫ້ໜ່ວຍ, ກອງ, ກໍຄືວຽກງານຈົດທະບຽນ, ກວດກາຂອງພວກເຮົາ”