(vovworld) - ຕອນເຊົ້າວັນທີ 12/10, ຢູ່ຮ່າໂນ້ຍ, ສະຫະພັນບັນດາອົງການມິດຕະພາບນະຄອນຮ່າໂນ້ຍ ໄດ້ຈັດຕັ້ງກອງປະຊຸມໃຫຍ່ຜູ້ແທນຄັ້ງທີ 4 ແລະ ຕ້ອນຮັບຫຼຽງໄຊແຮງງານຊັ້ນໜຶ່ງ. ດ້ວຍບົດບາດແມ່ນອົງການຮັບຜິດຊອບສະເພາະກ່ຽວກັບວຽກງານພົວພັນຕ່າງປະເທດປະຊາຊົນຂອງນະຄອນ, ໃນ 5 ປີຜ່ານມາ, ສະຫະພັນບັນດາອົງການມິດຕະພາບນະຄອນຮ່າໂນ້ຍ ໄດ້ກ່າຍເປັນຂົວຕໍ່ສຳຄັນ, ປະກອບສ່ວນເພີ່ມທະວີຄວາມມິດຕະພາບ, ສາມັກຄີ, ເປີດກວ້າງການຮ່ວມມືໃນຫຼາຍຂົງເຂດລະຫວ່າງນະຄອນຫຼວງ ແລະ ບັນດາປະເທດໃນໂລກ. ທີ່ກອງປະຊຸມໃຫຍ່, ທ່ານ Tuong Phi Chien, ຮອງເລຂາຄະນະພັກນະຄອນຮ່າໂນ້ຍ ໄດ້ຖືວ່າ ໃນໄລຍະຈະມາເຖິງ ສະຫະພັນບັນດາອົງການມິດຕະພາບນະຄອນຮ່າໂນ້ຍ ຕ້ອງໂຄສະນາ, ຍົກສູງສະຕິຄວາມຮັບຮູ້ກ່ຽວກັບທີ່ຕັ້ງບົດບາດຂອງວຽກງານພົວພັນຕ່າງປະເທດປະຊາຊົນ; ເອົາໃຈໃສ່ເປີດກວ້າງການພົວພັນຮ່ວມມືກັບບັນດາປະເທດໃນພາກພື້ນ ແລະ ຢູ່ໃນໂລກ. ທ່ານ Tuong Phi Chien ເນັ້ນໜັກວ່າ.
“ເພີ່ມທະວີວຽກງານຖະແຫຼງຂ່າວ, ໂຄສະນາ, ແນະນຳເພື່ອໃຫ້ເພື່ອນມິດສາກົນ ແລະ ປະຊາຊົນໃນໂລກເພື່ອໃຫ້ນັບມື້ນັບເຂົ້າໃຈຢ່າງຈະແຈ້ງກ່ຽວກັບສະພາບການຂອງ ນະຄອນຫຼວງ. ຈາກນັ້ນເພີ່ມທະວີຄວາມເຂົ້າໃຈ, ເຈດຕະນາດີ, ຄວາມໄວ້ເນື້ອເຊື່ອໃຈ ເພື່ອຍາດແຍ່ງການສະໜັບສະໜູນຂອງເພື່ອນມິດສາກົນທີ່ມີຕໍ່ການສ້າງສາ ແລະ ປົກປັກຮັກສານະຄອນຫຼວງ. ພ້ອມທັງ, ປະກອບສ່ວນຍົກສູງຄວາມເຂົ້າໃຈ ແລະ ສະຕິຄວາມຮັບຮູ້ຂອງປະຊາຊົນນະຄອນຫຼວງທຸກຊັ້ນວັນນະກ່ຽວກັບນະໂຍບາຍການຕ່າງປະເທດຫວຽດນາມ ກັບ ໂລກ”.