(vovworld) - ຕອນເຊົ້າວັນທີ 24/10, ຢູ່ຮ່າໂນ້ຍ, ກະຊວງຕຳຫຼວດ ສົມທົບກັບກະຊວງແຜນການ ແລະ ການລົງທຶນຈັດຕັ້ງກອງປະຊຸມຂົນຂວາຍບັນດານັກອຸປະຖຳຕ່າງປະເທດເພື່ອດຶງດູດທຶນ ODA ຮັບໃຊ້ໃຫ້ແກ່ການພັດທະນາຂອງຂະແໜງຕຳຫຼວດ. ຮອດປີ 2013, ກະຊວງຕຳຫຼວດໄດ້ຮັບເອົາ ແລະ ປະຕິບັດ 29 ໂຄງການ, ແຜນຮ່າງ ODA ດ້ວຍຍອດຈຳນວນເງິນປະມານເກືອບ 160 ລ້ານ USD. ບັນດາໂຄງການ, ແຜນຮ່າງໄດ້ຮັບການອຸປະຖຳຈາກບັນດານັກອຸປະຖຳ 2 ຝ່າຍ ແລະ ຫຼາຍຝ່າຍຄື: ຝຣັ່ງ, ໂອຕຣິດ, ຍີ່ປຸ່ນ, ສ. ເກົາຫຼີ… ເພື່ອປະຕິບັດຍຸດທະສາດ ແລະ ແຜນການພັດທະນາຂອງຂະແໜງຕຳຫຼວດ, ແຕ່ນີ້ຮອດປີ 2020, ຄາດວ່າຄວາມຕ້ອງການເງິນລົງທຶນພັດທະນາຂອງກະຊວງຕຳຫຼວດແມ່ນປະມານ 3,8 ຕື້ USD, ໃນນັ້ນມີປະມານ 200 ລ້ານ USD ຈາກແຫຼ່ງທຶນ ODA ເພື່ອເພີ່ມທະວີວັດຖຸອຸປະກອນ, ພາຫະນະ, ວິທະຍາສາດ, ເຕັກໂນໂລຢີ ແນໃສ່ຍົກສູງຄວາມສາມາດຮັບໃຊ້ຊີວິດການເປັນຢູ່ຂອງປະຊາຊົນ, ວົງຄະນະຍາດ. ພົນຕີ ບຸ່ຍແທງເຊີນ, ຮອງຫົວໜ້າກົມໃຫຍ່ພະລາທິການເຕັກນິກ, ກະຊວງຕຳຫຼວດ, ໃຫ້ຮູ້ວ່າ:
“ໄລຍະຈະມາເຖິງ, ກະຊວງຕຳຫຼວດສຸມໃສ່ປະຕິບັດວຽກງານສຳຫຼວດ, ຕີລາຄາສະພາບຕົວຈິງ, ຄວາມຕ້ອງການເພື່ອສະເໜີແຜນການດຶງດູດການລົງທຶນສຳລັບ ODA ໃຫ້ຖືກຕ້ອງກັບແຜນກຳນົດພັດທະນາ, ປະຕິບັດວຽກງານກະກຽມການລົງທຶນ, ຜັນຂະຫຍາຍປະຕິບັດ, ຄຸ້ມຄອງໂຄງການເປັນຢ່າງດີ ຮັບປະກັນຖືກຕ້ອງຕາມກົດໝາຍສາກົນ. ທີສອງແມ່ນ, ດຶງດູດແຫຼ່ງທຶນ ODA ໃຫ້ບັນດາໂຄງການຈຸດສຸມ, ຮີບດ່ວນ, ແກ້ໄຂບັນດາບັນຫາທີ່ມີລັກສະນະສັງຄົມ, ວົງຄະນະຍາດ.”