ກະຊວງສຶກສາແລະບຳລຸງສ້າງພົບປະສັງສັນກັບ
ຄູອາຈານດີເດັ່ນທີ່ເຮັກວຽກຢູ່ເມືອງຕາແສງເກາະ
(ພາບ: ຊວນເຈື່ອງ)
(vovworld) – ຕອນເຊົ້າວັນທີ 13/11 ຢູ່ຮ່າໂນ້ຍ, ກະຊວງສຶກສາ ແລະ ບຳລຸງສ້າງຈັດຕັ້ງການພົບປະສັງສັນກັບຄູອາຈານດີເດັ່ນ 42 ຄົນທີ່ພວມເຮັດວຽກຢູ່ບັນດາເມືອງເກາະ, ຕາແສງເກາະ ເນື່ອງໃນໂອກາດສະເຫຼີມສະຫຼອງວັນຄູອາຈານ ຫວຽດນາມ 20/11. ນີ້ແມ່ນບັນດາຄູອາຈານດີເດັ່ນທີ່ພວມເຮັດວຽກຢູ່ບັນດາໂຮງຮຽນໃນເມືອງເກາະ ແລະ ບັນດາຫົວໜ່ວຍບໍລິຫານຂັ້ນເມືອງທີ່ມີຕາແສງເກາະ, ເຊິ່ງໄດ້ປະກອບສ່ວນຫລາຍຢ່າງໃນການສຶກສານັກຮຽນ, ມີນ້ຳໃຈອົດທົນຜ່ານຜ່າຄວາມຫຍຸ້ງຍາກ, ສຸດຈິດສຸດໃຈຕໍ່ພາລະກິດສຶກສາ ແລະ ໄດ້ຮັບຄວາມຮັກແພງຈາກນັກຮຽນ, ພໍ່ແມ່ຂອງນັກຮຽນ ແລະ ທົ່ວສັງຄົມ. ກ່າວຄຳເຫັນທີ່ການພົບປະສັງສັນ, ທ່ານ ຟຸງຊວນຍະ ລັດຖະມົນຕີກະຊວງສຶກສາ ແລະ ບຳລຸງສ້າງ ຖືວ່າ:
“ຂ້າພະເຈົ້າຂໍອວຍພອນບັນດາຄູອາຈານທີ່ບັນລຸໄດ້ຜົນງານຫລາຍຢ່າງ ບໍ່ພຽງແຕ່ໃນການສອນເທົ່ານັ້ນ ຫາກຍັງເປັນແບບຢ່າງ, ເປັນສັນຍາລັກຢູ່ບັນດາເຂດຫຍຸ້ງຍາກທີ່ສຸດໃຫ້ບັນດາຄູອາຈານ, ເພື່ອນຮ່ວມອາຊີບຂອງທົ່ວຂະແໜງອີກດ້ວຍ. ໃນບັນດາຂໍ້ສະເໜີບັນດາຄູອາຈານ, ຂ້າພະເຈົ້າຈະສົມທົບກັບສູນກາງຄະນະຊາວໜຸ່ມກອມມູນິດ ໂຮ່ຈີມິນ, ສູນກາງສະມາຄົມຊາວໜຸ່ມ ຫວຽດນາມ ເພື່ອມີນະໂຍບາຍທີ່ມີປະສິດທິຜົນ, ແທດຈິງໃຫ້ຊີວິດການເປັນຢູ່ຂອງບັນດາຄູອາຈານ. ນັ້ນແມ່ນຄວາມຮັບຮູ້, ການຕອບບູນແທນຄູນຕໍ່ບັນດາຄູອາຈານຢ່າງມີປະສິດທິຜົນສູງສຸດ.”