ທ່ານນາງລັດຖະມົນຕີວ່າການກະຊວງສາທາລະນະສຸກ ຫງວຽນທິກິມຕ໋ຽນ (ເຊື້ອຂຽວ) ທີ່ພິທີ
(ພາບ: danviet.vn)
|
(vovworld) – ຕອນເຊົ້າວັນທີ 5/3, ຢູ່ນະຄອນ ໂຮ່ຈີມິນ, ກະຊວງສາທາລະນະສຸກ ສົມທົບກັບຄະນະກຳມະການປະຊາຊົນນະຄອນ ໂຮ່ຈີມິນ ໄດ້ປຸກລະດົມບັ້ນເຄື່ອນໄຫວ “ປະຊາຊົນຂ້າຍຸງເອງ, ປ້ອງກັນ, ສະກັດກັ້ນໂລກພະຍາດໂດຍໄວຣັດ Zika ແລະ ໄຂ້ເລືອດອອກກໍ່ຂຶ້ນ”. ທີ່ພິທີ, ພະແນກການແພດນະຄອນ ໂຮ່ຈີມິນ ໄດ້ໃຫ້ຄຳໝັ້ນສັນຍາຈະສະໜອງວັດຖຸອຸປະກອນທີ່ຈຳເປັນເພື່ອຮັບໃຊ້ໃຫ້ວຽກງານບົ່ງມະຕິ, ປິ່ນປົວ ແລະ ປ້ອງກັນ, ຕ້ານໂລກລະບາດຢູ່ຮາກຖານການແພດ ແລະ ວົງຄະນະຍາດ. ການນຳຄະນະກຳມະການເມືອງຕ່າງໆໄດ້ເຊັນຄຳໝັ້ນສັນຍາສ້າງເງື່ອນໄຂໃຫ້ບັນດາຂະແໜງການ, ອົງການການເມືອງສັງຄົມ ແລະ ພິເສດແມ່ນຫົວໜ້າເຂດຊຸມຊົນ, ຕຳຫຼວດ ແລະ ປະຊາຊົນເຂົ້າຮ່ວມບັນດາການເຄື່ອນໄຫວຂ້າຍຸງ. ຕາມທ່ານໝໍ ຫງວຽນຮືວຮືງ, ຮອງຫົວໜ້າພະແນກການແພດນະຄອນ ໂຮ່ຈີມິນ ແລ້ວ, ເລື່ອງເຊັນຄຳໝັ້ນສັນຍາຈະຊ່ວຍຍົກສູງປະສິດທິຜົນໃນການປ້ອງກັນ, ຕ້ານໂລກລະບາດໄຂ້ເລືອດອອກ ແລະ Zika:
“ພະຍາດໄຂ້ເລືອດອອກ ແລະ Zika ບໍ່ພຽງແຕ່ຮຽກຮ້ອງຄວາມຮັບຜິດຊອບຂອງສະເພາະຂະແໜງສາທາລະນະສຸກເທົ່ານັ້ນ, ຫາກຍັງຕ້ອງມີການສົມທົບກັນລະຫວ່າງບັນດາຂະແໜງການ, ໝູ່ຄະນະຂອງທ້ອງຖິ່ນຕ່າງໆ. ພິເສດແມ່ນບົດບາດຂອງປະຊາຊົນໃນການຂ້າຍຸງ. ພວກຂ້າພະເຈົ້າຖືວ່າ, ບົດບາດຂອງຄະນະກຳມະການປະຊາຊົນບັນດາເມືອງໃນການລະດົມປະຊາຊົນເຂົ້າຮ່ວມແມ່ນສຳຄັນທີ່ສຸດ, ດັ່ງນັ້ນກ່ອນທີ່ຈັດຕັ້ງບັ້ນເຄື່ອນໄຫວນີ້, ພວກຂ້າພະເຈົ້າໄດ້ເຊັນຄຳໝັ້ນສັນຍາກັບ 8 ເມືອງຈຸດສຸມຂອງນະຄອນ ໂຮ່ຈີມິນ.”