(vovworld) - ຕອນບ່າຍວັນທີ 14/5, ຊາວໜຸ່ມ, ນັກຮຽນ, ນັກສຶກສາບັນດາມະຫາວິທະຍາໄລ, ວິທະຍາໄລ, ອາຊີວະຊັ້ນກາງ ໃນບໍລິເວນແຂວງ ແທງຮ໋ວາ ເກືອບ 1000 ຄົນໄດ້ເຂົ້າຮ່ວມງານໂຮມຊຸມນຸມມິດຕິງໂດຍຄະນະຊາວໜຸ່ມ ກອມມູນິດ ໂຮ່ຈີມິນ ແຂວງ ແທງຮ໋ວາ ໄດ້ຈັດຕັ້ງການຄັດຄ້ານເລື່ອງ ຈີນ ຕັ້ງຮ້ານເຈາະນ້ຳມັນໄຮຢາງ - 981 ຢ່າງຜິດກົດໝາຍໃນເຂດເສດຖະກິດຈຳເພາະ ແລະ ເຂດໄຫຼ່ທະວີບຂອງ ຫວຽດນາມ.
ພາບປະກອບ
ຕອນບ່າຍວັນດຽວກັນ, ສະມາຄົມທະນາຍຄວາມນະຄອນ ຫາຍຟ່ອງ ໄດ້ຈັດພິທີໂຮມຊຸມນຸມມິດຕິງຄັດຄ້ານ ຈີນ ລ່ວງລ້ຳອະທິປະໄຕເຂດທະເລ, ໝູ່ເກາະ ຫວຽດນາມ.
ໃນຂະນະນັ້ນ, ວັນທີ 13/5, ຊາວ ຫວຽດນາມ ອາໄສຢູ່ Bulgaria ໄດ້ລົງຖະໜົນຄັດຄ້ານການກະທຳຂອງ ຈີນ. ສະມາຄົມຊາວ ຫວຽດນາມ ອາໄສຢູ່ Bulgaria ແລະ ສະມາຄົມມິດຕະພາບ Bulgaria - ຫວຽດນາມ ກໍ່ໄດ້ອອກຖະແຫຼງການດ້ວຍເອກະສານຄັດຄ້ານການກະທຳຂອງ ຈີນ. ຢູ່ແຂວງ Vladimir (ສະຫະພັນ ລັດເຊຍ), ປະຊາຄົມຊາວ ຫວຽດນາມ ອາໄສຢູ່ Vladimir ກໍ່ພ້ອມກັນລົງລາຍເຊັນໃນຈົດໝາຍຂອງສະມາຄົມຊາວ ຫວຽດນາມ ຢູ່ Vladimir ໂດຍຮຽກຮ້ອງ ຈີນ ຖອນຮ້ານເຈາະນ້ຳມັນອອກຈາກເຂດນ່ານທະເລຂອງ ຫວຽດນາມ ແລະ ຢຸດຕິບັນດາການກະທຳເກາະຜິດຢູ່ທະເລຕາເວັນອອກ, ເຄົາລົບນັບຖືກກົດໝາຍສາກົນ ແລະ ອະທິປະໄຕຂອງ ຫວຽດນາມ. ທ່ານ ຫງວຽນວັນຮ໋ຽວ, ປະທານສະມາຄົມຊາວ ຫວຽດນາມ ຢູ່ແຂວງ Vladimir, ໃຫ້ຮູ້ວ່າ:
“ປະຊາຄົມຊາວ ຫວຽດນາມ ຢູ່ນີ້ຄັດຄ້ານ ຈີນ ເກາະຜິດສຳລັບ ຫວຽດນາມ ຢ່າງຮຸນແຮງ. ທຸກຄົນລ້ວນແຕ່ກ່າວປະນາມ ຈີນ ຢ່າງຮຸນແຮງ ແລະ ສະແດງຄວາມຕັດສິນໃຈປົກປັກຮັກສາເອກະລາດແຫ່ງຊາດ”
ຮ້ານເຈາະນ້ຳມັນຂອງ ຈີນ
ພ້ອມກັບປະຊາຊົນຢູ່ພາຍໃນປະເທດ, ຫາງສຽງສາກົນສືບຕໍ່ກ່າວປະນາມເລື່ອງ ຈີນ ຕັ້ງຮ້ານເຈາະນ້ຳມັນ ໄຮຢາງ 981 ໃນເຂດເສດຖະກິດຈຳເພາະ ແລະ ເຂດໄຫຼ່ທະວີບຂອງ ຫວຽດນາມ, ຈັດສັ່ງກຳ່ປັນຫຼາຍລຳໄປຄຸ້ມກັນ, ໃນນັ້ນມີກຳ່ປັນປ້ອງກັນດ້ວຍລູກສອນໄຟ, ເຮັດໃຫ້ສະພາບການຢູ່ທະເລຕາເວັນອອກເຄັ່ງຕຶງຂຶ້ນຕື່ມ. ວັນທີ 14/5, ອຳນາດການປົກຄອງຂອງປະທານາທິບໍດີ ອາເມລິກາ Barack Obama ໄດ້ກະຕຸກຊຸກຍູ້ໃຫ້ແກ້ໄຂຄວາມເຄັ່ງຕຶງຢູ່ທະເລຕາເວັນອອກຜ່ານການໂອ້ລົມສົນທະນາອີກເທື່ອໜຶ່ງ. ໃນຂະນະນັ້ນ, ທີ່ການພົບປະກັບສື່ມວນຊົນໃນຕອນບ່າຍວັນທີ 14/5, ຢູ່ ຮ່າໂນ້ຍ, ເນື່ອງໃນໂອກາດຢ້ຽມຢາມ ຫວຽດນາມ, ພົນເຮືອຕີ Pascal Ausseur, ຮອງຫົວໜ້າກົມຮັບຜິດຊອບພາກພື້ນ ອາຊີ - ປາຊີຟິກ - ກົມພັດທະນາສາກົນ, ກະຊວງປ້ອງກັນປະເທດ ຝຣັ່ງ ໃຫ້ຮູ້ວ່າ: ຝຣັ່ງ ແມ່ນໜຶ່ງໃນບັນດາປະເທດນຳໜ້າໃນການຮຽບຮຽງຖະແຫຼງການຂອງສະຫະພາບ ເອີລົບ ເພື່ອສະແດງຄວາມວິຕົກວັງວົນກ່ຽວກັບການກະທຳຂອງ ຈີນຢູ່ທະເລຕາເວັນອອກ. ກໍ່ໃນວັນດຽວກັນ, ຢູ່ ປາຣີ, ກະຊວງການຕ່າງປະເທດ ຝຣັ່ງ ຢືນຢັນວ່າ: ປາຣີ ມີຄວາມວິຕົກວັງວົນກ່ຽວກັບການປະທະກັນໄລຍະມໍ່ໆມານີ້ ແລະ ບັນດາຄວາມເຄັ່ງຕຶງພວມເກີດຂຶ້ນຢູ່ທະເລຕາເວັນອອກ, ຮຽກຮ້ອງໃຫ້ທຸກຝ່າຍສະແດງຄວາມລະງັບໃຈຢູ່ໃນລະດັບສູງສຸດ ແລະ ແກ້ໄຂຄວາມບໍ່ລົງລອຍກັນໂດຍສັນຕິວິທີ ແລະ ຜ່ານການໂອ້ລົມສົນທະນາ.
ເມື່ອຕອບສຳພາດຕໍ່ນັກຂ່າວວິທະຍຸກະຈາຍສຽງ ຫວຽດນາມ ປະຈຳ ຝຣັ່ງ, ທ່ານ ເລຂາທິການໃຫຍ່ສະມາຄົມມິດຕະພາບ ຝຣັ່ງ - ຫວຽດນາມ Patrice Jorland ໃຫ້ຮູ້ວ່າ:
“ພວກຂ້າພະເຈົ້າມີຄວາມວິຕົກວັງວົນຢ່າງເລິກເຊິ່ງເຖິງການກະທຳຂອງ ຈີນ ຍ້ອນວ່າສະຖານທີ່ຕັ້ງຮ້ານເຈາະນ້ຳມັນແມ່ນນອນໃນເຂດເສດຖະກິດຈຳເພາະຂອງ ຫວຽດນາມ. ຈີນ ພວມລະເມີດກົດໝາຍສາກົນ ແລະ ອະທິປະໄຕຂອງ ຫວຽດນາມ ແລະ ດັ່ງນັ້ນພວກຂ້າພະເຈົ້າກ່າວປະນາມບັນດາການກະທຳຂອງ ຈີນ ຢ່າງຮຸນແຮງ”
ສ່ວນຖະແຫຼງການຂອງຄະນະກຳມະການສາມັກຄີ ອິນເດຍ - ຫວຽດນາມ ເມື່ອວັນທີ 14/5, ຢືນຢັນວ່າ: ແນະນອນວ່າການກະທຳຂອງ ຈີນສົ່ງຜົນສະທ້ອນຢ່າງຮ້າຍແຮງເຖິງການພົວພັນ ປະຊາຊົນ, ຄວາມສາມັກຄີ ແລະ ມິດຕະພາບລະຫວ່າງ ຫວຽດນາມ - ຈີນ, ບັນດາຂະບວນການສັນຕິພາບໃນພາກພື້ນ ແລະ ໃນໂລກ.
ໃນໜັງສືພິມຂອງປະເທດຕ່າງໆຄື: ອີຕາລີ, ແບນຊິກ ກໍ່ມີຂ່າວ ແລະ ບົດ ຖືວ່າ: ການກະທຳຂອງ ຈີນ ແມ່ນຜິດກົດໝາຍ ແລະ ບໍ່ໄດ້ຮັບການສະໜັບສະໜູນຂອງສາກົນ.