(ພາບປະກອບ)
(vovworld) – ໃນລະຫວ່າງວັນທີ 09 – 10/11 ຜ່ານມາ, ຢູ່ New Delhi,ປະເທດ ອິນເດຍ, ກະຊວງການຕ່າງປະເທດຂອງ ປະເທດນີ້ ຈັດຕັ້ງກອງປະຊຸມສາກົນປິດລັບ ກ່ອນດຳເນີນກອງປະຊຸມຂັ້ນສູງ ອາຊີຕາເວັນອອກ (EAS) ຈະດຳເນີນໃນລະຫວ່າງວັນທີ 21 – 22/11 ຢູ່ ມາເລເຊຍ. ກອງປະຊຸມ ມີການເຂົ້າຮ່ວມຂອງບັນດາປະເທດ ອາຊຽນ ພ້ອມກັບ ອາເມລິກາ, ອົດສຕາລີ, ນິວຊີແລນ ແລະ ສ.ເກົາຫຼີ.
ກ່າວຄຳເຫັນທີ່ກອງປະຊຸມ, ທ່ານ Anil Wadha ລັດຖະມົນຕີຊ່ວຍວ່າການກະຊວງການຕ່າງປະເທດ ອິນເດຍ ຮັບຜິດຊອບຂົງເຂດຝ່າຍຕາເວັນອອກ ຖືວ່າ: ບັນດາປະເທດຄວນແກ້ໄຂການຂັດແຍ້ງດ້ານການເດີນທະເລທີ່ຍັງຄົງຄ້າງຢູ່ພາກພື້ນ ອາຊີ - ປາຊີຟິກ ຢ່າງວ່າງໄວ ໂດຍຜ່ານການເຈລະຈາ ແລະ ອີງບົນພື້ນຖານບັນດາຫລັກການໄດ້ຮັບການ ຮັບຮູ້ຈາກກົດໝາຍສາກົນ. ທ່ານຢືນຢັນວ່າ: ອິນເດຍ ຄັດຄ້ານ ການນຳໃຊ້ກຳລັງຂອງກອງທັບ ຫລື ນາບຂູ່ນຳໃຊ້ກຳລັງອາວຸດ ບໍ່ວ່າປະການໃດ ເພື່ອແກ້ໄຂບັນດາການຂັດແຍ້ງກັນດ້ານການເດີນທະເລ ແລະ ໃຫ້ຄຳໝັ້ນສັນຍາຮັກສາເສລີພາບໃນການເດີນທະເລ, ໃນນັ້ນມີສົນທິສັນຍາສະຫະປະຊາຊາດກ່ຽວກັບກົດໝາຍວ່າດ້ວຍທະເລປີ 1982…ທ່ານ Anil Wadha ຫວັງວ່າ ປະມວນຂໍ້ກຳນົດກ່ຽວກັບການປະພຶດຢູ່ທະເລຕາເວັນອອກ (COC) ຈະໄດ້ຮັບການລົງນາມໂດຍໄວ ໂດຍຜ່ານຄວາມເຫັນດີເຫັນພ້ອມ.