ການຕ່າງປະເທດປະຊາຊົນຕ້ອງຖືຜົນປະໂຫຍດຂອງຊາດເປັນບັນຫາສູງສຸດ
ທ່ານ ເລຮົ່ງແອງກ່າວຄຳເຫັນທີ່ກອງປະຊຸມ
|
(vovworld)- ການເຄື່ອນໄຫວການຕ່າງປະເທດເວົ້າລວມ ແລະ ການເຄື່ອນໄຫວການຕ່າງປະເທດປະຊາຊົນເວົ້າສະເພາະ ຍາມໃດກໍຖືຜົນປະໂຫຍດຂອງຊາດເປັນບັນຫາສູງສຸດ. ນັ້ນແມ່ນຄຳຢືນຢັນຂອງທ່ານ ເລຮົ່ງແອງ, ກຳມະການກົມການເມືອງ, ຜູ້ປະຈຳຄະນະເລຂາ ທີ່ກອງປະຊຸມສະຫລຸບວຽກງານການຕ່າງປະເທດປະຊາຊົນປີ 2013 ແລະ ຜັນຂະຫຍາຍຫນ້າທີ່ປີ 2014 ໂດຍຄະນະພົວພັນຕ່າງປະເທດສູນກາງພັກກອມມູນິດຫວຽດນາມ ຈັດຕັ້ງຂຶ້ນໃນຕອນເຊົ້າວັນທີ 15/1 ຢູ່ ຮ່າໂນ້ຍ. ທ່ານ ເລຮົ່ງແອງ ເນັ້ນຫນັກວ່າ: ປີ 2014 ຄວນສືບຕໍ່ການປ່ຽນໃຫມ່ ແລະ ຍົກສູງປະສິດທິຜົນການເຄື່ອນໄຫວການຕ່າງປະເທດປະຊາຊົນ. ຄວນເພີ່ມທະວີການໂຄສະນາເພື່ອໃຫ້ປະຊາຊົນຫວຽດນາມ ຢູ່ພາຍໃນ ແລະ ອາໄສຢູ່ຕ່າງປະເທດ ຮັບຮູ້ຢ່າງຖືກຕ້ອງກ່ຽວກັບສະພາບການສາກົນ, ພາຍໃນປະເທດ ແລະ ແນວທາງ, ນະໂຍບາຍການຕ່າງປະເທດຂອງພັກ ແລະ ລັດຫວຽດນາມ,ປະກອບສ່ວນປັບປຸງຄວາມເຫັນດີເຫັນພ້ອມໃນສັງຄົມ.
ປີ 2013, ວຽກງານການຕ່າງປະເທດປະຊາຊົນຢູ່ຂັ້ນສູນກາງ ໄດ້ສົ່ງຄະນະຜູ້ແທນ 580 ຄະນະໄປຕ່າງປະເທດ ແລະ ຕ້ອນຮັບຄະນະຜູ້ແທນສາກົນ 350 ຄະນະມາ ຫວຽດນາມ. ການທູດປະຊາຊົນສືບຕໍ່ມີບັນດາການປະກອບສ່ວນສຳຄັນເຂົ້າໃນຜົນສຳເລັດການຕ່າງປະເທດເວົ້າລວມຂອງປະເທດຊາດ, ປັບປຸງ, ເພີ່ມທະວີຄວາມສາມັກຄີມິດຕະພາບ, ການຮ່ວມມືກັບປະຊາຊົນບັນດາປະເທດບ້ານໃກ້ເຮືອນຄຽງ.