(vovworld) – ດ້ວຍຫົວຂໍ້ “ການທູດຫວຽດນາມເປັນເຈົ້າການ,ຕັ້ງໜ້າເຊື່ອມໂຍງເຂົ້າກັບສາກົນ”, ກອງປະຊຸມການທູດຄັ້ງທີ 28 ຖືກໄຂຂຶ້ນໃນຕອນເຊົ້າວັນທີ 16/12 ຢູ່ ຮ່າໂນ້ຍ. ກອງປະຊຸມແນໃສ່ຕີລາຄາການຜັນຂະຫຍາຍແນວທາງການຕ່າງປະເທດ ແລະ ແຜນນະໂຍບາຍເຊື່ອມໂຍງເຂົ້າກັບສາກົນໃນເຄິ່ງອາຍຸການກອງປະຊຸມໃຫຍ່ຄັ້ງທີ 11 ຂອງພັກ, ສືບຕໍ່ກຳນົດບັນດາມາດຕະການຮອບດ້ານ, ມີປະສິດທິຜົນເພື່ອປະຕິບັດແນງທາງການຕ່າງປະເທດຂອງພັກໃນຊຸມປີຈະມາເຖິງຢ່າງມີໄຊ.
ກ່າວຄຳເຫັນຊີ້ນຳຂອງປະຊຸມ, ທ່ານເລຂາທິການໃຫຍ່ຄະນະບໍລິຫານງານ ສູນກາງພັກກອມມູນິດ ຫວຽດນາມ ຫງວຽນຟູ໋ຈ້ອງ ໄດ້ຊີ້ແຈ້ງວ່າ: ແຕ່ນີ້ຮອດໝົດອາຍຸການກອງປະຊຸມໃຫຍ່ຄັ້ງທີ 11 ແລະ ໃນຊຸມປີຕໍ່ໄປ, ວຽກງານການຕ່າງປະເທດສືບຕໍ່ປະຕິບັດບັນດາໜ້າທີ່ໃນມະຕິກອງປະຊຸມໃຫຍ່ຄັ້ງທີ 11 ຂອງພັກ ນັ້ນແມ່ນ: ປົກປັກຮັກສາສະພາບແວດລ້ອມສັນຕິພາບ, ສະດວກເພື່ອພັດທະນາ, ປົກປັກຮັກສາເອກະລາດ, ອະທິປະໄຕ, ຜືນແຜ່ນດິນອັນຄົບຖ້ວນ, ປົກປັກຮັກສາລະບອບສັງຄົມນິຍົມ, ຍົກສູງທີ່ຕັ້ງບົດບາດຂອງປະເທດຊາດ, ປະກອບສ່ວນຢ່າງຕັ້ງໜ້າເຂົ້າໃນການຕໍ່ສູ້ເພື່ອສັນຕິພາບ, ເອກະລາດແຫ່ງຊາດ, ປະຊາທິປະໄຕ ແລະ ຄວາມກ້າວໜ້າຂອງສັງຄົມໃນໂລກ. ທ່ານເລຂາທິການໃຫຍ່ຊີ້ແຈ້ງເຖິງ 8 ໜ້າທີ່ຂອງຂະແໜງການທູດຄວນສຸມໃສ່ ແລະ ປະຕິບັດໃນຊຸມປີຜ່ານມາເປັນຢ່າງດີ, ໃນນັ້ນມີໜ້າທີ່ສຳຄັນແມ່ນສວມບົດບາດນຳໜ້າໃນການຮັບປະກັນສະພາບແວດລ້ອມສັນຕິພາບສະດວກໃຫ້ພາລະກິດສ້າງສາ ແລະ ປົກປັກຮັກສາປະເທດຊາດ. ທ່ານ ເລຂາທິການໃຫຍ່ ຫງວຽນຟູ໋ຈ້ອງ ສະເໜີໃຫ້ຄະນະຮັບຜິດຊອບວຽກງານພັກກະຊວງການຕ່າງປະເທດ, ຄະນະພັກທຸກຂັ້ນໃນຂະແໜງຕ້ອງສຸມໃສ່ວຽກງານສ້າງສາຖັນແຖວພະນັກງານການທູດ ຕອບສະໜອງຄວາມຮຽກຮ້ອງຕ້ອງການຂອງໜ້າທີ່ໃນສະພາບການໃໝ່.
ທີ່ວາລະໄຂກອງປະຊຸມ, ການນຳກະຊວງຕຳຫຼວດ, ຄະນະພົວພັນຕ່າງປະເທດສູນກາງພັກ, ກະຊວງປອ້ງກັນປະເທດ, ກຳມາທິການການຕ່າງປະເທດສະພາແຫ່ງຊາດມີບົດທາບທາມຄວາມເຫັນ, ປະກອບການຕີລາຄາ, ຮັບຮູ້ສຳຄັນກ່ຽວກັບສະພາບການໂລກ, ພາກພື້ນ. ບັນດາບົດທາບທາມໄດ້ຊີ້ອອກຜົນງານເຊິ່ງຂະແໜງການທູດບັນລຸໄດ້ຈາກກອງປະຊຸມການຕ່າງປະເທດຄັ້ງທີ 27 ມາຮອດປະຈຸບັນ, ຕີລາຄາສູງວຽກງານສົມທົບລະຫວ່າງກະຊວງການຕ່າງປະເທດ ກັບບັນດາຂະແໜງໃນດ້ານພົວພັນການຕ່າງປະເທດ. ບັນດາບົດທາບທາມຄວາມເຫັນກໍ່ຊີ້ແຈ້ງແນວທາງ, ມາດຕະການຊຸກຍູ້ວຽກງານພົວພັນຕ່າງປະເທດໃນທຸກເສົາຄ້ຳ, ກໍ່ຄືເພີ່ມທະວີການສົມທົບຢ່າງແໜ້ນແຟ້ນລະຫວ່າງບັນດາກຳລັງປະຕິບັດວຽກງານພົວພັນຕ່າງປະເທດໃນໄລຍະຈະມາເຖິງ.
ກອງປະຊຸມການທູດຄັ້ງທີ 28 ຈະອັດລົງໃນວັນທີ 20/12.