ທ່ານເລຂາທິການໃຫຍ່ ຫງວຽນຟູ໋ຈ້ອງ ໄດ້ໃຫ້ການຕ້ອນຮັບເອກອັກຄະລັດຖະທູດ ຍີ່ປຸ່ນ Yasuaki Tanizaki
(Trí Dũng/TTXVN)
(vovworld) – ຕອນບ່າຍວັນທີ 18/9, ຢູ່ສຳນັກງານສູນກາງພັກ, ທ່ານເລຂາທິການໃຫຍ່ ຫງວຽນຟູ໋ຈ້ອງ ໄດ້ໃຫ້ການຕ້ອນຮັບເອກອັກຄະລັດຖະທູດ ຍີ່ປຸ່ນ Yasuaki Tanizaki ເຂົ້າຢ້ຽມອຳລາເນື່ອງໃນໂອກາດສິ້ນສຸດອາຍຸການປະຕິບັດງານຢູ່ ຫວຽດນາມ. ທີ່ການຕ້ອນຮັບ, ທ່ານເລຂາທິການໃຫຍ່ ຫງວຽນຟູ໋ຈ້ອງ ເນັ້ນໜັກວ່າ 2 ປະເທດ ຫວຽດນາມ ແລະ ຍີ່ປຸ່ນ ໄດ້ຍົກລະດັບການພົວພັນຂຶ້ນເປັນຄູ່ຮ່ວມມືຍຸດທະສາດຢ່າງຮອບດ້ານ. ທ່ານເອກອັກຄະລັດຖະທູດຮັບດຳລົງຕຳແໜ່ງຢູ່ ຫວຽດນາມ, ໄດ້ປະຕິບັດໜ້າທີ່ສຳຄັນແມ່ນຜັນຂະຫຍາຍການປະຕິບັດການພົວພັນຄູ່ຮ່ວມມືຍຸດທະສາດໃນທຸກໆຂົງເຂດຄື: ການເມືອງ, ເສດຖະກິດ, ປ້ອງກັນຊາດ - ປ້ອງກັນຄວາມສະຫງົບ... ຊຸມປີຜ່ານມາ, ແຫຼ່ງທຶນ ODA ຂອງ ຍີ່ປຸ່ນ ສະຫງວນໃຫ້ແກ່ ຫວຽດນາມ ໄດ້ປະກອບສ່ວນຢ່າງຕັ້ງໜ້າເຂົ້າໃນການພັດທະນາເສດຖະກິດ - ສັງຄົມຂອງ ຫວຽດນາມ.
ທ່ານເອກອັກຄະລັດຖະທູດ ຍີ່ປຸ່ນ Yasuaki Tanizaki ເນັ້ນໜັກວ່າ: ປະຈຸບັນ, ລັດຖະບານ ຍີ່ປຸ່ນ ກໍ່ຄືບັນດາພັກການເມືອງຢູ່ ຍີ່ປຸ່ນ ລ້ວນແຕ່ຖືເປັນສຳຄັນການພັດທະນາການພົວພັນກັບ ຫວຽດນາມ, ຄວາມສາມາດບົ່ມຊ້ອນໃນການຮ່ວມມືລະຫວ່າງ 2 ປະເທດ ຍັງໃຫຍ່ຫຼວງຢູ່. ເມື່ອກັບເມືອປະເທດ, ເຖິງວ່າຈະດຳລົງຕຳແໜ່ງໃດ, ທ່ານກໍ່ຈະມານະພະຍາຍາມຈົນສຸດຄວາມສາມາດຂອງຕົນເພື່ອສືບຕໍ່ປະກອບສ່ວນເຂົ້າໃນການຊຸກຍູ້ການພົວພັນລະຫວ່າງ 2 ປະເທດໃຫ້ພັດທະນາຂຶ້ນຢູ່ລະດັບສູງໃໝ່ໃນອະນາຄົດ.
ແລະກໍ່ໃນຕອນບ່າຍວັນດຽວກັນ, ຢູ່ສຳນັກງານສະພາແຫ່ງຊາດ, ທ່ານປະທານສະພາແຫ່ງຊາດ ຫງວຽນຊິງຮູ່ງ ໄດ້ໃຫ້ການຕ້ອນຮັບເອກອັກຄະລັດຖະທູດ ຍີ່ປຸ່ນ Yasuaki Tanizaki. ນະທີ່ນີ້, ທ່ານປະທານສະພາແຫ່ງຊາດ ຫງວຽນຊິງຮູ່ງ ສະເໜີໃຫ້ສະພາແຫ່ງຊາດ 2 ປະເທດສືບຕໍ່ຍູ້ແຮງການພົວພັນຮ່ວມມືທີ່ມີຢູ່ແລ້ວ, ຕັ້ງໜ້າຈັດຕັ້ງການເຄື່ອນໄຫວພົບປະແລກປ່ຽນລະຫວ່າງບັນດາອົງການຂອງສະພາແຫ່ງຊາດ, ແລະ ເພີ່ມທະວີການແບ່ງປັນບົດຮຽນໃນການສ້າງກົດໝາຍ ແລະ ຫວັງວ່າ, ເຖິງວ່າຢູ່ໃນຖານະຕຳແໜ່ງໃດທ່ານເອກອັກຄະລັດຖະທູດ Yasuaki Tanizaki ກໍ່ເປັນຂົວເຊື່ອມຕໍ່ມິດຕະພາບ, ເພີ່ມພູນຄູນສ້າງໃຫ້ສາຍພົວພັນຮ່ວມມືອັນດີງາມລະຫວ່າງສອງປະເທດ.
ສ່ວນທ່ານເອກອັກຄະລັດຖະທູດ ຍີ່ປຸ່ນ Yasuaki Tanizaki ກໍ່ຢືນຢັນສືບຕໍ່ມີການປະກອບສ່ວນຢ່າງຕັ້ງໜ້າເຂົ້າໃນການເພີ່ມພູນຄູນສ້າງສາຍພົວພັນຮ່ວມມືມິດຕະພາບອັນດີງາມລະຫວ່າງສອງປະເທດ. ທ່ານຫວັງວ່າສະພາແຫ່ງຊາດ ແລະ ລັດຖະບານຫວຽດນາມ ຈະສືບຕໍ່ສ້າງເງື່ອນໄຂສະດວກເພື່ອໃຫ້ບັນດາໂຄງການຂອງຍີ່ປຸ່ນໄດ້ຜັນຂະຫຍາຍຢ່າງມີປະສິດທິຜົນຢູ່ຫວຽດນາມ