ທ່ານ Marty Natalegawa, ລັດຖະມົນຕີການຕ່າງປະເທດ
ອິນໂດເນເຊຍ
photo:thanhnien.vn
|
(vovworld)- ເມື່ອຕອບສຳພາດຕໍ່ນັກຂ່າວ“ວາລະສານ Wall Street Journal) ຂອງອາເມລິກາ ເມື່ອວັນທີ 20/5, ທ່ານ Marty Natalegawa, ລັດຖະມົນຕີການຕ່າງປະເທດ ອິນໂດເນເຊຍ ໄດ້ປະຕິເສດບັນດາທັດສະນະຊື່ງຝ່າຍຈີນຍົກອອກມາເພື່ອອະທິບາຍໃຫ້ການກະທຳປີ້ນຂັນໄດຢູ່ທະເລຕາເວັນອອກ ພ້ອມທັງໃຫ້ຮູ້ວ່າ: ອິນໂດເນເຊຍ ຈະແຊກແຊງຢ່າງແຮງກວ່າ ເພື່ອແກ້ໄຂສະພາບເຄ່ັງຕຶງຢູ່ທະເລຕາເວັນອອກ ພາຍຫລັງ ຈີນຕັ້ງຮ້ານເຈາະນ້ຳມັນຢ່າງຜິດກົດໝາຍຢູ່ເຂດທະເລຂອງຫວຽດນາມ. ຕາມທ່ານ Marty Natalegawa ແລ້ວ, ຍາມໃດຈີນກໍມີແຜນນະໂຍບາຍແກ້ໄຂຄວາມຂັດແຍ້ງຢູ່ທະເລຕາເວັນອອກ ບົນພື້ນຖານສອງຝ່າຍ ແລະ ລົບລ້າງການແຊກແຊງຂອງຝ່າຍທີ 3. ເຖິງຢ່າງໃດກໍຕາມ, ຄວາມເຄັ່ງຕຶງປະຈຸບັນລະຫວ່າງຫວຽດນາມ ແລະ ຈີນ ບໍ່ພຽງແຕ່ແມ່ນບັນຫາສອງຝ່າຍເທົ່ານັ້ນ ຫາກຍັງແມ່ນບັນຫາຂອງພາກພື້ນ, ສະນັ້ນ ອາຊຽນ ມີຄວາມຮັບຜິດຊອບພິເສດ ເພື່ອຮັບປະກັນໃຫ້ສອງຝ່າຍເຈລະຈາເພື່ອແກ້ໄຂສະພາບການ. ທ່ານຢືນຢັນວ່າ: ການກະທຳຂອງຈີນ ແມ່ນລະເມີດຖະແຫລງການກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກ(DOC), ໃນຂະນະທີ່ປັກກີງປະຕິບັດຄຳໝັ້ນສັນຍາປະຕິບັດຖະແຫລງການດັ່ງກ່າວເປັນປະຈຳ.
ເມື່ອຕອບສຳພາດຕໍ່ກຸ່ມບໍລິສັດສື່ສານ Nikkei, ທ່ານນາຍົກລັດຖະມົນຕີ ສິງກະໂປ ຫລີຊຽງຫລົງ ຖືວ່າ: ບັນຫາທະເລຕາເວັນອອກ ແມ່ນຫນ່ຶງໃນບັນດາບັນຫາໃນການພົວພັນລະຫວ່າງ ຈີນ ແລະ ອາຊຽນ, ເພາະວ່າ ອາຊຽນ ກໍ່ມີຜົນປະໂຫຍດຈາກຄວາມໝັ້ນຄົງຂອງພາກພື້ນ ແລະ ອາຊຽນ ພວມປຶກສາຫາລືປະມວນຂໍ້ກຳນົດການປະພຶດຢູ່ທະເລຕາເວັນອອກ (COC) ກັບຈີນ. ສະນັ້ນ ອາຊຽນ ຈະແຊກແຊງເຂົ້າບັນຫາທະເລຕາເວັນອອກ ແລະ ຈະພະຍາຍາມຈົນສຸດຄວາມສາມາດຂອງຕົນເພື່ອໃຫ້ບັນຫານີ້ບໍ່ສົ່ງຜົນສະທ້ອນເຖິງການພົວພັນລະຫວ່າງ ອາຊຽນ ແລະ ຈີນ.
ກ່ຽວກັບບັນຫານີ້, ລັດຖະບານ ມາເລເຊຍ ສະແດງຄວາມວິຕົກກັງວົນຢ່າງເລິກເຊິ່ງຕໍ່ການຜັນແປໃນໄລຍະມໍ່ໆມານີ້ຢູ່ທະເລຕາເວັນອອກ ພ້ອມທັງເນັ້ນຫນັກວ່າ:ຈຳເປັນຕ້ອງຍູ້ໄວວິວັດການເຈລະຈາເພື່ອບັນລຸປະມວນຂໍ້ກຳນົດການປະພຶດຂອງບັນດາຝ່າຍຢູ່ທະເລຕາເວັນອອກ.