ການນຳປະເທດອາຊຽນສືບຕໍ່ສະແດງຄວາມວິຕົກກັງວົນຢ່າງເລິກເຊິ່ງຕໍ່ສະພາບການຢູ່ທະເລຕາເວັນອອກ
ທ່ານນາຍົກລັດຖະມົນຕີ ຫວຽດນາມ ຫງວຽນຊວນຟຸກ
ເຂົ້າຮ່ວມ ກອງປະຊຸມສຸດຍອດ ອາຊຽນ ຄັ້ງທີ 28 – 29
(vovworld) - ໃນຂອບເຂດກອງປະຊຸມສຸດຍອດ ອາຊຽນ ຄັ້ງທີ 28 – 29 ແລະ ບັນດາກອງປະຊຸມທີ່ກ່ຽວຂ້ອງ ເຊິ່ງຈັດຕັ້ງຢູ່ ສປປ.ລາວ. ຕອນບ່າຍວັນທີ 07/09, ກອງປະຊຸມໄດ້ອອກຖະແຫຼງການຂອງປະທານກອງປະຊຸມສຸດຍອດຄັ້ງທີ 28 – 29. ຖະແຫຼງການຢືນຢັນວ່າ ທີ່ບັນດາກອງປະຊຸມສຸດຍອດ ອາຊຽນ ຄັ້ງທີ 28 – 29, ການນຳບັນດາປະເທດ ອາຊຽນ ໄດ້ມີການແລກປ່ຽນຢ່າງກົງໄປກົງມາ ແລະ ສ້າງສັນກ່ຽວກັບການກຳນົດທິດໃນອະນາຄົດຂອງ ອາຊຽນ. ພິເສດ ເນື້ອໃນຖະແຫຼງການມີສ່ວນໜຶ່ງເວົ້າສະເພາະກ່ຽວກັບທະເລຕາເວັນອອກ, ບັນດາການນຳ ອາຊຽນ ຢືນຢັນຄືນໃໝ່ກ່ຽວກັບຄວາມຈຳເປັນຕ້ອງເພີ່ມທະວີຄວາມໄວ້ເນື້ອເຊື່ອໃຈ, ຄວາມລະງັບໃຈ ແລະ ຫລີກລ້ຽງບັນດາການກະທຳ ທີ່ອາດຈະເຮັດໃຫ້ສະພາບການສັບສົນຂຶ້ນຕື່ມ ແລະ ຕິດຕາມການແກ້ໄຂບັນດາການຂັດແຍ້ງກັນໂດຍສັນຕິພາບ ເໝາະສົມກັບກົດໝາຍສາກົນ; ເນັ້ນໜັກເຖິງຄວາມສຳຄັນຂອງເລື່ອງບໍ່ນຳໃຊ້ການທະຫານ ແລະ ລະງັບໃຈໃນທຸກການເຄື່ອນໄຫວ, ໃນນັ້ນ ມີເລື່ອງບູລະນະ, ຖົມດິນ, ອາດຈະເຮັດໃຫ້ສະພາບການສັບສົນ ແລະ ເພີ່ມຄວາມເຄັ່ງຄຶງຢູ່ທະເລຕາເວັນອອກຕື່ມອີກ; ເນັ້ນໜັກເຖິງຄວາມສຳຄັນຂອງເລື່ອງປະຕິບັດຖະແຫຼງການວ່າດ້ວຍການປະພຶດຂອງບັນດາຝ່າຍຢູ່ທະເລຕາເວັນອອກ (DOC) ຢ່າງຄົບຖ້ວນ ແລະ ມີປະສິດທິຜົນ. ບັນດາການນຳ ອາຊຽນ ກໍ່ຮຽກຮ້ອງທຸກຝ່າຍ ເຮັດວຽກຢ່າງຮີບດ່ວນ ເພື່ອແນໃສ່ບັນລຸກົດແຫ່ງການປະພຶດຂອງບັນດາຝ່າຍ (COC) ໃຫ້ມີປະສິດທິຜົນຢູ່ທະເລຕາເວັນອອກໂດຍໄວ. ບັນດາການນຳ ອາຊຽນ ກໍ່ເນັ້ນໜັກເຖິງຄວາມສຳຄັນຂອງເລື່ອງດຳເນີນບັນດາມາດຕະການສ້າງຄວາມໄວ້ເນື້ອເຊື່ອໃຈ ແລະ ການທູດປ້ອງກັນຕ້ານ ເພື່ອແນໃສ່ເພີ່ມທະວີຄວາມໄວ້ເນື້ອເຊື່ອໃຈລະຫວ່າງບັນດາຝ່າຍ; ຊົມເຊີຍເລື່ອງຮັບຮອງເອົາຖະແຫຼງການຮ່ວມຂອງບັນດາລັດຖະມົນຕີການຕ່າງປະເທດ 10 ປະເທດ ອາຊຽນ ແລະ ຈີນ ກ່ຽວກັບເລື່ອງປະຕິບັດ DOC ຢູ່ທະເລຕາເວັນອອກຢ່າງຄົບຖ້ວນ ແລະ ມີປະສິດທິຜົນ.