ການນຳພັກ, ລັດຕ້ອນຮັບນາຍົກລັດຖະມົນຕີ ສິງກະໂປ
(ພິທີຕ້ອນຮັບທ່ານນາຍົກລັດຖະມົນຕີ ສິງກະໂປ ຫຼີຊຽນຫຼົງ)
(vovworld) - ຕອນບ່າຍວັນທີ 23/03 ຢູ່ສຳນັກງານສູນກາງພັກກອມມູນິດ ຫວຽດນາມ, ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດ ຫວຽດນາມ ຫງວຽນຟູ໋ຈ້ອງ ໃຫ້ການຕ້ອນຮັບທ່ານນາຍົກລັດຖະມົນຕີ ສິງກະໂປ ຫຼີຊຽນຫຼົງ. ທ່ານເລຂາທິການໃຫຍ່ສະເໜີ ສິງກະໂປ ເພີ່ມທະວີການແບ່ງປັນບົດຮຽນ, ສ້າງເງື່ອນໄຂສະດວກໃຫ້ແກ່ວິສາຫະກິດ 2 ປະເທດຂຸດຄົ້ນຄວາມສາມາດບົ່ມຊ້ອນການຮ່ວມມືຢ່າງມີປະສິດທິຜົນ, ຍູ້ແຮງການພົບປະແລກປ່ຽນປະຊາຊົນ, ຮ່ວມມືການສຶກສາ ແລະ ສົມທົບກັນເປັນຢ່າງດີຢູ່ບັນດາເວທີປາໄສຫລາຍຝ່າຍໃນພາກພື້ນ, ສາກົນ, ພິເສດແມ່ນ ອາຊຽນ.
ແລະກໍ່ໃນວັນດຽວກັນ, ທີ່ການພົບປະກັບທ່ານນາຍົກລັດຖະມົນຕີ ສິງກະໂປ ຫຼີຊຽນຫຼົງ, ທ່ານນາງປະທານສະພາແຫ່ງຊາດ ຫວຽດນາມ ຫງວຽນທິກີມເງິນ ຢືນຢັນວ່າ: ການພົວພັນຮ່ວມມືລະຫວ່າງສະພາແຫ່ງຊາດ 2 ປະເທດໄດ້ພັດທະນາອັນດີງາມທັງ 2 ຝ່າຍ ແລະ ຫລາຍຝ່າຍ.
ເນື່ອງໃນໂອກາດທ່ານນາຍົກລັດຖະມົນຕີ ສິງກະໂປ ຫຼີຊຽນຫຼົງ ມາຢ້ຽມຢາມ ຫວຽດນາມ ຢ່າງເປັນທາງການຕາມຄຳເຊີນຂອງທ່ານນາຍົກລັດຖະມົນຕີ ຫວຽດນາມ ຫງວຽນຊວນຟຸກ ແຕ່ວັນທີ 21 – 24/03. 2 ຝ່າຍໄດ້ອອກຖະແຫຼງການຮ່ວມ ຫວຽດນາມ - ສິງກະໂປ. ຖະແຫຼງການຮ່ວມຊີ້ແຈ້ງວ່າ: ທີ່ບັນດາການພົບປະລະຫວ່າງການນຳພັກ, ລັດ, ລັດຖະບານ ຫວຽດນາມ ແລະ ທ່ານນາຍົກລັດຖະມົນຕີ ສິງກະໂປ ຫຼີຊຽນຫຼົງ, 2 ຝ່າຍໄດ້ແລກປ່ຽນຢ່າງເລິກເຊິ່ງກ້ວາງຂວາງກ່ຽວກັບບັນດາບັນຫາ 2 ຝ່າຍໃນພາກພື້ນ ແລະ ສາກົນຊຶ່ງຕ່າງຝ່າຍຕ່າງມີຄວາມສົນໃຈ. ການນຳ ຫວຽດນາມ ແລະ ສິງກະໂປ ຊົມເຊີຍການພັດທະນາຢ່າງແຮງຂອງການພົວພັນຮ່ວມມືດ້ານການຄ້າ, ການລົງທຶນ ແລະ ເສດຖະກິດລະຫວ່າງ 2 ປະເທດ. ເມື່ອເວົ້າເຖິງສິ່ງທ້າທາຍປ້ອງກັນຄວາມສະຫງົບລວມ, ທ່ານນາຍົກລັດຖະມົນຕີ ຫຼີຊຽນຫຼົງ ຢັ້ງຢືນຄືນໃໝ່ການສະໜັບສະໜູນ ຫວຽດນາມ ຈັດຕັ້ງກອງປະຊຸມເຈົ້າໜ້າທີ່ອາວຸໂສ ອາຊຽນ ກ່ຽວກັບບັນຫາຢາເສບຕິດຄັ້ງທີ 38 ໃນປີ 2017 ແລະ ກອງປະຊຸມລັດຖະມົນຕີ ອາຊຽນ ກ່ຽວກັບບັນຫາຢາເສບຕິດຄັ້ງທີ 6 ໃນປີ 2018. ນາຍົກລັດຖະມົນຕີ 2 ທ່ານໄດ້ຢືນຢັນຄືນໃໝ່ກ່ຽວກັບຄຳໝັ້ນສັນຍາການຄ້າເສລີ ແລະ ສືບຕໍ່ເຂົ້າຮ່ວມປະກອບຂໍ້ລິເລີ່ມໃນພາກພື້ນ; ພ້ອມທັງ 2 ປະເທດຈະສືບຕໍ່ສົມທົບກັນ ແລະ ກັບບັນດາປະເທດສະມາຊິກອື່ນໆຢ່າງແໜ້ນແຟ້ນ ເພື່ອແນໃສ່ຊອກຫາມາດຕະການໃຫ້ແກ່ສັນຍາຄູ່ຮ່ວມມືຂ້າມປາຊີຟິກ (TPP). 2 ຝ່າຍຢືນຢັນຄວາມສຳຄັນຂອງການຮັກສາສັນຕິພາບ, ສະຖຽນລະພາບໃນພາກພື້ນ ແລະ ເຄົາລົບການເສລີໃນການເດີນທະເລ ແລະ ການບິນຢູ່ທະເລຕາເວັນອອກ; ຢັ້ງຢືນຄືນໃໝ່ເລື່ອງສະໜັບສະໜູນການປະຕິບັດຖະແຫຼງການກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກ (DOC) ຢ່າງຄົບຖ້ວນ ແລະ ມີປະສິດທິຜົນ ແລະ ສຳເລັດກອບກົດແຫ່ງການປະພຶດ (COC) ເພື່ອສ້າງເງື່ອນໄຂບັນລຸ COC ໂດຍໄວ.