ທ່ານເລຂາທິການໃຫຍ່, ປະທານປະເທດ ໂຕເລິມ ທີ່ການຖະແຫຼງຂ່າວ (ພາບ: VOV)

ວັນທີ 3 ສິງຫາ, ໂດຍຕາງໜ້າຄະນະບໍລິຫານງານສູນກາງພັກປະຊາຊົນປະຕິວັດລາວ, ໃນນາມສ່ວນຕົວ, ທ່ານເລຂາທິການໃຫຍ່, ປະທານປະເທດລາວ, ທອງລຸນ ສີສຸລິດ ໄດ້ສົ່ງຈົດໝາຍອວຍພອນທ່ານເລຂາທິການໃຫຍ່, ປະທານປະເທດໂຕເລິມ. ຈົດໝາຍໄດ້ເນັ້ນໜັກວ່າ ເລື່ອງທ່ານປະທານປະເທດ ໂຕເລິມ ຮັບດຳລົງຕຳແໜ່ງສຳຄັນນີ້ສະແດງໃຫ້ເຫັນຄວາມໄວ້ເນື້ອເຊື່ອໃຈ ແລະ ການຕີລາຄາສູງຂອງພັກ, ລັດ ແລະ ປະຊາຊົນ ຫວຽດນາມ; ເຊື່ອໝັ້ນວ່າ ພາຍໃຕ້ການຊີ້ນຳອັນຖືກຕ້ອງ, ສະຫຼາດສ່ອງໄສ ຂອງພັກກອມມູນິດ ຫວຽດນາມ ໂດຍທ່ານເລຂາທິການໃຫຍ່, ປະທານປະເທດ ໂຕເລິມນຳໜ້າ, ປະຊາຊົນ ຫວຽດນາມອ້າຍນ້ອງຈະສືບຕໍ່ບັນລຸໄດ້ຜົນສຳເລັດອັນຍິ່ງໃຫຍ່ກ່ວາອີກໃນພາລະກິດແຫ່ງການປ່ຽນແປງໃໝ່, ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XIII ຂອງພັກກອມມູນິດ ຫວຽດນາມ ຢ່າງມີໄຊ.

ທ່ານເລຂາທິການໃຫຍ່, ປະທານປະເທດ ລາວ ທອງລຸນ ສີສຸລິດ ໄດ້ຢັ້ງຢືນຈະຮຽງບ່າຮຽງໄຫຼ່ກັບບັນດາການນຳພັກ, ລັດ ຫວຽດນາມ ສືບຕໍ່ປັບປຸງ ແລະ ເພີ່ມພູນຄູນສ້າງການພົວພັນມິດຕະພາບອັນຍິ່ງໃຫຍ່ ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລາວ - ຫວຽດນາມ, ຫວຽດນາມ - ລາວ ໃຫ້ນັບມື້ນັບພັດທະນາ, ເຂົ້າສູ່ລວງເລິກ, ມີປະສິດທິຜົນໃນທຸກຂົງເຂດ.

ແລະກໍ່ໃນໂອກາດນີ້, ທ່ານປະທານພັກປະຊາຊົນ ກຳປູເຈຍ Hun Sen ໄດ້ສົ່ງສານອວຍພອນ, ໃນສານທ່ານ Hun Sen ເນັ້ນໜັກວ່າເລື່ອງທ່ານປະທານປະເທດ ຫວຽດນາມ ໂຕເລິມໄດ້ຮັບການເລືອກຕັ້ງດຳລົງຕຳແໜ່ງເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດ ຫວຽດນາມເປັນການສະແດງໃຫ້ເຫັນຄວາມເຊື່ອໝັ້ນຂອງພັກກອມມູນິດ ຫວຽດນາມ ແລະ ປະຊາຊົນ ຫວຽດນາມ ຕໍ່ຄວາມສາມາດ ແລະ ການຊີ້ນຳຢ່າງສະຫຼາດສ່ອງໄສຂອງທ່ານເລຂາທິການໃຫຍ່, ປະທານປະເທດ ໂຕເລິມ.