(vovworld) - ການປູກຕົ້ນໄມ້ໃນຊຸມວັນບຸນເຕັດ, ຕ້ອນຮັບລະດູບານໃໝ່ໄດ້ກາຍເປັນປະເພນີ, ຈຸດດີງາມດ້ານວັດທະນະທຳໃນຊີວິດການເປັນຢູ່ຂອງປະຊາຊົນ ຫວຽດນາມ. ຕອນເຊົ້າວັນທີ 7/2, ກົງກັບວັນທີ 8 ບຸນເຕັດ ປີມະເມຍ 2014, ທ່ານປະທານປະເທດ ເຈືອງເຕີນຊາງ ພ້ອມກັບຜູ້ຕາງໜ້າການນຳບັນດາກະຊວງ, ຂະແໜງການຂັ້ນສູນກາງ, ທ້ອງຖີ່ນຕ່າງໆ ແລະ ປະຊາຊົນແຂວງ ແທງຮ໋ວາ ໄດ້ເຂົ້າຮ່ວມເປັນຈຳນວນຫຼວງຫຼາຍ ແລະ ປຸກລະດົມວັນບຸນປູກຕົ້ນໄມ້ ປີ 2014 ສະແດງຄວາມຮູ້ບຸນຄຸນປະທານ ໂຮ່ຈີມິນ ຕະຫຼອດກາລະນານ.
ທ່ານປະທານປະເທດ ເຈືອງເຕີນຊາງ ເນັ້ນໜັກເລື່ອງປູກຕົ້ນໄມ້ ແລະ ປົກປັກຮັກສາປ່າໄດ້ກາຍເປັນໜ້າທີ່ຮີບດ່ວນໃນຕໍ່ໜ້າ, ທັງມີຄວາມໝາຍຍຸດທະສາດທີ່ຍາວນານສຳລັບ ຫວຽດນາມ, ເຊິ່ງແມ່ນປະເທດຮັບຜົນສະທ້ອນຢ່າງໜັກໜ່ວງຈາກການປ່ຽນແປງຂອງດິນຟ້າອາກາດ. ທ່ານປະທານປະເທດ ເຈືອງເຕີນຊາງ ເວົ້າວ່າ:
“ຂ້າພະເຈົ້າຮຽກຮ້ອງໃຫ້ພໍ່ແມ່ພີ່ນ້ອງຈົ່ງຕັ້ງໜ້າຕອບສະໜອງ, ເຂົ້າຮ່ວມຂະບວນການ “ປູກຕົ້ນໄມ້ສະແດງຄວາມຮູ້ບຸນຄຸນລຸງໂຮ່ຕະຫຼອດກາລະນານ”, ເລືອກເຟັ້ນແນວປູກທີ່ເໝາະສົມກັບດິນຟ້າອາກາດຂອງແຕ່ລະເຂດ... ຈົ່ງຕັ້ງໜ້າເຂົ້າຮ່ວມການປູກປ່າ ແລະ ປົກປັກຮັກສາປ່າ, ເດັດດຽວສະກັດກັ້ນການຕັດໄມ້ທຳລາຍປ່າ, ກໍ່ໃຫ້ເກີດໄພໄຟໄໝ້ປ່າ, ປົກປັກຮັກສາຊີວະນາໆພັນ, ປະຕິບັດຄຳສັ່ງສອນຂອງລຸງໂຮ່ທີ່ວ່າ “ລະດູບານໃໝ່ແມ່ນວັນບຸນປູກຕົ້ນໄມ້, ເຮັດໃຫ້ປະເທດຊາດນັບມື້ນັບຂຽວສົດງົດງາມ””
ກໍ່ໃນຕອນເຊົ້າວັນດຽວກັນ, ທ່ານນາງຮອງປະທານສະພາແຫ່ງຊາດ ຕ່ອງທິຟ໋ອງ ໄດ້ເຂົ້າຮ່ວມພິທີປຸກລະດົມວັນບຸນ ປູກຕົ້ນໄມ້ຢູ່ແຂວງ ຮ່ວາບີ່ງ. ນະພິທີ, ທ່ານນາງຮອງປະທານສະພາແຫ່ງຊາດ ຕອງທິຟ໋ອງ ສະເໜີໃຫ້ຄະນະພັກ, ອຳນາດການປົກຄອງຂັ້ນຕ່າງໆ, ບັນດາຂະແໜງການ ແລະ ປະຊາຊົນໃນແຂວງຈົ່ງຕອບສະໜອງ ແລະ ເຂົ້າຮ່ວມຂະບວນການປູກຕົ້ນໄມ້, ປູກປ່າ ແລະ ປົກປັກຮັກສາປ່າຢ່າງຕັ້ງໜ້ານຳຂະບວນການພັດທະນາຢ່າງແຮງ, ກ້ວາງຂວາງ, ກາຍເປັນຈຸດວັດທະນະທຳທີ່ເປັນມູນເຊື້ອອັນດີງາມຂອງບັນດາເຜົ່າໃນແຂວງ.