(vovworld) – ໂທລະເລກສະແດງຄວາມເສົ້າສະລົົດໃຈຂອງຄະນະບໍລິຫານງານສູນກາງພັກກອມມູນິດ ຫວຽດນາມ, ປະທານປະເທດ, ສະພາແຫ່ງຊາດ, ລັດຖະບານ ສສ. ຫວຽດນາມ ສົ່ງເຖິງການນຳ ສປປ. ລາວ ພາຍຫຼັງໄດ້ຮັບຂ່າວວ່າ ການນຳຂັ້ນສູງຂອງພັກ ແລະ ລັດຖະບານແຫ່ງ ສປປ ລາວ ບາງທ່ານຖືກເສຍຊີວິດໃນການເດີນທາງໄປປະຕິບັດງານໃນວັນທີ 17/5. ໂທລະເລກໄດ້ຢືນຢັນວ່າ: ນີ້ແມ່ນຄວາມເສຍຫາຍອັນຍິ່ງໃຫຍ່ຂອງພັກ, ລັດ, ສະພາແຫ່ງຊາດ ແລະ ລັດຖະບານແຫ່ງ ສປປ ລາວ . ການນຳ ແລະ ປະຊາຊົນ ຫວຽດນາມ ໄດ້ສູນເສຍບັນດາສະຫາຍ, ເພື່ອນມິດທີ່ສະໜິດສະໜົມ, ຍາມໃດກໍ່ເອົາໃຈໃສ່ ແລະ ຕັ້ງໜ້າປະກອບສ່ວນເຂົ້າໃນການປັບປຸງ ແລະ ພັດທະນາການພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ ຫວຽດນາມ - ລາວ.
ຫວຽດນາມ ເຊື່ອໝັ້ນວ່າ: ພັກ, ລັດ ແລະ ປະຊາຊົນ ລາວ ຈະຜ່ານຜ່າຄວາມເຈັບປວດ, ຄວາມເສຍຫາຍອັນໃຫຍ່ຫຼວງນີ້, ສືບຕໍ່ພາລະກິດກໍ່ສ້າງ, ປົກປັກຮັກສາ ແລະ ພັດທະນາປະເທດຊາດ.
ເຫດເຮືອບິນຕົກເມື່ອວັນທີ 17/5, ໄດ້ເຮັດໃຫ້ທ່ານ ດວງໃຈ ພິຈິດ, ກຳມະການກົມການເມືອງ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ, ທ່ານ ທອງບັນ ແສງອາພອນ, ເລຂາສູນກາງພັກ, ລັດຖະມົນຕີກະຊວງປ້ອງກັນຄວາມສະຫງົບ, ທ່ານ ເຈືອງ ສົມບູນຂັນ, ເລຂາສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ ພ້ອມກັບພະນັກງານບາງທ່ານຖືກເສຍຊີວິດ.