ການນຳຫວຽດນາມໃຫ້ການຕ້ອນຮັບລັດຖະມົນຕີການຕ່າງປະເທດຍີ່ປຸ່ນ
ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດຫວຽດນາມ ຟ້າມບິ່ງມິງ
ແລະ ທ່ານ ລັດຖະມົນຕີການຕ່າງປະເທດຍີ່ປຸ່ນ Fumio Kishida
(ພາບອິນເຕີແນດ)
(vovworld) - ຕອນເຊົ້າວັນທີ 1/8/2014, ຢູ່ຮ່າໂນ້ຍ, ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດຫວຽດນາມ ຟ້າມບິ່ງມິງ ແລະ ທ່ານ ລັດຖະມົນຕີການຕ່າງປະເທດຍີ່ປຸ່ນ Fumio Kishida ໄດ້ເປັນປະທານຮ່ວມການປະຊຸມຄະນະກຳມະການຮ່ວມມືຫວຽດນາມ - ຍີ່ປຸ່ນ ຄັ້ງທີ 6. ກ່ອນໜ້ານັ້ນ, ທ່ານ ຮອງນາຍົກລັດຖະມົນຕີ. ລັດຖະມົນຕີ ຟ້າມບິ່ງມິງ ໄດ້ມີການເຈລະຈາກັບທ່ານລັດຖະມົນຕີ Fumio Kishida. ທ່ານ ຮອງນາຍົກລັດຖະມົນຕີ. ລັດຖະມົນຕີ ຟ້າມບິ່ງມິງ ຢືນຢັນວ່າ, ຫວຽດນາມຖືຍີ່ປຸ່ນແມ່ນໜຶ່ງໃນບັນດາຄູ່ຮ່ວມມືຍຸດທະສາດສຳຄັນອັນດັບໜຶ່ງຂອງຫວຽດນາມ. ສ່ວນ ທ່ານລັດຖະມົນຕີ Fumio Kishida ກໍ່ເນັ້ນໜັກເຖິງຄວາມຕັດສິນໃຈຂອງຍີ່ປຸ່ນໃນການຊຸກຍູ້ການພົວພັນຄູ່ຮ່ວມມືຍຸດທະສາດຢ່າງເລິກເຊິ່ງ, ກວ້າງຂວາງກັບຫວຽດນາມ ໃຫ້ນັບມື້ນັບຮອບດ້ານ ແລະ ແທດຈິງ. ທ່ານກໍ່ໄດ້ຢືນຢັນວ່າ, ຍີ່ປຸ່ນຖືຫວຽດນາມແມ່ນຄູ່ຮ່ວມມືອັນດັບໜຶ່ງກ່ຽວກັບ ODA ແລະ ລັດຖະບານຍີ່ປຸ່ນສືບຕໍ່ຮັກສາລະດັບ ODA ສູງສຸດໃຫ້ແກ່ຫວຽດນາມ. ສ່ວນ ທ່ານ ຮອງນາຍົກລັດຖະມົນຕີ. ລັດຖະມົນຕີ ຟ້າມບິ່ງມິງ ກໍ່ຢືນຢັນເຖິງຄວາມຕັດສິນໃຈຂອງລັດຖະບານຫວຽດນາມ ໃນການນຳໃຊ້ແຫຼ່ງທຶນ ODA ຂອງຍີ່ປຸ່ນຢ່າງມີປະສິດທິຜົນ ເພື່ອປະກອບສ່ວນຢ່າງແທດຈິງເຂົ້າໃນພາລະກິດພັດທະນາເສດຖະກິດສັງຄົມຂອງຫວຽດນາມ.
ທ່ານ ຮອງນາຍົກລັດຖະມົນຕີ. ລັດຖະມົນຕີ ຟ້າມບິ່ງມິງ ແລະ ທ່ານລັດຖະມົນຕີ Fumio Kishida ກໍ່ໄດ້ແລກປ່ຽນຄວາມເຫັນ ແລະ ເຫັນດີເພີ່ມທະວີການຮ່ວມມືລະຫວ່າງສອງປະເທດກ່ຽວກັບບັນດາບັນຫາພາກພື້ນ ແລະ ສາກົນເຊິ່ງທັງສອງຝ່າຍມີຄວາມສົນໃຈ.
ໃນຕອນບ່າຍວັນດຽວກັນ, ທີ່ສຳນັກງານສູນກາງພັກ, ທ່ານ ໂຕຮູຍເຮື໋ອ, ກຳມະການກົມການເມືອງ, ຫົວໜ້າຄະນະຈັດຕັ້ງສູນກາງ, ປະທານກຸ່ມສະມາຊິກມິດຕະພາບ ຫວຽດນາມ - ຍີ່ປຸ່ນ ໄດ້ໃຫ້ການຕ້ອນຮັບທ່ານລັດຖະມົນຕີກະຊວງການຕ່າງປະເທດ ຍີ່ປຸ່ນ Fumio Kishida ພວມຢູ່ຢ້ຽມຢາມ ຫວຽດນາມ ຢ່າງເປັນທາງການ.
ທີ່ການຕ້ອນຮັບ, ທ່ານ ໂຕຮູຍເຮື໋ອ ຢືນຢັນວ່າ: ພັກ, ລັດຖະບານ, ສະພາແຫ່ງຊາດ ແລະ ປະຊາຊົນ ຫວຽດນາມ ຖືເປັນສຳຄັນ ແລະ ປາດຖະໜາຢາກເຮັດໃຫ້ການພົວພັນມິດຕະພາບ ແລະ ການຮ່ວມມືກັບ ຍີ່ປຸ່ນເລິກເຊິ່ງກ່ວາອີກ, ພ້ອມທັງສະແດງຄວາມເພິ່ງພໍໃຈຕໍ່ການພັດທະນາອັນດີງາມ, ແຂງແຮງຂອງການພົວພັນລະຫວ່າງ 2 ປະເທດໃນໄລຍະຜ່ານມາເຊິ່ງພົ້ນເດັ່ນແມ່ນການນຳ 2 ປະເທດໄດ້ເຫັນດີເປັນເອກະສັນຍົກລະດັບການພົວພັນຂຶ້ນເປັນ “ຄູ່ຮ່ວມມືຍຸດທະສາດຢ່າງເລິກເຊິ່ງ, ກ້ວາງຂວາງ ເພື່ອສັນຕິພາບ ແລະ ຄວາມວັດທະນາຖາວອນຢູ່ພາກພື້ນ ອາຊີ” ໃນການຢ້ຽມຢາມ ຍີ່ປຸ່ນ ທາງລັດຖະກິດຂອງທ່ານປະທານປະເທດ ຫວຽດນາມ ເຈືອງເຕີນຊາງ ໃນເດືອນ 3/2014. ທ່ານ ໂຕຮູຍເຮື໋ອ ກໍ່ຂອບອົກຂອບໃຈ ແລະ ຕີລາຄາສູງນ້ຳໃຈອັນດີງາມ ແລະ ບັນດາການປະກອບສ່ວນຕັ້ງໜ້າຂອງທ່ານ Kishida ສຳລັບປະເທດຊາດ ແລະ ປະຊາຊົນ ຫວຽດນາມ ໃນການເພີ່ມທະວີ, ປັບປຸງການພົວພັນ ຫວຽດນາມ - ຍີ່ປຸ່ນ ໃນຖານະເປັນລັດຖະມົນຕີການຕ່າງປະເທດ ກໍ່ຄືການນຳພັນທະພາບມິດຕະພາບ ຍີ່ປຸ່ນ - ຫວຽດນາມ.
ທ່ານລັດຖະມົນຕີກະຊວງການຕ່າງປະເທດ ຍີ່ປຸ່ນ Fumio Kishida ຢືນຢັນວ່າ: ລັດຖະບານ ຍີ່ປຸ່ນຖື ຫວຽດນາມ ແມ່ນຄູ່ຮ່ວມມືສຳຄັນ ແລະ ໃຫ້ຄຳໝັ້ນສັນຍາສືບຕໍ່ໜູນຊ່ວຍ ຫວຽດນາມ ພັດທະນາເສດຖະກິດ - ສັງຄົມຜ່ານການສະໜອງ ODA ໃນລະດັບສູງ.