ການນຳແນວໂຮມປະເທດ ຊາດຫວຽດນາມຕ້ອນຮັບ ຄະນະສະພາບັນດາ ການນຳການເມືອງໜຸ່ມອາເມລິກາ
(ພາບ: vov)
(vovworld)- ຕອນເຊົ້າວັນທີ 14/11, ຢູ່ຮ່າໂນ້ຍ, ທ່ານຫງວຽນວັນຟາ, ຮອງປະທານສູນກາງແນວໂຮມປະເທດຊາດຫວຽດນາມ ໄດ້ໃຫ້ການຕ້ອນຮັບຄະນະຜູ້ແທນສະພາບັນດາການນຳການເມືອງໜຸ່ມອາເມລິກາ ມາຢ້ຽມຢາມຫວຽດນາມ ແລະ ໄປຢ້ຽມຢາມ, ຊອກຮູ້ກ່ຽວກັບຄະນະກຳມະການສູນກາງແນວໂຮມປະເທດຊາດຫວຽດນາມ.
ນະທີ່ນີ້, ທ່ານຫງວຽນວັນຟາ ສະເໜີໃຫ້ສະພາບັນດາການນຳການເມືອງໜຸ່ມອາເມລິກາ ຈົ່ງເພີ່ມທະວີການພົວພັນກັບສະຫະພັນບັນດາອົງການຈັດຕັ້ງມິດຕະພາບຫວຽດ ນາມ, ສະມາຄົມມິດຕະພາບຫວຽດນາມ-ອາເມລິກາ ແລະ ບັນດາອົງການສະມາຊິກຂອງແນວໂຮມປະເທດຊາດຫວຽດນາມ. ຄຽງຄູ່ກັນນັ້ນຕ້ອງເພີ່ມທະວີການແລກປ່ຽນຄະນະຜູ້ແທນ, ການຮ່ວມມືລະຫວ່າງສະພາບັນດາການນຳການເມືອງໜຸ່ມອາເມລິກາ ກັບບັນດາອົງການຈັດຕັ້ງສະມາຊິກຂອງແນວໂຮມ, ຜ່ານນັ້ນ, ເພີ່ມທະວີຄວາມເຂົ້າອົກເຂົາໃຈຊື່ງກັນ ແລະ ກັນລະຫວ່າງສອງປະເທດ ແລະ ປຊຊ ສອງປະເທດ, ໂດຍສະເພາະແມ່ນລຸ້ນໜຸ່ມ.
ຕາງໜ້າໃຫ້ສະພາບັນດາການນຳການເມືອງໜຸ່ມອາເມລິກາ, ທ່ານ Pater Newwell ສະມາຊິກພັກປະຊາທິປະໄຕ, ຮອງປະທານບໍລິສັດລົງທຶນພະຈົນໄພ Chicago ສາຂາ Sanbox ຫວັງວ່າ, ສະພາບັນດາການນຳການເມືອງໜຸ່ມອາເມລິກາ ຈະແມ່ນຂົວຕໍ່ແນະນຳບັນດາອົງການຈັດຕັ້ງຂອງອາເມລິກາ ກັບສູນກາງແນວໂຮມປະເທດຊາດຫວຽດນາມ, ເປັນຂົວຕໍ່ຊຸກນູ້ການພົວພັນແລກປ່ຽນມິດຕະພາບປະຊາຊົນສອງປະເທດ./.