(vovworld) – ຕອນບ່າຍວັນທີ 1/4, ຢູ່ນະຄອນ ເປີໄລກູ, ແຂວງ ຢາລາຍ, ຄະນະຊີ້ນຳເຂດ ໄຕງວຽນ ໄດ້ສົມທົບກັບກະຊວງແຜນການ ແລະ ການລົງທຶນ, ທະນາຄານແຫ່ງລັດ ຫວຽດນາມ ແລະ ຄະນະກຳມະການປະຊາຊົນແຂວງ ຢາລາຍ ຈັດຕັ້ງການປະຊຸມຂ່າວ ກ່ຽວກັບການຈັດຕັ້ງກອງປະຊຸມສົ່ງເສີມການລົງທຶນຢູ່ເຂດໄຕງວຽນ ຄັ້ງທີ 2, ປີ 2013. ກອງປະຊຸມຈະໄດ້ຮັບການຈັດຕັ້ງໃນວັນທີ 12/4, ດ້ວຍການເຂົ້າຮ່ວມຂອງຜູ້ແທນກ່ວາ 500 ທ່ານເຊິ່ງຕາງໜ້າໃຫ້ການນຳພັກ, ລັດ, ບັນດາກະຊວງ, ຂະແໜງການຂັ້ນສູນກາງ, ການນຳແຂວງ, ນະຄອນຕ່າງໆ, ບັນດາອົງການຈັດຕັ້ງທັງຢູ່ພາຍໃນ ແລະ ຕ່າງປະເທດ ພ້ອມກັບນັກລົງທຶນທີ່ພວມສົນໃຈເຖິງ ໄຕງວຽນ. ທ່ານ ເຈີນວຽດຮູ່ງ, ຮອງຫົວໜ້າຄະນະຊີ້ນຳເຂດໄຕງວຽນ, ໃຫ້ຮູ້ວ່າ:
“ຈຸດໃໝ່ຂອງກອງປະຊຸມສົ່ງເສີມການລົງທຶນຄັ້ງນີ້ແມ່ນການສະແດງຄຳໝັ້ນສັນຍາຢ່າງແໜ້ນແຟ້ນຂອງບັນດາອົງການຂັ້ນສູນກາງ ແລະ ທ້ອງຖິ່ນໃນການຮັກສາ, ຊຸກຍູ້ການເຄື່ອນໄຫວລົງທຶນເຂົ້າເຂດ ໄຕງວຽນ ຢ່າງມີປະສິດທິຜົນ ແລະ ຕໍ່ເນື່ອງ. ສະແດງການໜູນຊ່ວຍຢ່າງສູງຂອງທະນາຄານແຫ່ງລັດ ແລະ ກະຊວງແຜນການ ແລະ ການລົງທຶນ ກ່ຽວກັບການລະດົມ, ຈັດແບ່ງທຶນ, ດັດປັບທຶນໃຫ້ບັນດາການເຄື່ອນໄຫວລົງທຶນພາກລັດ, ຊຸກຍູ້ການລົງທຶນພາກເອກະຊົນ. ໃຫ້ຄຳໝັ້ນສັນຍາປັບປຸງນະໂຍບາຍ ແລະ ສະພາບແວດລ້ອມແຫ່ງການລົງທຶນທີ່ສະດວກໃຫ້ບັນດານັກລົງທຶນ”