ທ່ານ Vũ Đức Đam ກ່າວຄວາມເຫັນທີ່ການປະຊຸມຂ່າວ
(ພາບ: VGP/Nhật Bắc)
(vovworld) - ລັດຖະບານຢືນຢັນຈະຄຸ້ມຄອງບັນດາກຸ່ມບໍລິສັດ, ບໍລິສັດໃຫຍ່ໃນວິວັດແຫ່ງການຈັດຕັ້ງ, ສັບຊ້ອນ, ປ່ຽນໃໝ່ການເຄື່ອນໄຫວຢ່າງແໜ້ນແຟ້ນ. ທ່ານ Vu Duc Dam ລັດຖະມົນຕີ, ຫົວໜ້າຫ້ອງວ່າການລັດຖະບານຫວຽດນາມ ໄດ້ແຈ້ງຄືດັ່ງກ່າວໃນການປະຊຸມຂ່າວກອງປະຊຸມນັດສາມັນປະຈຳເດືອນ 10/2012. ທ່ານລັດຖະມົນຕີ Vu Duc Dam ຢືນຢັນວ່າ ກຸ່ມບໍລິສັດ ແລະ ບໍລິສັດໃຫຍ່ 21 ແຫ່ງຈະບໍ່ຖືກຢຸດຕິການເຄື່ອນໄຫວ ຫາກໄດ້ຮັບການສັບຊ້ອນຄືນໃໝ່, ກຸ່ມບໍລິສັດອາດຈະຮັກສາຮູບແບບຂອງກຸ່ມບໍລິສັດ ຫຼືຫັນເປັນບໍລິສັດໃຫຍ່. ຄຽງຂ້າງນັ້ນ, ບັນດາວິສາຫະກິດທີ່ໄດ້ຮັກສາຮູບແບບກຸ່ມບໍລິສັດກໍ່ຕ້ອງສ້າງໂຄງປະກອບຄືນໃໝ່, ໂດຍສຸມໃສ່ບັນດາຂະແໜງອາຊີບຕົ້ນຕໍ, ຂອບຂະໜາດເຄື່ອນໄຫວເໝາະສົມກັບຄວາມສາມາດດ້ານການເງິນ, ການບໍລິຫານ ແລະ ຕະຫຼາດ.
ກ່ຽວກັບບັນຫາໜີ້ເສຍ, ທ່ານລັດຖະມົນຕີ Vu Duc Dam ເນັ້ນໜັກວ່າ ລັດຖະບານມອບໃຫ້ທະນາຄານແຫ່ງລັດສ້າງແຜນຮ່າງສັງລວມກ່ຽວກັບການແກ້ໄຂໜີ້ເສຍ, ມີຫຼາຍມາດຕະການແກ້ໄຂໜີ້ເສຍໄດ້ຮັບການຜັນຂະຫຍາຍກ່ອນທີ່ມີແຜນຮ່າງແລ້ວ. ທ່ານໃຫ້ຮູ້ວ່າ, ທະນາຄານແຫ່ງລັດຫວຽດນາມ ພວມສ້າງແຜນຮ່າງກ່ຽວກັບຂອບຂະໜາດລະອຽດຂອງບໍລິສັດ ແລະ ບັນດາແຫຼ່ງທຶນລະດົມ, ແຕ່ລັດຈະບໍ່ນຳໃຊ້ງົບປະມານແຫ່ງລັດເພື່ອແກ້ໄຂໜີ້ສິນແທນໃຫ້ວິສາຫະກິດຢ່າງແນ່ນອນ.