(vovworld)- ໂດຍໄດ້ຮັບຄຳເຊີນຂອງທ່ານນາຍົກລັດຖະມົນຕີຫວຽດນາມ ຫງວຽນເຕິນຢຸງ, ທ່ານນາຍົກລັດຖະມົນຕີສິງກະໂປ ຫຼີຊຽນຫຼົງ ພ້ອມດ້ວຍພັນລະຍາ ແລະ ຄະນະຜູ້ແທນຂັ້ນສູງ ສິງກະໂປ ໄດ້ມາຢ້ຽມຢາມຫວຽດນາມ ຢ່າງເປັນທາງການແຕ່ວັນທີ 11-13/9. ໃນຕອນບ່າຍຂອງວັນທີ 11/9, ພາຍຫຼັງພິທີຕ້ອນຮັບ ທ່ານນາຍົກລັດຖະມົນຕີສິງກະໂປ ຫຼີຊຽນຫຼົງ ພ້ອມດ້ວຍພັນລະຍາ ຢ່າງເປັນທາງການ, ທ່ານນາຍົກລັດຖະມົນຕີຫວຽດນາມ ຫງວຽນເຕິນຢຸງ ໄດ້ດຳເນີນການພົບປະເຈລະຈາກັບທ່ານນາຍົກລັດຖະມົນຕີສິງກະໂປ ຫຼີຊຽນຫຼົງ.
ແລກປ່ຽນກ່ຽວກັບການຮ່ວມມືສອງຝ່າຍ, ການນຳສອງທ່ານເຫັນດີເປັນເອກະສັນໂດຍຖືວ່າ: ສອງຝ່າຍຄວນຮັກສາການແລກປ່ຽນຄະນະຜູ້ແທນຂັ້ນສູງ ແລະ ທຸກຂັ້ນເປັນປະຈຳ, ນັບທັງການຮ່ວມມືລະຫວ່າງສອງພັກ ແລະ ສອງສະພາແຫ່ງຊາດ. ການນຳສອງທ່ານ ກໍ່ໄດ້ ເຫັນດີເປັນເອກະສັນຈະເພີ່ມທະວີການຮ່ວມມືໃນບັນດາຂົງເຂດການສຶກສາບຳລຸງສ້າງ; ພະລັງງານ-ນ້ຳມັນອາຍແກັດ; ກະສິກຳ, ກໍ່ສ້າງ…. ທ່ານນາຍົກລັດຖະມົນຕີຫວຽດນາມ ຫງວຽນເຕິນຢຸງ ໃຫ້ຮູ້ວ່າ:
“ຂ້າພະເຈົ້າ ແລະ ທ່ານນາຍົກລັດຖະມົນຕີສິງກະໂປ ຫຼີຊຽນຫຼົງ ໄດ້ຕົກລົງຈະຍົກລະດັບການພົວພັນມິດຕະພາບ ແລະ ຮ່ວມມືຮອບດ້ານຫວຽດນາມ-ສິງກະໂປເປັນການພົວພັນຄູ່ຮ່ວມມືຍຸດທະສາດ. ພວກຂ້າພະເຈົ້າເຊື່ອໝັ້ນວ່າ ການຜັນຂະຫຍາຍການພົວພັນ ຄູ່ຮ່ວມມືຍຸດທະສາດ ຈະສ້າງກຳລັງໜູນໃໝ່ເພື່ອນຳບັນດາຂົງເຂດຮ່ວມມືລະຫວ່າງສອງປະເທດນັບມື້ນັບເຂົ້າສູ່ລວງເລິກ, ມີປະສິດທິຜົນ ແລະ ໝັ້ນຄົງເຂັ້ມແຂງ ແລະ ຈະປະກອບສ່ວນຢ່າງຕັ້ງໜ້າໃຫ້ແກ່ຈຸດໝາຍສ້າງປະຊາຄົມອາຊຽນໃນປີ 2015 ກໍ່ຄືປະກອບສ່ວນໃຫ້ແກ່ສັນຕິພາບ, ສະຖຽນລະພາບ, ການຮ່ວມມື ແລະ ພັດມະນາຢູ່ອາຊີ-ປາຊີຟິກ ແລະ ໃນໂລກ“
ເມື່ອແລກປ່ຽນກ່ຽວກັບການຮ່ວມມືພາກພື້ນ ແລະ ສາກົນ, ສອງຝ່າຍເຫັນດີຍູ້ແຮງການປະສານສົມທົບ ແລະ ພ້ອມກັບບັນດາປະເທດ ອາຊຽນ ອື່ນ ມານະພະຍາຍາມຍູ້ແຮງການສ້າງປະຊາຄົມ ອາຊຽນ ໃນປີ 2015, ເພີ່ມທະວີຄວາມສາມັກຄີ ແລະ ເສີມຂະຫຍາຍບົດບາດໃຈກາງຂອງອາຊຽນຢູ່ພາກພື້ນ ເພື່ອສັນຕິພາບ, ຄວາມໝັ້ນຄົງ ແລະ ວັດທະນາຖາວອນຢູ່ພາກພື້ນ. ທ່ານນາຍົກລັດຖະມົນຕີ ຫລີຊຽນຫລົງ ຢືນຢັນວ່າ:ສິງກະໂປສືບຕໍ່ຮ່ວມມື ແລະ ສະຫນັບສະຫນູນຫວຽດນາມ ໃນວິວັດການເຈລະຈາ TPP. ນາຍົກລັດຖະມົນຕີທັງສອງແບ່ງປັນທັດສະນະກ່ຽວກັບບັນຫາທະເລຕາເວັນອອກ, ເນັ້ນຫນັກຄວາມສາມັກຄີ, ບົດບາດຕັ້ງຫນ້າຂອງອາຊຽນ ພ້ອມທັງເຊີດຊູບັນດາຫລັກການລວມຂອງອາຊຽນ. ທ່ານນາຍົກລັດຖະມົນຕີ ຫງວຽນເຕີນຢຸງ ແລະ ທ່ານນາຍົກລັດຖະມົນຕີ ຫລີຊຽນຫລົງ ຖະແຫລງ ຍົກການພົວພັນມິດຕະພາບ ແລະ ການຮ່ວມມືຮອບດ້ານ ຫວຽດນາມ ສິງກະໂປເປັນຄູ່ຮ່ວມມືຍຸດທະສາດຢ່າງເປັນທາງການ.
ກ່ອນການຢ້ຽມຢາມຫວຽດນາມຂອງທ່ານນາຍົກລັດຖະມົນຕີສິງກະໂປ ຫຼີຊຽນຫຼົງ ໃນລະຫວ່າງວັນທີ 11 – 13 ກັນຍາ, ທ່ານປະທານສະມາຄົມວິສາຫະກິດຂະໜາດກາງ ແລະ ນ້ອຍ, ທ່ານ Chan Chong Beng, ປາດຖະໜາວ່າ ການຢ້ຽມຢາມຄັ້ງນີ້ ຈະຊ່ວຍຊູຸກຍູ້ການພົວພັນດ້ານການຄ້າລະຫວ່າງ 2 ປະເທດກວ່າອີກ. ທ່ານ Chan ເນັ້ນໜັກວ່າ 4 ເຂດອຸດສາຫະກຳຫວຽດນາມ - ສິງກະໂປ (VSIP) ຢູ່ຫວຽດນາມ ໄດ້ສະແດງໃຫ້ເຫັນການພົວພັນດ້ານເສດຖະກິດທີ່ພັດທະນາລະຫວ່າງ 2 ປະເທດ ແລະ ບັນດາເຂດອຸດສາຫະກຳດັ່ງກ່າວແມ່ນສະຖານທີ່ເພື່ອໃຫ້ບັນດາວິສາຫະກິດຂະໜາດກາງ ແລະ ນ້ອຍຂອງສິງກະໂປ ເປີດກວ້າງການເຄື່ອນໄຫວດຳເນີນທຸລະກິດຢູ່ຫວຽດນາມ. ທ່ານ Chan ໃຫ້ຮູ້ວ່າ ທ່ານນາຍົກລັດຖະມົນຕີ ຫຼີຊຽນຫຼົງ ຈະເປັນປະທານພິທີວາງສີລາລຶກກໍ່ສ້າງເຂດອຸດສາຫະກຳແຫ່ງທີ 5 ໃນການຢ້ຽມຢາມຄັ້ງນີ້.
ເນ່ືອງໃນໂອກາດທ່ານນາຍົກລັດຖະມົນຕີ ຫລີຊຽນຫລົງ ໄປຢ້ຽມຢາມຫວຽດນາມຢ່າງເປັນທາງການ, ສື່ເອເລັກໂຕນິກຕົ້ນຕໍຢູ່ ສິງກະໂປ, Channel New Asia ໄດ້ມີບົດຂຽນທົບທວນຄືນການພົວພັນລະຫວ່າງ ສິງກະໂປ ແລະຫວຽດນາມ ໃນ 40 ປີຜ່ານມາ. ຫນັງສືພິມລາຍວັນຂອງສິງກະໂປ The Straits Time ສະບັບອອກໃນວັນທີ 11/9 ໄດ້ລົງພິມບົດຂຽນເວົ້າວ່າ: ສິງກະໂປສະແດງຄວາມເຊື່ອໝັ້ນຕໍ່ອະນາຄົດຍາວນານຂອງຫວຽດນາມ ດ້ວຍເລື່ອງທ່ານນາຍົກລັດຖະມົນຕີ ຫລີຊຽນລົງ ວາງສີລາລືກລົງມືກໍ່ສ້າງເຂດອຸດສາຫະກຳ ຫວຽດນາມ ສິງກະໂປ ຢູ່ແຂວງ ກວ໋າງຫງາຍ ໃນວັນທີ 13/9.