(vovworld)- ໂດຍໄດ້ຮັບຄຳເຊີນ ຂອງ ທ່ານ ປະທານປະເທດຫວຽດນາມ ເຈີ່ນດ້າຍກວາງ ແລະ ພັນລະຍາ, ທ່ານ ປະທານາທິບໍດີອຽກລັງ Michael Daniel Higgins ແລະ ພັນລະຍາ ໄດ້ມີການຢ້ຽມຢາມທາງລັດຖະກິດ ຢູ່ຫວຽດນາມ ໃນລະຫວ່າງ ວັນທີ 5-14/11. ໃນຕອນເຊົ້າ ວັນທີ 7/11, ຢູ່ຮ່າໂນ້ຍ, ພາຍຫຼັງພິທີຕ້ອນຮັບ ທ່ານ ປະທານາທິບໍດີ Michael Daniel Higgins ຖືກຈັດຂື້ນຢ່າງເປັນທາງການ, ທ່ານ ປະທານປະເທດ ເຈີ່ນດ້າຍກວາງ ໄດ້ມີການພົບປະເຈລະຈາ ກັບ ທ່ານ ປະທານາທິບໍດີ Michael Daniel Higgins. ທ່ານ ປະທານປະເທດ ເຈີ່ນດ້າຍກວາງ ແລະ ທ່ານ ປະທານາທິບໍດີ Michael Daniel Higgins ເຫັນດີເປັນເອກະພາບ ຍູ້ແຮງການຮ່ວມມື ໃນບັນດາຂົງເຂດ ທີ່ຍັງມີຄວາມສາມາດບົ່ມຊ້ອນຫຼາຍຢ່າງ ເຊັ່ນ: ດ້ານການຄ້າ, ການລົງທຶນ, ການສຶກສາບຳລຸງສ້າງ, ເຕັກໂນໂລຊີຂຽວ, ການຜະລິດພະລັງງານຄືນໃໝ່, ກະສິກຳ, ສາທາລະນະສຸກ, ການພັດທະນາແບບຍືນຍົງ… ສອງຝ່າຍເຫັນດີເປັນເອກະພາບ ເພີ່ມທະວີການແລກປ່ຽນຄະນະຜູ້ແທນ ແລະ ການພົບປະທຸກຂັ້ນ ເພື່ອແນໃສ່ຊຸກຍູ້ການຮ່ວມມືສອງຝ່າຍ. ທ່ານ ປະທານປະເທດ ເຈີ່ນດ້າຍກວາງ ແລະ ທ່ານ ປະທານາທິບໍດີ Michael Daniel Higgins ກໍ່ໄດ້ແລກປ່ຽນ ແລະ ເຫັນດີເປັນເອກະພາບ ກ່ຽວກັບຄວາມສຳຄັນ ຂອງການຮັກສາສັນຕິພາບ, ຄວາມສະຫງົບປອດໄພ, ຊຸກຍູ້ການຮ່ວມມື ແລະ ການພັດທະນາໃນໂລກ; ເຫັນດີເປັນເອກະພາບ ສືບຕໍ່ສົບທົບກັນຢ່າງແໜ້ນແຟ້ນ ຢູ່ບັນດາເວທີປາໄສສາກົນ. ທ່ານ ປະທານປະເທດ ເຈີ່ນດ້າຍກວາງ ສະແດງຄວາມຂອບໃຈ ຕໍ່ລັດຖະບານອຽກລັງ ທີ່ຖືຫວຽດນາມ ເປັນຄູ່ຮ່ວມມືບຸລິມະສິດ ໃນນະໂຍບານການຮ່ວມມືພັດທະນາ. ທ່ານ ປະທານາທິບໍດີ Michael Daniel Higgins ໃຫ້ຮູ້ວ່າ: ອຽກລັງ ຈະປະກາດໃຊ້ຍຸດທະສາດແຫ່ງຊາດ ກ່ຽວກັບການຮ່ວມມືພັດທະນາ ກັບຫວຽດນາມ ໄລຍະ 2017-2020 ໂດຍໄວ, ສືບຕໍ່ສະໜັບສະໜູນຫວຽດນາມ ລົບລ້າງຄວາມອຶດຫີວ ຫຼຸດຜ່ອນຄວາມທຸກຍາກ, ຮັບມືກັບການປ່ຽນແປງຂອງດີນຟ້າອາກາດ ແລະ ປະຕິບັດບັນດາເປົ້າໝາຍການພັດທະນາແບບຍືນຍົງ ຂອງສະຫະປະຊາຊາດ.
ພາຍຫຼັງການພົບປະເຈລະຈາ, ທ່ານ ປະທານປະເທດ ເຈີ່ນດ້າຍກວາງ ແລະ ທ່ານ ປະທານາທິບໍດີ Michael Daniel Higgins ເປັນສັກຂີພະຍານ ພິທີເຊັນສັນຍາ, ການແລກປ່ຽນບັນດາເອກະສານ, ຂໍ້ຕົກລົງການຮ່ວມມື ລະຫວ່າງ ບັນດາກະຊວງ, ຂະແໜງການ, ວິສາຫະກິດ ແລະ ຮາກຖານການບຳລຸງສ້າງວິທະຍາໄລຂອງ 2 ປະເທດ ໃນບັນດາຂົງເຂດການຮ່ວມມືພັດທະນາ, ການສຶກສາ, ບຳລຸງສ້າງ, ເຕັກໂນໂລຊີຂໍ້ມູນຂ່າວສານ, ໄປສະນີໂທລະຄົມມະນາຄົມ.
ທ່ານປະທານປະເທດ ເຈີນດ້າຍກວາງ ແລະ ທ່ານປະທານາທິບໍດີ Michael Daniel Higgins ໄດ້ຈັດການປະຊຸມຂ່າວຮ່ວມເພື່ອແຈ້ງບັນດາຈຸດພົ້ນເດັ່ນເຊີ່ງການນຳ 2 ປະເທດໄດ້ເປັນເອກະພາບນຳກັນທີ່ການພົບປະເຈລະຈາຂັ້ນສູງ. ທ່ານປະທານປະເທດ ເຈີນດ້າຍກວາງ ໃຫ້ຮູ້ວ່າ.
“ທ່ານປະທານາທິບໍດີອຽກລັງ ແລະ ຂ້າພະເຈົ້າໄດ້ແລກປ່ຽນ ແລະ ເຫັນດີນຳກັນກ່ຽວກັບຄວາມສຳຄັນຂອງການຮັກສາສັນຕິພາບ, ຄວາມໝັ້ນຄົງ, ຊຸກຍູ້ການຮ່ວມມື ແລະ ພັດທະນາໃນໂລກ. ພວກຂ້າພະເຈົ້າສືບຕໍ່ສົມທົບກັນຢູ່ບັນດາເວທີປາໄສສາກົນຢ່າງແໜ້ນແຟ້ນຄື: ສະຫະປະຊາຊາ, ASEM ແລະ ໃນຂອບເຂດຮ່ວມມືອາຊຽນ - EU ເພື່ອແນໃສ່ແກ້ໄຂບັນດາບັນຫາທົ່ວໂລກຄື: ການຮັບມືກັບການປ່ຽນແປງຂອງດິນຟ້າອາກາດ ແລະ ປະຕິບັດບັນດາຄາດໝາຍສະຫັດສະວັດແບບຍືນຍົງຂອງສະຫະປະຊາຊາດ ເພື່ອໂລກຂຽວ, ສະອາດ, ສັນຕິພາບ, ດີງາມກວ່າໃຫ້ລຸ້ນອະນາຄົດ”.
ກ່ຽວກັບບັນຫາທະເລຕາເວັນອອກ, ສອງຝ່າຍເຫັນດີເປັນເອກະພາບ ຕໍ່ທັດສະນະການແກ້ໄຂຄວາມຂັດແຍ້ງ ໂດຍສັນຕິວິທີ, ບົນພື້ນຖານກົດໝາຍສາກົນ, ພິເສດແມ່ນສົນທິສັນຍາ ຂອງສະຫະປະຊາຊາດ ກ່ຽວກັບກົດໝາຍວ່າດ້ວຍທະເລ (UNCLOS) ປີ 1982.
ສ່ວນທ່ານ Michael Daniel Higgins ໃຫ້ຮູ້ວ່າ, 2 ຝ່າຍໄດ້ປຶກສາຫາລືກ່ຽວກັບການປ່ຽນແປງຂອງດິນຟ້າອາກາດ; ຜົນຮ້າຍຂອງການອົບພະຍົບ ແລະ ບັນດາການກະທົບກ່ຽວຂ້ອງເຖິງການພັດທະນາແບບຍືນຍົງ.
ກ່ຽວຂ້ອງເຖິງການເຄື່ອນໄຫວຂອງທ່ານປະທານາທິບໍດີ Michael Daniel Higgins ຢູ່ຫວຽດນາມ
ໃນວັນດຽວກັນ, ທ່ານນາງປະທານສະພາແຫ່ງຊາດ ຫງວຽນທິກີມເງິນ ໄດ້ພົບປະກັບປະທານາທິບໍດີ ອຽກລັງ. ນະການຕ້ອນຮັບ, ທ່ານນາງປະທານສະພາແຫ່ງຊາດຫງວຽນທີກີມເງິນ ສະເຫນີ: ອຽກລັງ ສືບຕໍ່ຮັກສາທຶນ ODA ໃຫ້ແກ່ຫວຽດນາມ ແລະເນັ້ນຫນັກວ່າ ຫວຽດນາມ ພ້ອມແລ້ວແມ່ນຂົວຕໍ່ເພື່ອໃຫ້ ອຽກລັງ ສຳຜັດກັບບັນດາຕະຫລາດໃນ ອາຊຽນ ແລະ ກົງກັນຂ້າມ ອຽກລັງ ກໍເປັນຂົວຕໍ່ເພື່ອໃຫ້ຫວຽດນາມ ສຳຜັດກັບບັນດາປະເທດໃນກຸ່ມ ເອີລົບ. ທ່ານປະທານາທິບໍດີ ອຽກລັງ ແຈ້ງໃຫ້ທ່ານນາງປະທານສະພາແຫ່ງຊາດ ຫງວຽນທິກີມເງິນ ຮັບຊາບກ່ຽວກັບໝາກຜົນການເຈລະຈາລະຫວ່າງປະທານາທິບໍດີ ອຽກລັງ ແລະ ທ່ານປະທານປະເທດ ເຈີນດ້າຍກວາງ, ໃນນັ້ນ ສອງຝ່າຍໄດ້ເຊັນເອກະສານສຳຄັນບາງສະບັບ.