ການພົບປະແລກປ່ຽນມິດຕະພາບດ້ານປ້ອງກັນຊາດເຂດຊາຍແດນຫວຽດນາມ-ຈີນຄັ້ງທີ2ປະສົບຜົນສຳເລັດອັນດີງາມ
ທ່ານພົນເອກ ຟຸ່ງກວາງແທງ ຕ້ອນຮັບ ທ່ານພົນໂທ
ຈາງວາງແຈວນ ຢູ່ນະຄອນ ລາວກາຍ
(ພາບ: http://vtc.vn)
(vovworld) – ວັນທີ 17/5, ທ່ານພົນເອກ ຟຸ່ງກວາງແທງ, ລັດຖະມົນຕີວ່າການກະຊວງປ້ອງກັນປະເທດຫວຽດນາມ, ໄດ້ນຳໜ້າຄະນະຜູ້ແທນທະຫານຂັ້ນສູງຫວຽດນາມ ເຂົ້າຮ່ວມບັນດາການເຄື່ອນໄຫວຂອງລາຍການພົບປະແລກປ່ຽນມິດຕະພາບດ້ານປ້ອງກັນຊາດເຂດຊາຍແດນ ຫວຽດນາມ-ຈີນ ຄັ້ງທີ 2, ຢູ່ແຂວງ ຢູນໜານ (ຈີນ). ພາຍຫຼັງພິທີຕ້ອນຮັບ, ທ່ານລັດຖະມົນຕີ ຟຸ່ງກວາງແທງ ແລະ ທ່ານລັດຖະມົນຕີ ຈາງວາງແຈວນ ພ້ອມກັບຄະນະຜູ້ແທນ 2 ປະເທດ ໄດ້ເປັນສັກຂີພິຍານການເຄື່ອນໄຫວລາດຕະເວນ 2 ຝ່າຍ ລະຫວ່າງ ກອງພັນນ້ອຍປ້ອງກັນຊາຍແດນ ເຫື່ອເຂົາ (ຈີນ) ແລະ ປ້ອມປ້ອງກັນຊາຍແດນເຂດດ່ານຊາຍແດນສາກົນ ລາວກາຍ (ຫວຽດນາມ) ຢູ່ເຂດດ່ານຊາຍແດນເທື່ອເຂົາ.
ແລະກໍໃນຕອນບ່າຍວັນດຽວກັນ, ຢູ່ ນະຄອນ ເມີ໋ງຈື່, ແຂວງ ຢູນໜານ (ຈີນ) ໄດ້ດຳເນີນການເຈລະຈາ ລະຫວ່າງ 2 ຝ່າຍ. ທີ່ການເຈລະຈາ, ທ່ານພົນເອກ ຟຸ່ງກວາງແທງ ຢືນຢັນວ່າ: ເລື່ອງຈັດຕັ້ງການພົບປະແລກປ່ຽນຄັ້ງນີ້ ແມ່ນການປະຕິບັດຄຳສັ່ງ, ຮັບຮູ້ລວມຂອງການນຳ 2 ປະເທດ, 2 ພັກ, 2 ລັດ ແລະ ປະຊາຊົນ ຫວຽດນາມ-ຈີນ ຢ່າງເຂັ້ມງວດ, ນັ້ນແມ່ນກອງທັບ 2 ປະເທດຕ້ອງຊຸກຍູ້ການຮ່ວມມືຮອບດ້ານ, ເພີ່ມທະວີການພົບປະຂັ້ນສູງ; ຈັດຕັ້ງການພົບປະແລກປ່ຽນດ້ານປ້ອງກັນຊາດເຂດຊາຍແດນໃນເຂດດິນຕໍ່ແຜ່ນ, ການລາດຕະເວນລວມບົນທະເລ. ທ່ານລັດຖະມົນຕີ ຟຸ່ງກວາງແທງ ເນັ້ນໜັກວ່າ: ຜ່ານບັນດາການເຄື່ອນໄຫວຂອງການພົບປະແລກປ່ຽນຄັ້ງນີ້, ສະແດງໃຫ້ເຫັນການພົວພັນສາມັກຄີລະຫວ່າງ ກອງທັບ ແລະ ປະຊາຊົນ 2 ປະເທດ ແລະ ປາດຖະໜາຢາກຮັກສາສະພາບແວດລ້ອມແຫ່ງສັນຕິພາບ, ສະຖຽນລະພາບ ເພື່ອການຮ່ວມມື ແລະ ພ້ອມກັນພັດທະນາ.
ວັນທີ 18/5, ຄະນະຜູ້ແທນຫວຽດນາມ ຈະກັບເມືອປະເທດ, ສິ້ນສຸດການພົບປະແລກປ່ຽນມິດຕະພາບດ້ານປ້ອງກັນຊາດເຂດຊາຍແດນລະຫວ່າງ ຫວຽດນາມ-ຈີນ ຄັ້ງທີ 2.