(vovworld) – ຕອນບ່າຍວັນທີ 14/10, ທ່ານຮອງປະທານສະພາແຫ່ງຊາດ ຫວຽດນາມ ຕ່ອງທິຟ໋ອງ ມີການພົບປະກັບທ່ານຮອງປະທານສະພາສູງ ອິນເດຍ Pallath Joseph Kurien ແລະ ບັນດາສະມາຊິກສະພາແຫ່ງຊາດ ອິນເດຍ ຢູ່ນອກກອງປະຊຸມໃຫຍ່ລັດຖະສະພາລະຫວ່າງຊາດໂລກ (IPU) ຄັ້ງທີ 131, ທີ່ພວມດຳເນີນໄປຢູ່ ເຊີແນວ, ປະເທດສະວິດ. ທ່ານນາງຮອງປະທານສະພາແຫ່ງຊາດ ຕ່ອງທິຟ໋ອງ ຢືນຢັນວ່າ: ສະພາແຫ່ງຊາດ ຫວຽດນາມ ປາດຖະໜາຢາກພ້ອມກັບສະພາແຫ່ງຊາດ ອິນເດຍ ສືບຕໍ່ຍູ້ແຮງການແລກປ່ຽນຄະນະຜູ້ແທນທຸກຂັ້ນເພື່ອທາບທາມ ຮ່ຳຮຽນເອົາບົດຮຽນໃນການເຄື່ອນໄຫວນິຕິບັນຍັດ, ຕິດຕາມກວດກາ, ເພີ່ມທະວີການພົວພັນແລກປ່ຽນລະຫວ່າງບັນດາກຸ່ມສະມາຊິກສະພາແຫ່ງຊາດມິດຕະພາບ, ເພື່ອແນໃສ່ສ້າງຄວາມເຂົ້າໃຈເຊິ່ງກັນ ແລະ ກັນ ແລະ ຄວາມສາມັກຄີລະຫວ່າງປະຊາຊົນ 2 ປະເທດ. 2 ປະເທດສືບຕໍ່ສົມທົບກັນ, ເພີ່ມທະວີການຕິດຕາມກວດກາເລື່ອງປະຕິບັດບັນດາສັນຍາ, ສົນທິສັນຍາລະຫວ່າງ 2 ປະເທດເພື່ອແນໃສ່ນຳການພົວພັນຄູ່ຮ່ວມມືຍຸດທະສາດໃຫ້ນັບມື້ນັບກ້າວເຂົ້າສູ່ລວງເລິກ. ທ່ານນາງຮອງປະທານສະພາແຫ່ງຊາດ ຕ່ອງທິຟ໋ອງ ປາດຖະໜາວ່າ: ອິນເດຍ ສືບຕໍ່ສະແດງຫຼັກໝັ້ນສະໜັບສະໜູນ ຫວຽດນາມ ໃນບັນຫາທະເລຕາເວັນອອກ ແລະ ໃນເລື່ອງສືບຕໍ່ຮັກສາ ແລະ ເພິ່ມທະວີການຮ່ວມມືສຳຫຼວດ, ຂຸດຄົ້ນນ້ຳມັນອາຍແກດກັບ ຫວຽດນາມ ຢູ່ທະເລຕາເວັນອອກ.