ການພົວພັນລະຫວ່າງຫວຽດນາມແລະອາເມລິການັບມື້ນັບພັດທະນາໃນທຸກຂົງເຂດ
ທ່ານຮອງນາຍົກລັດຖະມົນຕີ ຟ້າມບີງມີງ
ກ່າວປາໄສ ທີ່ສູນCSIS
|
(vovworld)- “ພວກເຮົາບໍ່ສາມາດປ່ຽນແປງປະຫວັດສາດ ແຕ່ສາມາດປ່ຽນແປງອະນາຄົດດ້ວຍການຮ່ວມມືນຳກັນ”, ນັ້ນແມ່ນຄຳຢືນຢັນຂອງທ່ານຮອງນາຍົກລັດຖະມົນຕີ, ທັງເປັນລັດຖະມົນຕີການຕ່າງປະເທດຫວຽດນາມ ຟ້າມບີງມີງ ໃນບົດກ່າວປາໄສກ່ຽວກັບການພົວພັນລະຫວ່າງ ຫວຽດນາມ ແລະ ອາເມລິກາ ທີ່ສູນຄົ້ນຄ້ວາຍຸດທະສາດ ແລະ ສາກົນ (CSIS) ເນື່ອງໃນໂອກາດຢ້ຽມຢາມອາເມລິກາ ຢ່າງເປັນທາງການ ຕາມຄຳເຊີນຂອງທ່ານລັດຖະມົນຕີການຕ່າງປະເທດ ອາເມລິກາ John Kerry. ຕາມ ທ່ານຮອງນາຍົກລັດຖະມົນຕີ ຟ້າມບີງມີງ ແລ້ວ, ພາຍຫລັງ 20 ປີແຫ່ງການພົວພັນລະຫວ່າງສອງປະເທດຫວຽດນາມ ແລະ ອາເມລິກາ ເປັນປົກກະຕິ, ການພົວພັນດ້ານການຄ້າສອງສົ້ນໄດ້ເພີ່ມຂຶ້ນກວ່າ 130 ເທົ່າ, ບັນລຸ 30 ຕື້ USD ໃນປີ 2013. ສອງປະເທດກໍໄດ້ດຳເນີນການເຈລະຈາໃນຫລາຍຂົງເຂດຄື: ການເມືອງ, ການປ້ອງກັນຊາດປ້ອງກັນຄວາມສະຫງົບ, ແຮງງານ ແລະ ສິດທິມະນຸດ. ຫວຽດນາມ ແລະ ອາເມລິກາ ພວມມານະພະຍາຍາມແກ້ໄຂບັນດາບັນຫາຍັງຄົງຄ້າງຄື: ຜົນຮ້າຍຢ້ອນຫລັງຈາກທາດພິດສີສົ້ມ, ລູກລະເບີດບໍ່ທັນແຕກຫລັງສົງຄາມ.
ເມື່ອຕອບຄຳຖາມຂອງນັກຂ່າວຈີນ ກ່ຽວກັບການພົວພັນລະຫວ່າງ ຫວຽດນາມ ແລະ ອາເມລິກາ ແລະ ການພົວພັນລະຫວ່າງ ຫວຽດນາມ ແລະ ຈີນ, ທ່ານຮອງນາຍົກລັດຖະມົນຕີ ຟ້າມບີງມີງ ຊີ້ແຈ້ງວ່າ: ນະໂຍບາຍການພົວພັນກັບຕ່າງປະເທດຂອງຫວຽດນາມ ແມ່ນຫລາຍຮູບຫລາຍແບບ ແລະ ຫລາຍຝ່າຍ, ໝາຍຄວາມວ່າພັດທະນາການພົວພັນກັບທຸກປະເທດ. ຫວຽດນາມ ສ້າງສາຍພົວພັນກັບປະເທດໃຫຍ່ທັງໝົດ, ສຳລັບຈີນ ແມ່ນການພົວພັນຄູ່ຮ່ວມມືຍຸດທະສາດ, ສຳລັບອາເມລິກາ ແມ່ນການພົວພັນຄູ່ຮ່ວມມືຮອບດ້ານ.