ການພົວພັນຫວຽດນາມ-ຝະລັ່ງມີບັນດາມາດຕະຖານພິເສດ
ທ່ານປະທານປະເທດ ເຈີ່ນດ້າຍກວາງ
(vovworld) - ເນື່ອງໃນໂອກາດທ່ານປະທານາທິບໍດີ ສ.ຝະລັ່ງ Francois Hollande ຈະຢ້ຽມຢາມທາງລັດຖະກິດເຖິງ ຫວຽດນາມ ໃນລະຫວ່າງວັນທີ 05 – 07/09, ທ່ານປະທານປະເທດ ເຈີ່ນດ້າຍກວາງ ຕອບສຳພາດຕໍ່ສຳນັກຂ່າວສານ ຝະລັ່ງ AFP ກ່ຽວກັບບັນດາຂີດໝາຍສຳຄັນໃນການພົວພັນ ຫວຽດນາມ - ຝະລັ່ງ. ຕີລາຄາການພົວພັນ ຫວຽດນາມ - ຝະລັ່ງ, ທ່ານປະທານປະເທດ ເຈີ່ນດ້າຍກວາງ ຢືນຢັນວ່າ: ນີ້ແມ່ນການພົວພັນທີ່ມີບັນດາມາດຕະຖານພິເສດລະຫວ່າງ 2 ຊາດ ທີ່ເຄີຍມີສາຍພົວພັນຢ່າງເລິກເຊິ່ງໃນປະຫວັດສາດ; ພິເສດແມ່ນລະຫວ່າງປະເທດອຸດສາຫະກຳພັດທະນາແຖວໜ້າຢູ່ ເອີລົບ ກັບປະເທດພວມພັດທະນາຢ່າງຂະຫຍັນຂັນເຄື່ອນ, ຕັ້ງໜ້າເຊື່ອມໂຍງເຂົ້າກັບສາກົນຢູ່ ອາຊີ. ໂດຍຜ່ານເດືອນປີ, ການພົວພັນມິດຕະພາບ, ການຮ່ວມມືລະຫວ່າງ 2 ປະເທດນັບມື້ນັບໄດ້ຮັບການປັບປຸງ, ພັດທະນາ. ຕາມທ່ານປະທານປະເທດແລ້ວ, ໜຶ່ງໃນບັນດາຂີດໝາຍສຳຄັນໃນການພົວພັນລະຫວ່າງ 2 ປະເທດແມ່ນເລື່ອງປີ 2013 ຫວຽດນາມ ແລະ ຝະລັ່ງ ໄດ້ລົງນາມໃນຖະແຫຼງການຮ່ວມສ້າງຕັ້ງການພົວພັນຄູ່ຮ່ວມມືຍຸດທະສາດ. ໃນຊຸມປີຜ່ານມາ, ຫວຽດນາມ ແລະ ຝະລັ່ງ ບັນລຸໄດ້ບັນດາຜົນງານຮ່ວມມືໃນຫລາຍຂົງເຂດ ນັບແຕ່ດ້ານການເມືອງ - ການທູດ, ເສດຖະກິດ, ການຄ້າ, ການລົງທຶນຮອດວິທະຍາສາດ - ເຕັກໂນໂລຢີ, ວັດທະນະທຳ - ການສຶກສາ… ປະຈຸບັນ ຝະລັ່ງ ແມ່ນລູກຄ້າໃຫຍ່ອັນດັບທີ 5 ຂອງ ຫວຽດນາມ ໃນສະຫະພາບ ເອີລົບ ແລະ ແມ່ນໜຶ່ງໃນບັນດາປະເທດອຸປະຖຳ ODA 2 ຝ່າຍແຖວໜ້າໃຫ້ ຫວຽດນາມ. ທ່ານປະທານປະເທດ ເຈີ່ນດ້າຍກວາງ ເນັ້ນໜັກວ່າ: ຫວຽດນາມ ຍາມໃດກໍ່ປາດຖະໜາ ແລະ ພ້ອມແລ້ວທີ່ຈະຮ່ວມມືໃນຫລາຍຂົງເຂດກັບບັນດາປະເທດ, ໃນນັ້ນມີ ຝະລັ່ງ ເພື່ອສັນຕິພາບ, ສະຖຽນລະພາບ, ຕ່າງຝ່າຍຕ່າງມີຜົນປະໂຫຍດ. ກ່ຽວກັບການຮ່ວມມືດ້ານປ້ອງກັນຊາດ, ທ່ານປະທານປະເທດຖືວ່າ: ໃນໄລຍະຈະມາເຖິງ ທິດທາງການຮ່ວມມື ໄດ້ຮັບການເພີ່ມທະວີ ຫຼື ອາດຈະເປີດກ້ວາງ ຄືໃນການໜູນຊ່ວຍກັນ ເຂົ້າຮ່ວມການເຄື່ອນໄຫວຮັກສາສັນຕິພາບຂອງສະຫະປະຊາຊາດ; ໃນການຮັບປະກັນຄວາມສະຫງົບປອດໄພ, ຄວາມເສລີໃນການເດີນທະເລ, ທາງອາກາດ; ໃນການສົມທົບກັນແກ້ໄຂບັນດາບັນຫາຄວາມປອດໄພທາງເຄືອຂ່າຍອິນເຕີແນັດ, ຄວາມປອດໄພປອດມູນເຊື້ອ…ຜ່ານການສຳພາດ, ທ່ານປະທານປະເທດ ເຈີ່ນດ້າຍກວາງ ຢືນຢັນອີກຄັ້ງໜຶ່ງວ່າ: ຫວຽດນາມ ຍາມໃດກໍ່ສະໜັບສະໜູນ ຝະລັ່ງ ມີບົດບາດຕັ້ງໜ້າ ແລະ ກໍ່ສ້າງ ເພື່ອໃຫ້ 2 ປະເທດສາມາດພ້ອມກັນປະກອບສ່ວນຢ່າງແທດຈິງໃນຄວາມມານະພະຍາຍາມ, ປົກປັກຮັກສາຜົນປະໂຫຍດລວມຂອງປະຊາຄົມສາກົນ.