ການພົວພັນຫວຽດນາມ-ອາເມລິກາຍັງມີຄວາມສາມາດບົ່ມຊ້ອນໃນການພັດທະນາຫຼາຍຢ່າງ
(ທ່ານເອກອັກຄະລັດຖະທູດຟ້າມກວາງວິງ
ໂອ້ລົມສົນທະນາຢູ່ສູນຜົນປະໂຫຍດແຫ່ງຊາດອາເມລິກາ)
(vovworld) - ວັນທີ 16/11, ທ່ານເອກອັກຄະລັດຖະທູດຫວຽດນາມ ປະຈຳອາເມລິກາ ຟ້າມກວາງວິງ ໄດ້ມີການໂອ້ລົມສົນທະນາຢູ່ສູນຜົນປະໂຫຍດແຫ່ງຊາດອາເມລິກາ ກ່ຽວກັບອະນາຄົດການພົວພັນຂອງຫວຽດນາມ ກໍຄືອາຊີ ກັບອາເມລິກາ ໃນໄລຍະຈະມາເຖິງ. ເຂົ້າຮ່ວມການໂອ້ລົມສົນທະນາ ມີບັນດານັກຮຽນຮູ້ ແລະ ນັກຂ່າວສັງກັດສະຖາບັນຄົ້ນຄວ້າ ແລະ ສຳນັກຂ່າວສານໃຫຍ່ຫຼາຍແຫ່ງໃນໂລກ.
ທີ່ການໂອ້ລົມສົນທະນາ, ທ່ານເອກອັກຄະລັດຖະທູດ ຟ້າມກວາງວິງ ເນັ້ນໜັກວ່າ ອາຊີ ມີຄວາມໝາຍສຳຄັນນັບທັງດ້ານເສດຖະກິດ ແລະ ຍຸດທະສາດກັບອາເມລິກາ. ກ່ຽວກັບການພົວພັນລະຫວ່າງຫວຽດນາມ - ອາເມລິກາ, ທ່ານເອກອັກຄະລັດຖະທູດ ຟ້າມກວາງວິງ ຖືວ່າ, 2 ປະເທດຍັງມີຄວາມສາມາດບົ່ມຊ້ອນໃນການຮ່ວມມືຫຼາຍຢ່າງ. ທ່ານເອກອັກຄະລັດຖະທູດກໍສະໜອງຂໍ້ມູນຂ່າວສານອັບເດັດກ່ຽວກັບນະໂຍບາຍປ່ຽນໃໝ່ ແລະ ເຊື່ອມໂຍງຂອງຫວຽດນາມ, ໃນນັ້ນເອົາໃຈໃສ່ເປັນພິເສດເຖິງການສ້າງເງື່ອນໄຂສະດວກໃຫ້ບັນດານັກລົງທຶນພາກເອກະຊົນ, ວິສາຫະກິດຕ່າງປະເທດ ລວມທັງອາເມລິກາ ແລະ ສະເໜີອາເມລິກາ ສ້າງເງື່ອນໄຂສະດວກເພື່ອໃຫ້ສິນຄ້າຂອງຫວຽດນາມ ເຂົ້າຕະຫຼາດອາເມລິກາ ຄືລົບລ້າງບັນດາຮົ້ວກີດຂວາງດ້ານການຄ້າ ແລະ ຮັບຮູ້ຫວຽດນາມ ເປັນພື້ນຖານເສດຖະກິດການຕະຫຼາດໂດຍໄວ. ທ່ານເອກອັກຄະລັດຖະທູດ ຟ້າມກວາງວິງ ກໍ່ເນັ້ນໜັກວ່າ ຄວນຍູ້ແຮງການຂຸດຄົ້ນບັນດາຄວາມສາມາດບົ່ມຊ້ອນຮ່ວມມືກ່ຽວກັບການສຶກສາ - ບຳລຸງສ້າງ, ການທ່ອງທ່ຽວ, ວິທະຍາສາດ - ເຕັກໂນໂລຊີ… ນອກນັ້ນ, 2 ປະເທດກໍ່ສາມາດຍູ້ແຮງການຮ່ວມມືໃນບັນດາຂົງເຂດປ້ອງກັນ, ຕ້ານການປ່ຽນແປງຂອງດິນຟ້າອາກາດ, ສົມທົບກັບບັນດາປະເທດອາຊຽນ ແລະ ບັນດາປະເທດໃນພາກພື້ຶ້ນເພື່ອຮັບປະກັນສະພາບແວດລ້ອມແຫ່ງສັນຕິພາບ ແລະ ການຮ່ວມມືພັດທະນາ, ໃນນັ້ນມີການຮັບປະກັນຄວາມປອດໄພໃນການເດີນທະເລ, ສັນຕິພາບສະຖຽນລະພາບຢູ່ທະເລຕາເວັນອອກ. ທ່ານເອກອັກຄະລັດຖະທູດ ຟ້າມກວາງວິງ ຢືນຢັນວ່າ, ຫວຽດນາມ ຈະສືບຕໍ່ຮ່ວມມືກັບອຳນາດການປົກຄອງໃໝ່ຂອງອາເມລິກາ, ເພີ່ມທະວີການພົວພັນຄູ່ຮ່ວມມືຮອບດ້ານຢ່າງແທດຈິງ, ຍາວນານ, ໝັ້ນຄົງ, ເຊື່ອໝັ້ນວ່າໃນການພົວພັນລະຫວ່າງ 2 ປະເທດ ຈະພັດທະນາຢ່າງແຮງກວ່າໃນໄລຍະຈະມາເຖິງ.