ທ່ານ ໂຕນຊິີງແທ່ງ ຕອບສຳພາດຕໍ່ນັກຂ່າວ
(ພາບ: Vietnam+)
(vovworld) – ການຢ້ຽມຢາມ ຫວຽດນາມ ຂອງທ່ານນາຍົກລັດຖະມົນຕີອິນເດຍ Narendra Modi ເປີດໜ້າປະຫວັດສາດໃໝ່ໃນການພົວພັນຮ່ວມມື ຫວຽດນາມ - ອິນເດຍ. ນີ້ແມ່ນການຢັ້ງຢືນຂອງທ່ານ ໂຕນຊີງແທ່ງ, ເອກອັກຄະລັດຖະທູດ ຫວຽດນາມ ປະຈຳ ອິນເດຍ ໃນການຕອບສຳພາດຕໍ່ນັກຂ່າວສຳນັກຂ່າວສານ ຫວຽດນາມ ເນື່ອງໃນໂອກາດທ່ານນາຍົກລັດຖະມົນຕີ ອິນເດຍ Narendra Modi ໃກ້ຈະມາຢ້ຽມຢາມ ຫວຽດນາມ ແລະ ມຸ່ງໄປເຖິງການສະເຫຼີມສະຫຼອງ 45 ປີແຫ່ງວັນສ້າງຕັ້ງການພົວພັນທາງການທູດ (07/01/1972 – 07/01/2017) ແລະ 10 ປີແຫ່ງວັນສ້າງຕັ້ງການພົວພັນຄູ່ຮ່ວມມືຍຸດທະສາດ (2007 – 2017) ລະຫວ່າງ ຫວຽດນາມ ແລະ ອິນເດຍ. ທ່ານເອກອັກຄະລັດຖະທູດ ໂຕນຊີງແທ່ງ ໃຫ້ຮູ້ວ່າ: ການຢ້ຽມຢາມຈະມາເຖິງຂອງທ່ານນາຍົກລັດຖະມົນຕີ Modi ແມ່ນການຢ້ຽມຢາມຄັ້ງທຳອິດຂອງນາຍົກລັດຖະມົນຕີ ອິນເດຍ ເຖິງ ຫວຽດນາມ ພາຍຫຼັງ 15 ປີ, ນັບແຕ່ການຢ້ຽມຢາມຂອງທ່ານນາຍົກລັດຖະມົນຕີ Atal Bihari Vajpayee ເມື່ອປີ 2001. ນີ້ແມ່ນໂອກາດເພື່ອໃຫ້ການນຳ 2 ປະເທດຕີລາຄາບັນດາໝາກຜົນການຮ່ວມມືໃນໄລຍະຜ່ານມາ, ກຳນົດທິດທາງ ແລະ ມາດຕະການເພື່ອແນໃສ່ນຳການພົວພັນຮ່ວມມືຍຸດທະສາດລະຫວ່າງ 2 ປະເທດກ້າວຂຶ້ນສູ່ລະດັບສູງໃໝ່, ເລິກເຊ່ິງ ແລະ ຮອບດ້ານກ່ວາ. ທ່ານ ໂຕນຊີງແທ່ງ ກໍ່ໃຫ້ຮູ້ວ່າ: ບັນດາກົນໄກຮ່ວມມືຄື: ຄະນະກຳມະການປະສົມ 2 ປະເທດ, ທາບທາມດ້ານການເມືອງ ແລະ ເຈລະຈາຍຸດທະສາດລະຫວ່າງກະຊວງການຕ່າງປະເທດ 2 ປະເທດ, ການເຈລະຈາດ້ານປ້ອງກັນປະເທດໄດ້ເສີມຂະຫຍາຍຢ່າງມີປະສິດທິຜົນໃນການຊຸກຍູ້ການຮ່ວມມືຫຼາຍດ້ານ ແລະ ການສົມທົບລະຫວ່າງ 2 ປະເທດໃນບັນດາເວທີປາໄສສາກົນ. ທ່ານເອກອັກຄະລັດຖະທູດ ກໍ່ຢັ້ງຢືນວ່າ: ປີ 2017 ຈະແມ່ນຂີດໝາຍສຳຄັນ, ສະເຫຼີມສະຫຼອງ 45 ປີແຫ່ງວັນສ້າງຕັ້ງການພົວພັນທາງການທູດ ແລະ 10 ປີແຫ່ງວັນຄູ່ຮ່ວມມືຍຸດທະສາດລະຫວ່າງ ຫວຽດນາມ ແລະ ອິນເດຍ. ນີ້ຈະແມ່ນໂອກາດເພື່ອໃຫ້ ຫວຽດນາມ ຫວນຄືນການເຕີບໃຫຍ່ຂະຫຍາຍຕົວຂອງການພົວພັນຄູ່ຮ່ວມມືຍຸດທະສາດລະຫວ່າງ 2 ປະເທດໃນ 10 ປີຜ່ານມາ ແລະ ກຳນົດທິດການພົວພັນໃນໄລຍະ 10 ປີຈະມາເຖິງ, ມຸ່ງໄປເຖິງການສ້າງການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງ 2 ປະເທດ.