(vovworld) - ພົນໂທ ຫງວຽນຈິ໋ວິ້ງ, ຮອງລັດຖະມົນຕີກະຊວງປ້ອງກັນຊາດຫວຽດນາມ ໄດ້ຕອບສຳພາດຕໍ່ນັກຂ່າວສຳນັກຂ່າວສານຫວຽດນາມ ປະຈຳ ປັກກິງ ກ່ຽວກັບໝາກຜົນແຫ່ງການສົນທະນາປ້ອງກັນຊາດລະຫວ່າງຫວຽດນາມ - ຈີນ ຄັ້ງທີ 4. ທ່ານຮອງລັດຖະມົນຕີ ຫງວຽນຈິ໋ວິ້ງ ໃຫ້ຮູ້ວ່າ ຫວຽດນາມ ແລະ ຈີນ ໄດ້ສ້າງສາຍໂທລະສັບດ່ວນຕິດຕໍ່ໂດຍກົງລະຫວ່າງ 2 ກະຊວງປ້ອງກັນຊາດ ເປັນທາງການ. ຕາມທ່ານຮອງລັດຖະມົນຕີ ຫງວຽນຈິ໋ວິ້ງ ແລ້ວ, ເພື່ອສ້າງຄວາມໄວ້ເນື້ອເຊື່ອໃຈຍຸດທະສາດ, 2 ປະເທດຕ້ອງອີ່ງໃສ່ບົນພື້ນຖານ 2 ບັນຫາຕົ້ນຕໍ່. ທີ 1 ແມ່ນ, ຮັບປະກັນຄວາມສະຖຽນລະພາບຢູ່ເຂດຊາຍແດນ, ທາງທະເລ ແລະ ບັນດາການພົວພັນ, ສ້າງສະພາບແວດລ້ອມແຫ່ງສັນຕິພາບ, ມິດຕະພາບ. ທີ 2 ແມ່ນ, ຄວາມໄວ້ເນື້ອເຊື່ອໃຈນັ້ນ ຕ້ອງໄດ້ຮັບການປະຕິບັດດ້ວຍບັນດາເນື້ອໃນຮ່ວມມືຢ່າງລະອຽດ. ໃນການເຈລະຈາຍຸດທະສາດປ້ອງກັນຊາດ, 2 ຝ່າຍໄດ້ຊີ້ອອກບັນດາໜ້າທີ່ຢ່າງລະອຽດ, ໃນນັ້ນຊີ້ແຈ້ງວ່າ ຄວນເຮັດໃຫ້ບັນດາເນື້ອໃນຮ່ວມມືທີ່ມີຢູ່ແລ້ວໃຫ້ເລິກເຊິ່ງກວ່າ ແລະ ຊຸກຍູ້ບັນດາເນືອໃນຮ່ວມມືໃໝ່ທີ່ກ່ຽວຂ້ອງເຖິງເລື່ອງຫວຽດນາມ ເຂົ້າຮ່ວມກຳລັງຮັກສາສັນຕິພາບສະຫະປະຊາຊາດ. ຈີນຢືນຢັນຈະຊ່ວຍຫວຽດນາມ ໃນໜ້າທີ່ໃໝ່ນີ້ ໃນຂົງເຂດຫຼາຍຝ່າຍກ່ຽວກັບການເຂົ້າຮ່ວມການຮັກສາສັນຕິພາບ. ທ່ານຮອງລັດຖະມົນຕີ ຫງວຽນຈິ໋ວິ້ງ ກໍໃຫ້ຮູ້ວ່າ ທີ່ການເຈລະຈາ ຫວຽດນາມ ໄດ້ຍົກອອກຂໍ້ສະເໜີ ບໍ່ນຳໃຊ້ອາວຸດ ຫຼື ນາບຂູ່ຢູ່ທະເລຕາເວັນອອກ. ຝ່າຍຈີນ ກໍຮັບຮູ້ ແລະ ຄົ້ນຄວ້າກ່ຽວກັບບັນຫານີ້ຢ່າງເຂັ້ມງວດ.