(vovworld) - ວັນທີ 5/4, ທີ່ຫໍພິພິທະພັນປະຫວັດສາດຢູ່ນະຄອນ Momtreuil, ຊານນະຄອນຫຼວງ Paris, ໄດ້ຈັດຕັ້ງການສຳມະນາດ້ວຍຫົວຂໍ້ວ່າ “ພົນເອກ ຫວໍງວຽນຢາບ ແລະ 60 ປີແຫ່ງວັນໄຊຊະນະ ດ້ຽນບຽນຝູ(7/5/1954 – 7/5/2014)”. ນັກປະຫວັດສາດ Alain Ruscio, ອະດີດນັກຂ່າວປະຈຳໜັງສືພິມມະນຸດສະທຳ(L’Humanité) ຢູ່ ຫວຽດນາມ ແຕ່ປີ 1978 – 1980 ແລະ ທ່ານອະດີດເອກອັກຄະລັດຖະທູດ ຝລັ່ງ ປະຈຳ ຫວຽດນາມ ປີ 1989 – 1993 Claude Blanchemaison ເປັນເຈົ້າພາບຈັດການໂອລົມສົນທະນາ. ນັກປະຫວັດສາດ Alain Ruscio ຊີ້ແຈ້ງສະພາບປະຫວັດສາດກ່ອນບັ້ນຮົບ ດ້ຽນບຽນຝູ, ບົດບາດທີ່ພົ້ນເດັ່ນຂອງນັກຍຸດທະສາດດ້ານການທະຫານທີ່ປິຊາສາມາດຂອງ ຫວຽດນາມ ແມ່ນພົນເອກ ຫວໍງວຽນຢາບ ແລະ ຄວາມໝາຍຂອງໄຊຊະນະທີ່ພາໄປເຖິງການລົ້ມທະລາຍຂອງລັດທິລ່າເມືອງຂຶ້ນແບບເກົ່າ, ຂີດໝາຍບາດກ້າວພັດທະນາໃໝ່ໃຫ້ແກ່ຂະບວນການຕໍ່ສູ້ຍາດເອົາເອກະລາດ ແລະ ຂະບວນການຕໍ່ສູ້ເພື່ອຫຼຸດພົ້ນອອກຈາກແອກຄອບຄອງຂອງລ່າເມືອງຂຶ້ນໃນທົ່ວໂລກໃນຊຸມປີ 60 ຂອງສະຕະວັດກ່ອນ. ນັກການທູດ Claude Blanchemaison ເລົ່າຄືນອະນຸສອນອັນເລີກເຊີ່ງໃນໄລຍະດຳລົງຕຳແໜ່ງເປັນເອກອັກຄະລັດຖະທູດ ຝລັ່ງ ປະຈຳ ຫວຽດນາມ ເຊິ່ງແມ່ນໄລຍະທີ່ ຫວຽດນາມ ຍັງປະສົບກັບຄວາມຫຍູ້ງຍາກຫຼາຍຢ່າງ ແລະ ເລີ່ມຕົ້ນການພົວພັນກັບຕ່າງປະເທດ. ບັນດາຜູ້ເຂົ້າຮ່ວມການໂອ້ລົມສົນທະນາກໍ່ກ່າວເຖິງການພັດທະນາຂອງ ຫວຽດນາມ ໃນຊຸມປີຫຼັງສົງຄາມ ແລະ ສາຍພົວພັນຮ່ວມມືທີ່ດີງາມລະຫວ່າງສອງປະເທດໃນໄລຍະຜ່ານມາ.