ສະພາບກອງປະຊຸມ
(ພາບ:vtr.org.vn)
(vovworld)- ວັນທີ 14/9, ກອງປະຊຸມລັດຖະມົນຕີທ່ອງທ່ຽວ 4 ປະເທດຫວຽດນາມ-ກຳປູເຈຍ-ລາວ ແລະ ມ້ຽນມາ (CLMV) ໄດ້ຖືກຈັດຂຶ້ນຢູ່ນະຄອນໂຮ່ຈິມິນ ເປັນຄັ້ງທຳອິດ. ທ່ານ Hoang Tuan Anh ລັດຖະມົນຕີກະຊວງວັດທະນະທຳ, ກິລາ ແລະ ການທ່ອງທ່ຽວຫວຽດນາມ ເປັນປະທານກອງປະຊຸມ. ທີ່ກອງປະຊຸມ, ບັນດາທ່ານລັດຖະມົນຕີໄດ້ຮັບຮູ້ການເຕີບໂຕໜ້າປະທັບໃຈຂອງຈຳນວນນັກທ່ອງທ່ຽວຕ່າງປະເທດມາ 4 ປະເທດ CLMV ໃນໄລຍະທີ່ຜ່ານມາ, ສະເພາະແຕ່ປີ 2011 ໄດ້ຕ້ອນຮັບແຂກຕ່າງປະເທດກ່ວາ 12,3 ລ້ານເທື່ອຄົນ, ເພີ່ມຂຶ້ນ 14,5% ເມື່ອທຽບ ກັບປີກາຍ. ບັນດາທ່ານລັດຖະມົນຕີໄດ້ສຳຫຼວດກວດຄືນການປະຕິບັດເນື້ອໃນຖະແຫຼງການຮ່ວມລັດຖະມົນຕີກ່ຽວກັບການຮ່ວມມືດ້ານການທ່ອງທ່ຽວ CLMV ໃນປີ 2010 ແລະ ຮັບຮູ້ໝາກຜົນການຮ່ວມມື ຊື່ງບັນດາປະເທດໄດ້ ແລະ ພວມສົມທົບກັນຜັນຂະຫຍາຍຄື: ການເຄື່ອນໄຫວ, ສົ່ງເສີມໂຄສະນາພາບພົດ “4 ປະເທດ-ຈຸດນັດພົບໜຶ່ງດຽວ“; ການຮ່ວມມືລະຫວ່າງອົງການຄຸ້ມຄອງລັດ ແລະ ກຸ່ມວິສາຫະກິດ, ເວທີປາໄສການລົງທຶນດ້ານການທ່ອງທ່ຽວ…
ກ່າວຄຳເຫັນທີ່ກອງປະຊຸມ, ທ່ານ Hoang Tuan Anh ລັດຖະມົນຕີກະຊວງວັດທະນະທຳ, ກິລາ ແລະ ການທ່ອງທ່ຽວຫວຽດນາມ ໄດ້ສະແດງຄວາມເຊື່ອໝັ້ນວ່າ ກອງປະຊຸມໄດ້ຢັ້ງຢືນຈະແຈ້ງຄຳໝັ້ນສັນຍາ, ຄວາມຕັດສິນໃຈຂອງ 4 ປະເທດໃນການຊຸກຍູ້ການພັດທະນາການທ່ອງທ່ຽວລະຫວ່າງຫວຽດນາມ-ກຳປູເຈຍ-ລາວ ແລະ ມ້ຽນມາ ໃຫ້ຂຶ້ນສູ່ລະດັບສູງໃໝ່ ສົມກັບຄວາມສາມາດບົ່ມຊ້ອນດ້ານການທ່ອງທ່ຽວທີ່ມີແລ້ວ, ປະກອບສ່ວນຢ່າງຕັ້ງໜ້າເຂົ້າໃນການປັບປຸງການຮ່ວມມືພັດທະນາເພື່ອສັນຕິພາບ, ສະຖຽນລະພາບ ແລະ ຄວາມວັດທະນະຖາວອນລວມຂອງພາກພື້ນ.