(ພາບ:vov)
(vovworld)- ໂດຍໄດ້ຮັບຄຳເຊີນຈາກທ່ານພົນເຮືອເອກ Edouard Guillaud ເສນາທິການໃຫ່ຍກອງທັບຝະລັ່ງ, ຄະນະຜູ້ແທນຂັ້ນສູງປະເທດ ສສ ຫວຽດນາມ ໂດຍທ່ານພົນໂທໂດ໋ບາຕິ ເສນາທິການໃຫ່ຍກອງທັບ ປຊຊ ຫວຽດນາມ ນຳໜ້າໄດ້ໄປຢ້ຽມຢາມສັນທະວະໄມຕີ ສ.ຝະລັ່ງ ຢ່າງເປັນທາງການແຕ່ວັນທີ 24-27/6. ວັນທີ 24/6, ພາຍຫລັງພິທີຕ້ອນຮັບ, ຄະນະຜູ້ແທນການທະຫານຂັ້ນສູງຫວຽດນາມ ໂດຍທ່ານພົນໂທໂດ໋ບາຕິ ນຳໜ້າ ແລະ ຄະນຜູ້ແທນກອງທັບ ສ.ຝະລັ່ງ ໂດຍທ່ານພົນເຮືອເອກ Edouard Guillaud ນຳໜ້າໄດ້ດຳເນີນການພົບປະເຈລະຈາ. ສອງຝ່າຍໄດ້ແລກປ່ຽນບາງສະພາບການໂລກ ແລະ ພາກພື້ນຊື່ງຕ່າງຝ່າຍຕ່າງມີຄວາມສົນໃຈ. ກ່ຽວກັບການພົວພັນສອງຝ່າຍ, ທ່ານພົນໂທໂດ໋ບາຕິ ເນັ້ນໜັກວ່າ: ຫວຽດນາມ ຖືເປັນສຳຄັນ ແລະ ປາດຖະໜາຢາກພັດທະນາການພົວພັນຮອບດ້ານກັບ ສ.ຝະລັ່ງ. ກ່ຽວກັບທິດທາງການການຮ່ວມມືໃນໄລຍະຈະມາເຖິງ, ທ່ານພົນໂທໂດ໋ບາຕິ ສະເໜີໃຫ້ສອງຝ່າຍຕ້ອງສືບຕໍ່ຜັນຂະຫຍາຍການພົວພັນຮ່ວມມືດ້ານປ້ອງກັນຊາດຕາມຂໍ້ຕົກລົງການຮ່ວມມືໃນຂົງເຂດປ້ອງກັນຊາດທີ່ໄດ້ຮັບການລົງນາມ ລວມມີການແລກປ່ຽນຄະນະຜູ້ແທນຂັ້ນສູງ, ສືບຕໍ່ຮັກສາກົນໄກປະຊຸມປະຈຳປີຂອງຄະນະກຳມະການປະສົມກ່ຽວກັບການຮ່ວມມືດ້ານປ້ອງກັນຊາດ, ແລກປ່ຽນການບຳລຸງສ້າງ…ກ່ຽວກັບການຮ່ວມມືໃນບັນດາເວທີປາໄສຫລາຍຝ່າຍ, ຫວຽດນາມ ປາດຖະໜາຢາກເພີ່ມທະວີການຮ່ວມມືກັບຝະລັ່ງໃນບັນດາເວທີປາໄສຫລາຍຝ່າຍພາກພື້ນ, ສາກົນ ແລະ ຜ່ານການຮ່ວມມືນີ້ເພື່ອພ້ອມກັນປະກອບສ່ວນຮັກສາສະພາບແວດລ້ອມແຫ່ງສັນຕິພາບ, ສະຖຽນລະພາບໃນພາກພື້ນ ແລະ ໃນໂລກ. ຫວຽດນາມ ພ້ອມແລ້ວທີ່ຈະເປັນຂົວຕໍ່ເພື່ອໃຫ້ ຝະລັ່ງ ເປີດກ້ວາງການຮ່ວມມືກັບບັນດາປະເທດອາຊຽນ. ສ່ວນທ່ານພົນເຮືອເອກ Edouard Guillaud ກໍ່ເຫັນດີກັບບັນດາເນື້ອໃນການຮ່ວມມືໃນໄລຍະຈະມາເຖິງໃນຂອບເຂດຂໍ້ຕົກລົງລະຫວ່າງກະຊວງປ້ອງກັນປະເທດຫວຽດນາມ ແລະ ກະຊວງປ້ອງກັນປະເທດຝະລັ່ງກ່ຽວກັບການຮ່ວມມືດ້ານປ້ອງກັນຊາດ.