(vovworld) – ຕອນບ່າຍວັນທີ 9/5, ທ່ານ ຫງວຽນຮິວຕີ໋ນ, ຮອງປະທານຄະນະກຳມະການປະຊາຊົນນະຄອນ ໂຮ່ຈີມິນ ໄດ້ມີການຕ້ອນຮັບທ່ານ Axel van Trotsenburg, ຮອງປະທານທະນາຄານໂລກ (WB) ຮັບຜິດຊອບພາກພື້ນ ອາຊີ - ປາຊີຟີກ ທີ່ພວມຢ້ຽມຢາມ ແລະ ເຮັດວຽກຢູ່ ຫວຽດນາມ. ຕີລາຄາສູງການໜູນຊ່ວຍ ແລະ ຊ່ວຍເຫຼືອຂອງ WB ໃຫ້ແກ່ນະຄອນ ໂຮ່ຈີມິນໃນໄລຍະຜ່ານມາ, ທ່ານ ຫງວຽນຮິວຕີ໋ນ ຫວັງວ່າ, ໄລຍະຈະມາເຖິງ, 2 ຝ່າຍຈະສືບຕໍ່ຜັນຂະຫຍາຍບັນດາໂຄງການອື່ນໆຢ່າງມີປະສິດທິຜົນ. ທ່ານຮອງປະທານທະນາຄານໂລກ Axel van Trotsenburg ກໍ່ແລກປ່ຽນກ່ຽວກັບບາງຂົງເຂດເຊິ່ງ 2 ຝ່າຍສາມາດຮ່ວມມືໃນໄລຍະໃກ້ໆນີ້ ຄື: ຊອກຫາ, ເພີ່ມເຕີມແຫຼ່ງທຶນໜູນຊ່ວຍກໍ່ສ້າງພື້ນຖານໂຄງລ່າງ, ໜູນຊ່ວຍນະຄອນ ໂຮ່ຈີມິນ ສ້າງນະໂຍບາຍ ແລະ ລະບຽບກົດໝາຍໃນການຄຸ້ມຄອງຕົວເມືອງ, ວາງແຜນຕົວເມືອງ, ນຳໃຊ້ທີ່ດິນ, ນະໂຍບາຍປະຕິບັດການຮັບມືກັບການປ່ຽນແປງຂອງດິນຟ້າອາກາດທີ່ເໝາະສົມກັບເງື່ອນໄຂຂອງນະຄອນ ໂຮ່ຈີມິນ.