(vovworld) - ວັນທີ 05 ກັນຍາ, ທ່ານເລຮົ່ງແອງ, ຜູ້ປະຈຳການຄະນະເລຂາສູນກາງພັກກອມມູນິດຫວຽດນາມ ໄດ້ມີການເຈລະຈາກັບຄະນະຜູ້ແທນຂັ້ນສູງພັກກອມມູນິດກຸຍບາ ໂດຍທ່ານ Jose Ramon Machado Ventura, ເລຂາຜູ້ທີ 2 ຄະນະບໍລິຫານງານສູນກາງ ເປັນຫົວໜ້າຄະນະ. ທີ່ການເຈລະຈາ, 2 ຝ່າຍໄດ້ແລກປ່ຽນ, ປຶກສາຫາລືກ່ຽວກັບບັນດາມາດຕະການຊຸກຍູ້ການພົວພັນດ້ານເສດຖະກິດ, ການຄ້າ ແລະ ການລົງທຶນ; ໃຫ້ຄຳໝັ້ນສັນຍາສືບຕໍ່ສົມທົບກັນ ແລະ ສະໜັບສະໜູນເຊິ່ງກັນ ແລະ ກັນບົນເວທີປາໄສສາກົນ ເຊິ່ງທັງ 2 ຝ່າຍພວມເຂົ້າຮ່ວມ. ທ່ານ ເລຮົ່ງແອງ ຜູ້ປະຈຳການຄະນະເລຂາ ຢືນຢັນວ່າ ໃນໄລຍະຈະມາເຖິງ, ພັກ ແລະ ລັດຖະບານຫວຽດນາມ ຈະຜັນຂະຫຍາຍບັນດາບາດກ້າວກະໂດດຂັ້ນຍຸດທະສາດ ເພື່ອແນໃສ່ນຳຫວຽດນາມ ໃຫ້ກາຍເປັນປະເທດອຸດສາຫະກຳຕາມທິດທັນສະໄໝໃນປີ 2020 ໂດຍພື້ນຖານ.
ແລະກໍ່ໃນວັນດຽວກັນ, ທ່ານ ເລຮົ່ງແອງ ຜູ້ປະຈຳການຄະນະເລຂາ ໄດ້ມີການເຮັດວຽກກັບທ່ານ Mario Murillo Jorge ຮອງປະທານສະພາລັດຖະມົນຕີກຸຍບາ. ທ່ານ Mario Murillo ຕີລາຄາສູງບັນດາບົດຮຽນໃນການປ່ຽນໃໝ່ຂອງຫວຽດນາມ, ຖືວ່າ ບັນດາບົດຮຽນດັ່ງກ່າວແມ່ນລ້ຳຄ່າທີ່ສຸດສຳລັບກຸຍບາ ໃນໄລຍະປະຈຸບັນ. 2 ຝ່າຍກໍ່ເຫັນດີກ່ຽວກັບເລື່ອງຕ້ອງມີບັນດາກົນໄກ ແລະ ວິທີການຮ່ວມມືໃໝ່ ເພື່ອແນໃສ່ຍົກສູງປະສິດທິຜົນການຮ່ວມມື 2 ຝ່າຍ, ບົນພື້ນຖານເສີມຂະຫຍາຍຄວາມສາມາດບົນຊ້ອນ, ທ່າແຮງຂອງແຕ່ລະປະເທດ.