ທ່ານລັດຖະມົນຕີການຕ່າງປະເທດຟ້າມບິງມິງ ແລະ
ທ່ານລັດຖະມົນຕີການຕ່າງປະເທດ ແລະ ການຄ້າບຣູໄນ
(ພາບ:phambinhminh.net)
(vovworld)- ວັນທີ 30/6, ຢູ່ນອກກອງປະຊຸມລັດຖະມົນຕີການຕ່າງປະເທດອາຊຽນ ຄັ້ງທີ 46 (AMM 46) ແລະ ບັນດາກອງປະຊຸມທີ່ກ່ຽວຂ້ອງຢູ່ບຣູໄນ, ທ່ານລັດຖະມົນຕີການຕ່າງປະເທດຟ້າມບິງມິງ ໄດ້ມີການພົບປະສອງຝ່າຍກັບລັດຖະມົນຕີການຕ່າງປະເທດບັນດາປະເທດບຣູໄນ, ຍີ່ປຸ່ນ, ສເກົາຫລີ ແລະ ນອກແວ.
ທີ່ການພົບປະກັບທ່ານລັດຖະມົນຕີການຕ່າງປະເທດ ແລະ ການຄ້າບຣູໄນ Mohamed Bolikiah, ທ່ານລັດຖະມົນຕີການຕ່າງປະເທດຟ້າມບິງມິງ ປາດຖະໜາວ່າ: ບຣູໄນ ຈະສືບຕໍ່ສົມທົບກັບຫວຽດນາມ ແລະ ບັນດາປະເທດອາຊຽນອື່ນ ຍູ້ໄວວິວັດການສ້າງປະຊາຄົມອາຊຽນ ແລະ ຊຸກຍູ້ຄວາມເຫັນດີເຫັນພ້ອມຂອງອາຊຽນໃນບັນດາບັນຫາສຳຄັນ. ລັດຖະມົນຕີທັງສອງທ່ານເຫັນດີນຳກັນວ່າຈະຈັດການປະຊຸມຂອງຄະນະກຳມະການປະສົມຂັ້ນລັດຖະມົນຕີການຕ່າງປະເທດຫວຽດນາມ-ບຣູໄນ ຄັ້ງປະຖົມ ມະເລິກໂດຍໄວ.
ທີ່ການພົບປະກັບທ່ານລັດຖະມົນຕີການຕ່າງປະເທດ ຍີ່ປຸ່ນ Fumio Kishida, ທ່ານລັດຖະມົນຕີທັງສອງເຫັນດີວ່າ, ສອງຝ່າຍຕ້ອງຈັດການປະຊຸມຄະນຳກຳມະ ການຮ່ວມມືຫວຽດນາມ-ຍີ່ປຸ່ນ ຄັ້ງທີ 5 ຢູ່ໂຕກຽວ ໂດຍໄວ ເພື່ອແນໃສ່ແລກປ່ຽນຄຳເຫັນ, ກວດຄືນບັນດາຂົງເຂດຮ່ວມມືລະຫວ່າງສອງປະເທດ, ວາງອອກບັນດາທິດທາງ ແລະ ມາດຕະການລະອຽດ ເພື່ອຊຸກຍູ້ການພົວພັນຄູ່ຮ່ວມມືຍຸດທະສາດລະຫວ່າງສອງປະເທດໃນໄລຍະຈະມາເຖິງ.
ໃນການພົບປະກັບທ່ານລັດຖະມົນຕີການຕ່າງປະເທດສເກົາຫລີ Yun Byung Se, ລັດຖະມົນຕີທັງສອງທ່ານ ໄດ້ສະເໜີບາງມາດຕະການລະອຽດເພື່ອພັດທະນາການພົວພັນຮ່ວມມືຍຸດທະສາດລະຫວ່າງສອງປະເທດຢ່າງເລິກເຊິ່ງກວ້າງຂວາງ ແລະ ຮອບດ້ານໃນໄລຍະຈະມາເຖິງຄື: ສືບຕໍ່ຮັກສາການແລກປ່ຽນຄະນະຜູ້ແທນຂັ້ນສູງ, ເພີ່ມທະວີການແລກປ່ຽນດ້ານການຄ້າ-ການລົງທຶນ.
ທ່ານລັດຖະມົນຕີການຕ່າງປະເທດຟ້າມບິງມິງ ແລະ ທ່ານລັດຖະມົນຕີການຕ່າງປະເທດນອກແວ Espen Barth Eide ສະແດງຄວາມເພິງພໍໃຈຕໍ່ການພັດທະນາອັນຕັ້ງໜ້າຂອງການພົວພັນຮ່ວມມືລະຫວ່າງສອງປະເທດໃນບັນດາຂົງເຂດການເມືອງ, ການຕ່າງປະເທດ, ການຄ້າ, ການລົງທຶນ, ການສຶກສາບຳລຸງສ້າງ ແລະ ການຮ່ວມມືພັດທະນາ. ທ່ານລັດຖະມົນຕີການຕ່າງປະເທດຟ້າມບິງມິງ ອວຍພອນນອກແວ ໄດ້ເຊັນສົນທິສັນຍາສະໜິດສະໜົມ ແລະ ຮ່ວມມືອາຊີຕາເວັນອອກສ່ຽງໃຕ້ (TAC) ຢ່າງເປັນທາງການ ແລະ ຫວັງວ່ານອກແວ ຈະມີການປະກອບສ່ວນຢ່າງຕັ້ງໜ້າຕໍ່ສັນຕິພາບ, ສະຖຽນລະພາບ ແລະ ການພັດທະນາໃນພາກພື້ນ.