ທ່ານຫງວຽນເຕິນຢຸງເຂົ້າຮ່ວມກອງປະຊຸມຂັ້ນສູງອາຊຽນ 23
(ພາບ: baocongthuong.com.vn)
(vovworld)- ກ່າວຄຳເຫັນທີ່ກອງປະຊຸມຂັ້ນສູງອາຊຽນ 23 ຈັດຂຶ້ນໃນວັນທີ 9/10 ຢູ່ນະຄອນຫຼວງ Bandar Seri Begawan ຂອງບຣູໄນ, ທ່ານນາຍົກລັດຖະມົນຕີຫງວຽນເຕິນຢຸງ ຍົກອອກໜ້າທີ່ບຸລິມະສິດ ແລະ ວິໄສທັດຍຸດທະສາດກ່ຽວກັບການສ້າງປະຊາຄົມອາຊຽນສາມັກຄີ, ຮ່ວມສຳພັນ, ໝັ້ນຄົງເຂັ້ມແຂງ ແລະ ເສີມຂະຫຍາຍບົດບາດຕົ້ນຕໍໃນການຮັບປະກັນສັນຕິພາບ, ຄວາມສະຫງົບປອດໄພ ແລະ ການພັດທະນາວັດທະນາຖາວອນໃນພາກພື້ນ.
ທ່ານນາຍົກລັດຖະມົນຕີຫງວຽນເຕິນຢຸງ ຊີ້ແຈງວ່າ: ອາຊຽນ ຕ້ອງມີຄວາມຕັດສິນໃຈສູງສຸດເພື່ອສ້າງປະຊາຄົມອາຊຽນສຳເລັດໃນປີ 2015 ພ້ອມທັງວາງອອກວິໄສທັດເພື່ອໃຫ້ອາຊຽນ ສືບຕໍ່ພັດທະນາຢ່າງໝັ້ນຄົງເຂັ້ມແຂງໃນໄລຍະຫຼັງປີ 2015, ເປັນປະຊາຄົມມີຄວາມສະໜິດຕິດພັນດ້ານການເມືອງ, ເສດຖະກິດ, ພ້ອມກັນແບ່ງປັນບັນດາຄວາມຮັບຜິດຊອບສັງຄົມ, ຮັບມືກັບບັນດາສິ່ງທ້າທາຍຢ່າງມີປະສິດທິຜົນ…
ທ່ານນາຍົກລັດຖະມົນຕີຫງວຽນເຕິນຢຸງ ຊົມເຊີຍໝາກຜົນການທາບທາມຄວາມເຫັນທາງການຄັ້ງທຳອິດລະຫວ່າງອາຊຽນ-ຈີນ ກ່ຽວກັບ COC ພ້ອມທັງສະເໜີໃຫ້ອາຊຽນ ແລະ ຈີນ ຕ້ອງມານະພະຍາຍາມເພື່ອຊຸກຍູ້ການເຈລະຈາແທດຈິງ ແລະ ບັນລຸໄດ້ຂໍ້ກຳນົດ COC ໂດຍໄວ. ທ່ານຍັງຕີລາຄາສູງຄວາມມານະພະຍາຍາມ ແລະ ການປະກອບສ່ວນຂອງໄທ ໃນຖານະເປັນປະເທດປະສານການພົວພັນໂອ້ລົມສົນທະນາອາຊຽນ-ຈີນ.
ທີ່ກອງປະຊຸມ, ທ່ານນາຍົກລັດຖະມົນຕີຫງວຽນເຕິນຢຸງ ພ້ອມກັບການນຳບັນດາປະເທດອາຊຽນ ຮັບຮອງເອົາຖະແຫຼງການກ່ຽວກັບຄວາມຕັດສິນໃຈສ້າງວິໄສທັດປະຊາຄົມອາຊຽນ ຫຼັງປີ 2015. ກອງປະຊຸມຂັ້ນສູງອາຊຽນ ຄັ້ງທີ 23 ກໍ່ຮັບຮອງເອົາບັນດາຖະແຫຼງການສຳຄັນ, ໃນນັ້ນມີຖະແຫຼງການເພື່ອແນໃສ່ຊຸກຍູ້ການຮ່ວມມືດ້ານຊີວິດສັງຄົມ, ນັກທຸລະກິດໜຸ່ມ, ປ້ອງກັນ ແລະ ຕ້ານໄພທຳມະຊາດ, ປ້ອງການ, ຕ້ານພະຍາດບໍ່ຕິດແປດ....
ຫວຽດນາມພ້ອມກັບອາຊຽນ ເພີ່ມທະວີການພົວພັນກັບບັນດາປະເທດຄູ່ຮ່ວມມື
ສິ້ນສຸດກອງປະຊຸມຂັ້ນສູງອາຊຽນ ຄັ້ງທີ 23 ໃນຕອນບ່າຍວັນທີ 9/10 ຢູ່ບຣູໄນ, ທ່ານນາຍົກລັດຖະມົນຕີຫງວຽນເຕິນຢຸງ ເຂົ້າຮ່ວມກອງປະຊຸມຂັ້ນສູງລະຫວ່າງອາຊຽນ ກັບບັນດາຄູ່ຮ່ວມມືຄື: ຍີ່ປຸ່ນ, ສເກົາຫຼີ ແລະ ຈີນ ຄັ້ງທີ 16.
ກ່າວຄຳເຫັນທີ່ກອງປະຊຸມຂັ້ນສູງອາຊຽນ-ຍີ່ປຸ່ນ, ທ່ານນາຍົກລັດຖະມົນຕີຫງວຽນເຕິນຢຸງ ຖືວ່າ: ສອງຝ່າຍຕ້ອງຍູ້ແຮງການເຊື່ອມຈອດພາກພື້ນ, ພິເສດແມ່ນກ່ຽວກັບພື້ນຖານໂຄງລ່າງ, ການພົບປະແລກປ່ຽນ ປຊຊ, ເພີ່ມທະວີສົມທົບກັນປະເຊີນໜ້າກັບບັນດາສິ່ງທ້າທາຍໃນພາກພື້ນ ແລະ ທົ່ວໂລກ. ອາຊຽນ ແລະ ຍີ່ປຸ່ນ ຕ້ອງສະໜັບສະໜູນເລື່ອງອາຊຽນ ແລະ ຈີນ ສືບຕໍ່ເຈລະຈາ, ທາບທາມຄວາມເຫັນ ແລະ ຜັນຂະຫຍາຍຖະແຫຼງການ DOC ຢ່າງຄົບຖ້ວນ ແລະ ມີປະສິດທິຜົນ ໄປຄຽງຄູ່ກັບການເຈລະຈາທາງການ ແລະ ແທດຈິງເພື່ອບັນລຸຂໍ້ກຳນົດ COC ໄດ້.
ທີ່ກອງປະຊຸມຂັ້ນສູງອາຊຽນ-ສ.ເກົາຫຼີ, ທ່ານນາຍົກລັດຖະມົນຕີຫງວຽນເຕິນຢຸງ ສະເໜີວ່າ: ໃນໄລຍຈະມາເຖິງ, ສອງຝ່າຍຕ້ອງຍູ້ແຮງການຮ່ວມມືໃນບັນດາຂົງເຂດໃຫ້ບຸລິມະສິດ ແລະ ເນັ້ນໜັກວ່າ: ຫວຽດນາມ ຖືການຮ່ວມມືຮອບດ້ານແມ່ຂອງ-ສ.ເກົາຫຼີ ໃນວິວັດການສ້າງປະຊາຄົມອາຊຽນ ເປັນສຳຄັນ. ຫວຽດນາມ ມີຄວາມເປັນກຽດຈັດຕັ້ງເວລທີປາໄສວິສາຫະກິດແມ່ຂອງ-ສ.ເກົາຫຼີ ຄັ້ງທີ 2 ປີ 2014 ແລະ ປາດຖະໜາວ່າ ສ.ເກົາຫຼີ ຈະສະໜັບສະໜູນ ແລະ ຮ່ວມມືກັບຫວຽດນາມ ຢ່າງແໜ້ນແຟ້ນໃນການຜັນຂະຫຍາຍການເຄື່ອນໄຫວດັ່ງກ່າວ.
ທີ່ກອງປະຊຸມຂັ້ນສູງອາຊຽນ-ຈີນ ຄັ້ງທີ 16, ທ່ານນາຍົກລັດຖະມົນຕີຫງວຽນເຕິນຢຸງ ເນັ້ນໜັກວ່າ: ນີ້ກໍ່ແມ່ນກອງປະຊຸມຂັ້ນສູງ ລະນຶກ 10 ປີແຫ່ງສາຍພົວພັນຄູ່ຮ່ວມມືຍຸດທະສາດອາຊຽນ-ຈີນ. ທ່ານຊີ້ແຈງວ່າ: ອາຊຽນ ຖືເປັນສຳຄັນ ແລະ ຖືວ່າ: ການສ້າງຂໍ້ກຳນົດການປະພຶດຢູ່ທະເລຕາເວັນອອກໂດຍໄວ ແມ່ນມີລັກສະນະສັງລວມ ແລະ ຜູກມັດ ຈະປະກອບສ່ວນສຳຄັນເຂົ້າໃນການຮັບປະກັນສັນຕິພາບ, ສະຖຽນລະພາບ ແລະ ຄວາມປອດໄພການເດີນທະເລຢູ່ພາກພື້ນເປັນຢ່າງດີກ່ວາ.
ໃນຕອນບ່າຍຂອງວັນດຽວກັນ, ທ່ານນາຍົກລັດຖະມົນຕີຫງວຽນເຕິນຢຸງ ກໍໄດ້ເຂົ້າຮ່ວມ ກອງປະຊຸມຂັ້ນສູງອາຊຽນ-ອາເມລິກາ ຄັ້ງທີ 1.
ທ່ານນາຍົກລັດຖະມົນຕີ ຫງວຽນເຕີນຢູງ ແລະ ປະທານາທິບໍດີ
ມ້ຽນມາ Thein Sein
ພາບ:chinhphudientu.vn
|
ຊຸກຍູ້ການຮ່ວມມືສອງຝ່າຍ ຫວຽດນາມ-ມ້ຽນມາ
ຢູ່ນອກກອງປະຊຸມຂັ້ນສູງອາຊຽນ 23 ຈັດຂຶ້ນຢູ່ ບຣູໄນ, ວັນທີ 9/10, ເມ່ືອພົບປະແລກປ່ຽນຄຳເຫັນກັບປະນາທິບໍດີ ມ້ຽນມາ Thein Sein, ທ່ານນາຍົກລັດຖະມົນຕີ ຫງວຽນເຕີນຢູງ ໄດ້ເນັ້ນຫນັກເຖິງນະໂຍບາຍສະເຫມີຕົ້ນສະເຫມີປາຍຂອງຫວຽດນາມແມ່ນຖືການພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືຫລາຍດ້ານກັບມ້ຽນມາເປັນສຳຄັນ ແລະ ປາດຖະຫນາຢາກນຳການຮ່ວມມືລະຫວ່າງສອງປະເທດນັບມື້ນັບມີປະສິດທິຜົນກວ່າ. ທ່ານນາຍົກລັດຖະມົນຕີ ຫງວຽນເຕີນຢູງ ສະເຫນີລັດຖະບານ ມ້ຽນມາ ສືບຕໍ່ສ້າງເງື່ອນໄຂໃຫ້ແກ່ບັນດາວິສາຫະກິດຫວຽດນາມເຄ່ືອນໄຫວຢູ່ ມ້ຽນມາ, ຊຸກຍູ້ການຄ້າລະຫວ່າງສອງປະເທດ. ປະທານາທິບໍດີ ມ້ຽນມາ Thein Sein ຢືນຢັນ: ມ້ຽນມາປາດຖະຫນາກຢາກເພີ່ມທະວີຊຸກຍູ້ການຮ່ວມມືກັບຫວຽດນາມໃນທຸກຂົງເຂດ ແລະ ສະແດງຄວາມປາດຖະຫນາຢາກຫວຽດນາມ ແບ່ງປັນບົດຮຽນໃນປີ ມ້ຽນມາ ຮັບບົດບາດເປັນປະທານ ອາຊຽນ ແລະ ສະເຫນີໃຫ້ສອງຝ່າຍເພີ່ມທະວີາການຮ່ວມມືຢ່າງແຫນ້ນແຟ້ນໃນບັນດາເວທີປາໄສພາກພື້ນ ແລະ ສາກົນ.